U mahiloŭskim lesie 8 bajcoŭ zvodnaj roty chutkaha reahavańnia aperatyŭna zatrymali haściej na dni narodzinaŭ moładzievaj aktyvistki za raspalvańnie vohnišča ŭ nieadpaviednym miescy.
U Mahilovie masavym zatrymańniem skončyłasia śviatkavańnie dnia narodzinaŭ moładzievaj aktyvistki Taćciany Bułanavaj.
Paŭtara dziesiatki zaprošanych haściej sabralisia ŭ lesa‑parkavaj zonie na ŭskrainie horada. Ale paśpieli maładziony tolki raspalić vohnišča — 8 bajcoŭ zvodnaj roty chutkaha reahavańnia pad kiraŭnictvam majora Siarhieja Andrejenki niečakana błakavali ich dy pačali dahladać ułasnyja rečy. Pałovie ŭdzielnikaŭ imprezy ŭdałosia ŭciačy, jany źbiehli hłyboka ŭ les. Astatnich milicejskim aŭtobusam dastavili ŭ RAUS Mahiloŭskaha rajona. Pry zatrymańni major Andrejenka niekalki razoŭ udaryŭ miascovuju žurnalistku Hannu Iljinu.
U pastarunku napraciahu troch hadzinaŭ doŭžyłasia raźbiralnictva, ale milicyjanty tak i nie zdoleli sfarmulavać skład pravaparušeńnia zatrymanych. U vyniku, dadatkova byŭ vyklikany supracoŭnik MNS, jaki skłaŭ pratakoł pa fakcie raspalvańnia vohnišča ŭ nieadpaviednym miescy.
Taćciana Bułanava źviazvaje zdareńnie z prasłuchoŭvańniem telefonaŭ apazicyjanieraŭ. Bo ŭsim haściam, što spaźnialisia, jana praz telefon padrabiazna tłumačyła maršrut ruchu. Ale chutčej za ŭsich da miesca zboru dabralisia śpiecnazaŭcy.
30 studzienia kala 11 hadzin viečara supracoŭnikami asipovickaj milicyi byŭ zatrymany Staršynia Asipovickaj supołki niezarehistravanaj arhanizacyi Moładź BNF Arciom Dubski. Chłopca zatrymali na vychadzie ź ciahniku j prapanavali prajści ŭ pastarunak u jakaści śviedki. Arciom admoviŭsia.
Jak paviedamlaje presavaja słužba Moładzi BNF, milicyjanty «zapichali» aktyvista ŭ pastarunak dy skłali pratakoł asabistaha dahladu, krychu paźniej pratakoł vymańnia asabistych rečaŭ: hazietu «Prava na Volu», knihu P.Sieviarynca «Listy ź lesu», 44 značyki «Za Svabodu». Jak patłumačyli milicyjanty rečy adpraviać na ekspertyzu na źmiest źniavahi honaru dy hodnaści prezidenta Biełarusi. Arcioma Dubskaha adpuścili ŭ 01.15 .
Ciapier čytajuć
Prapahanda rychtuje hramadstva da zahadkavaj «praciahłaj kamandziroŭki» Łukašenki39
Kamientary