Hienieralnaj prakuraturaj Biełarusi vyvučany materyjały, što pastupili sa Śledčaha kamiteta, u dačynieńni da słužbovych asob ZAT «Biełaruskaja kalijnaja kampanija», jakija źjaŭlajucca hramadzianami Rasii.
Jak paviedamili ŭ Hienprakuratury, materyjały vyłučany z kryminalnaj spravy, raspačataj pa faktach pryčynieńnia škody ŭ vyniku supraćpraŭnaj dziejnaści kiraŭnictva ŭkazanaha akcyjaniernaha tavarystva.
Jak paviedamlałasia raniej, havorka idzie pra 19 tamoŭ materyjałaŭ ab pryčynieńni škody intaresam Rasii.
U adpaviednaści z pahadnieńniem ab supracoŭnictvie pamiž hienprakuraturami Biełarusi i RF ad 27 krasavika 2009 hoda materyjały nakiravany ŭ Hienieralnuju prakuraturu Rasii.
U Hienprakuratury Biełarusi zajavili, što biełaruski bok paćviardžaje svaju hatoŭnaść nadalej akazvać kampietentnym orhanam RF pravavuju i inšuju dapamohu «ŭ metach poŭnaha, usiebakovaha i abjektyŭnaha ŭstanaŭleńnia ŭsich akaličnaściaŭ pryčynieńnia škody intaresam hramadstva i dziaržavy, jakija znachodziacca pad achovaj zakona, i vykazvaje ŭpeŭnienaść va ŭzajemnym supracoŭnictvie pry rasśledavańni kryminalnaj spravy, što znachodzicca ŭ vytvorčaści Śledčaha kamiteta Biełarusi».
Nahadajem, 30 lipienia rasijskaja kampanija «Urałkalij» abviaściła pra vychad sa składu biełaruska-rasijskaha ZAT «Biełaruskaja kalijnaja kampanija» (BKK), praź jakoje razam z «Biełaruśkalijem» pastaŭlała svaju pradukcyju na źniešnija rynki. Heta rašeńnie rasijanie rastłumačyli tym, što biełaruski bok pačaŭ ekspartavać pradukcyju «Biełaruśkalija» ŭ abchod BKK.
26 žniŭnia było abvieščana ab raspačynańni kryminalnaj spravy ŭ dačynieńni da šerahu kiraŭnikoŭ BKK, siarod jakich staršynia nahladalnaha savieta BKK, hiendyrektar «Urałkalija» Uładzisłaŭ Baŭmhiertnier. Jany abvinavačvajucca na padstavie č. 3 art. 424 KK (złoŭžyvańnie ŭładaj i słužbovymi paŭnamoctvami). Baŭmhiertnier byŭ zatrymany ŭ Minsku i źmieščany ŭ SIZA KDB. Ciapier da jaho prymianiajecca miera strymańnia ŭ vyhladzie chatniaha aryštu.
Kamientary