AAE i Saudaŭskaja Aravija pryhrazili Iranu adkazam na ŭdary pa ich terytoryi
Ministerstva abarony Abjadnanych Arabskich Emirataŭ u svajoj aficyjnaj zajavie paviedamiła, što kraina stała abjektam «aburalnaj ataki z vykarystańniem iranskich balistyčnych rakiet».
U zajavie adznačajecca, što pry pierachopie askiepki rakiety ŭpali na žyły rajon Abu-Dabi, u vyniku čaho zahinuŭ adzin čałaviek.
«AAE pakidajuć za saboj poŭnaje prava adkazać na hetuju eskałacyju i pryniać usie nieabchodnyja miery dla abarony svajoj terytoryi, svaich hramadzian i žycharoŭ», — abjaviła viedamstva.
Ministerstva zamiežnych spraŭ Saudaŭskaj Aravii asudziła «aburalnuju ahresiju Irana» i vykazała poŭnuju salidarnaść z krainami AAE, Bachrejnam, Kataram, Kuviejtam i Iardanijaj. Taksama było zroblena papiaredžańnie ab surjoznych nastupstvach u vypadku praciahnieńnia padobnych «parušeńniaŭ mižnarodnaha prava».
Ministerstva abarony Katara zajaviła, što ŭzbrojenyja siły paśpiachova adbili druhuju chvalu atak, nazvaŭšy ŭdary «aburalnym parušeńniem» svajho suvierenitetu.
Viedamstva adznačyła, što Katar zaŭsiody zaklikaŭ da dyjałohu ź Iranam i što napady na krainu «nie mohuć być pryniaty ni pad jakim apraŭdańniem abo pryčynaj», pakolki jana zaŭsiody trymałasia ŭ baku ad rehijanalnych kanfliktaŭ.
Raniej Iran nanios udary pa amierykanskich vajennych abjektach u niekalkich krainach rehijonu.
Kamientary