Nacbank: Tempy kredytavańnia ekanomiki pieravysili hadavy prahnoz

Tempy kredytavańnia ekanomiki pieravysili hadavy prahnoz. Pra heta havorycca ŭ infarmacyjnych materyjałach, padrychtavanych dla kansultatyŭnaha savieta pry Nacbanku, pasiadžeńnie jakoha adbyłosia na minułym tydni.

Niahledziačy na vysoki ŭzrovień pracentnych stavak, tempy kredytavańnia bankami ekanomiki sioleta skłalisia vyšej za zapłanavanyja, kanstatuje Nacbank. «Za dzieviać miesiacaŭ patrabavańni bankaŭ da ekanomiki vyraśli na 22,9% (z ulikam Banka raźvićcia — bolš jak na 25%), pry hadavym prahnozie 17—20%. Vysokija abjomy kredytavańnia farmirujuć zališni ŭnutrany popyt u ekanomicy i stvarajuć ryzyki dla makraekanamičnaj stabilnaści», — havorycca ŭ materyjałach NB.

Na dumku ekśpiertaŭ, apieradžalnyja tempy kredytavańnia ekanomiki abumoŭlenyja sioleta vydačaj kredytaŭ u zamiežnaj valucie, staŭki pa jakich značna nižejšyja, čym pa rublovych kredytach, a taksama finansavańniem dziaržprahram.

Jak paviedamlałasia raniej, płan sumiesnych dziejańniaŭ urada i Nacyjanalnaha banka, zaćvierdžany 10 kastryčnika, praduhledžvaje abmiežavańnie abjomaŭ kredytavańnia ekanomiki ŭ čaćviortym kvartale 2013 hoda. Pavodle jaho, pryrost patrabavańniaŭ bankaŭ da ekanomiki ŭ kastryčniku—śniežni pavinien składać nie bolš jak 1% za miesiac. Pavodle infarmacyi BiełaPAN, 11 kastryčnika ŭ Nacbanku adbyłasia narada z udziełam kiraŭnikoŭ kamiercyjnych bankaŭ, na jakoj rehulatar davioŭ adpaviednaje rašeńnie da hrašova-kredytnych ustanoŭ.

Pradstaŭniki ŭrada, kamientujučy rašeńni, praduhledžanyja płanam sumiesnych dziejańniaŭ, adznačali, što sutnaść pryniatych mier zaklučajecca ŭ tym, što «ŭnutrany popyt budzie stroha adpaviadać resursnym mahčymaściam našaj ekanomiki». «Lišnich rubloŭ, jakija mahli b cisnuć na valutny rynak, prosta nie budzie. Da kanca hoda, pa našych raźlikach, pryrost kredytaŭ ekanomicy nie pieravysić 9 trłn. rubloŭ. Heta prykładna 1% rostu kredytavańnia ekanomiki za miesiac», — zajaviŭ pieršy namieśnik kiraŭnika aparata Saŭmina — kiraŭnik sakrataryjata premjer-ministra Alaksandr Zabaroŭski.

Varta adznačyć, što, jak paviedamlałasia raniej, u pačatku 2013 hoda biełaruskija ŭłady ŭziali žorstkija abaviazacielstvy pa tempach kredytavańnia ekanomiki pierad Antykryzisnym fondam JeŭrAzES (AKF). Pakazčyk pa roście kredytavańnia ekanomiki byŭ pieraviedzieny (u miežach dziejnaj kredytnaj prahramy z AKF) u razrad kantrolnych i ŭstanoŭleny na ŭzroŭni 1,5% za miesiac. Na dumku pradstaŭnikoŭ fondu, abmiežavańnie tempaŭ kredytavańnia spryjaje strymlivańniu inflacyjnych pracesaŭ.

Tym nie mienš, jak paviedamlaŭ raniej AKF, tempy kredytavańnia biełaruskaj ekanomiki sioleta apiaredžvali praduhledžanyja tempy. Pradstaŭniki fondu raniej adznačali, što nievykanańnie Biełaruśsiu hetaha kantrolnaha pakazčyka moža ŭskładnić vydzialeńnie šostaha tranšu kredytu (440 młn. dołaraŭ). Biełaruskija ŭłady płanavali atrymać hetu sumu ŭ listapadzie 2013-ha.

Miž inšym, Minfin Biełarusi vykazaŭ žadańnie padrychtavać novuju kredytnuju prahramu z AKF. U svaju čarhu, namieśnik staršyni praŭleńnia Jeŭrazijskaha banka raźvićcia, kiraŭnika srodkami fondu Siarhiej Šatałaŭ zajaviŭ u kancy žniŭnia, što havaryć pra novuju kredytnuju prahramu ź Biełaruśsiu zaŭčasna. «Nieabchodna spačatku praanalizavać vyniki ciapierašniaj stabilizacyjnaj prahramy, jakaja pačałasia ŭ 2011 hodzie i pakul nie zavieršana», — skazaŭ Šatałaŭ.

Pavodle infarmacyi BiełaPAN, misija Antykryzisnaha fondu JeŭrAzES, jakaja budzie aceńvać vykanańnie Biełaruśsiu ŭmoŭ dziejnaj kredytnaj prahramy, prybudzie ŭ Minsk u treciaj dekadzie kastryčnika.

• 0
• 0
• 0
• 0
• 0
• 0
• 0
• 0