Majdan hatovy stajać da viasny — pakul nie źmienicca ŭłada
«Zaŭtra ničoha nia vyrašycca, budziem stajać tut, pakul Janukovič nia sydzie», — z takim nastrojem pačaŭsia novy tydzień na Majdanie.
Ukrainskaja apazycyja raniej zajaŭlała, što Majdan budzie stajać prynamsi da 17 śniežnia, vystaŭlajučy da ŭłady try patrabavańni: adstaŭka premjer-ministra Mikałaja Azarava, vyzvaleńnie palityčnych viaźniaŭ i pakarańnie adkaznych za źbićcio ludziej na Majdanie.
Ale pratestoŭcy, jakija ŭžo čaćviorty tydzień zajmajuć Majdan i centralnyja vulicy Kijeva, nastrojenyja kateharyčna i nia zhodnyja na paŭmiery, paviedamlaje radyjo «Svaboda».
Achova pieršaha šerahu Majdana z boku Chraščaciku kaža, što, padpisaŭšy ŭhody pra Mytny sajuz, Janukovič padpiša sabie kaniec: «Zaŭtra ničoha nia vyrašycca. Nastroj taki — stajać da kanca. Nie adstupać ad mety — poŭnaja źmiena ŭłady i, mahčyma, prezydenta», — kaža achoŭnik.
«Ludzi nie adstupiać», — paćviardžaje mužčyna ŭ kazackim stroi. Dziaŭčaty-studentki Kacia i Nadzia arhanizavali namiot, u jakim — infacentar dla zamiežnikaŭ.
Kažuć, što da ich padychodziać roznyja ludzi i zbolšaha pakidajuć pažadańni pośpiechu i salidarnaści: «Šmat chto kaža, što heta budzie vyrašalny dzień, ale, na žal ci na ščaście, dumaju, što heta jašče nie kaniec. Našaja ŭłada adzin dzień kaža adno, druhi — druhoje, ale my budziem stajać tut da pieramohi, pakul nia budzie pazytyŭnych vynikaŭ. Maja asabistaja dumka — adstaŭka parlamentu i prezydenta. Całkam treba systemu źmianić».
Dźmitry zajmajecca malekularnaj bijalohijaj.
Kaža, što navukoŭcy ź instytutu malekularnaj bijalohii i hienetyki pačali z taho, što achoŭvali zachodnija miežy Majdana: «U nas była važnaja misija, asabliva ŭ pieršyja nočy».
Jon taksama ŭpeŭnieny, što zaŭtra Majdan nia skončycca. Kaža, što raniej byŭ zbolšaha abyjakavy da palityki, ale kali pryjšoŭ na Majdan, to pabačyŭ, jak ludzi razam mohuć rabić važnuju spravu dziela spraviadlivaści. «Ja bolš nie abyjakavy», — kaža Dźmitry. «Heta i da Novaha hodu nia skončycca, — z radasnaj upeŭnienaściu kažuć Raman i Taras. Jany ŭžo druhi raz pryjechali na Majdan ź Lvova.
«Naš prezydent tak prosta nie sastupić. Ludzi chočuć spraviadlivaści, — praciahvaje Taras. — Dalej tak być nia moža. Ludzi kidajuć biznes, vučobu, pracu, dziaciej chvorych doma pakidajuć i siudy jeduć. Tak nia moža bolej praciahvacca». «Dy kałom u horle hetaja ŭłada staić užo», — zaklučaje Raman. Volha z Čarkasaŭ taksama pryjechała admysłova na Majdan.
«My možam tut i da viasny prabyć, — kaža jana. — My chočam adstaŭki prezydenta. Tolki tak. Inakš ničoha nie atrymajecca. Nia viedaju, na jakija chitryki jon pojdzie. Ale na tannyja patrabavańni, paŭmiery narod nia pojdzie. Zaŭtra heta dakładna nia vyrašycca». Ukrainskaja apazycyja zaklikaje ludziej pryjści na čarhovy narodny schod u aŭtorak, 17 śniežnia. U hety dzień adbudziecca pasiedžańnie rasiejska-ŭkrainskaj miždziaržaŭnaj kamisii. Apazycyja niepakoicca, što ŭłada moža dasiahnuć pahadnieńnia pra dałučeńnie Ŭkrainy da Mytnaha sajuzu. Rezalucyja, jakaja zabaraniaje Viktaru Janukoviču ažyćciaŭlać padobnyja dziejańni, była pryniataja ŭčora, 15 śniežnia, na Majdanie. Aleh Ciahnibok, lider apazycyjnaj partyi «Svoboda», ličyć, što hałoŭnaj temaj zaŭtrašniaha schodu maje być pratest suprać padpisańnia takoj uhody.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj4
Kamientary