Biełaruś niedaatrymała ŭ 2013 hodzie bolš za 10 młrd. dołaraŭ u vyniku skaračeńnia ekspartu šerahu tavaraŭ, pastaŭki jakich (u hrašovym vyražeńni) źnizilisia ŭ najbolšaj stupieni.
Tak, zhodna z danymi aficyjnaj statystyki, pa 27 biełaruskich tavarach, pastaŭki jakich na źniešnija rynki bolš za ŭsio ŭ 2013 hodzie źnizilisia, ekspart skaraciŭsia na 10,55 młrd. dołaraŭ.
U pryvatnaści, ekspart biełaruskich naftapraduktaŭ u 2013 hodzie ŭ paraŭnańni z 2012-m skaraciŭsia na 4,33 młrd. dołaraŭ, rastvaralnikaŭ i razbavicielaŭ — na 2,78 młrd. dołaraŭ, zmazačnych materyjałaŭ — na 1,02 młrd. dołaraŭ, kalijnych uhnajeńniaŭ — na 599,3 młn. dołaraŭ, hruzavych aŭtamabilaŭ — na 502,5 młn. dołaraŭ, traktaroŭ i siedłavych ciahačoŭ — na 362,9 młn. dołaraŭ.
Na dumku Ministerstva ekanomiki, asnoŭnymi pryčynami skaračeńnia ekspartu ŭ 2013 hodzie vystupili niekalki faktaraŭ: zvužeńnie rasijskaha rynku zbytu z-za zapavolvańnia ekanamičnaha rostu ŭ Rasii i ŭzmacnieńnie kankurencyi na rasijskim rynku zbytu z-za ŭstupleńnia susiedniaj krainy ŭ Suśvietnuju handlovuju arhanizacyju.
Vyšejpieraličanyja faktary, na dumku ekśpiertaŭ, u najbolšaj stupieni paŭpłyvali na ekspart pradukcyi biełaruskaha mašynabudavańnia.
Aprača hetaha, skaračeńnie biełaruskaha ekspartu ŭ 2013 hodzie ŭ paraŭnańni z pazaminułym hodam adbyłosia z-za spynieńnia ekspartu biełaruskich rastvaralnikaŭ i bijadyzielnaha paliva.
Nahadajem, u žniŭni 2012 hoda Biełaruś vymušana była spynić pa patrabavańni Rasii rastvaralny biźnies. Aficyjnyja asoby Rasii mierkavali, što Biełaruś ekspartuje naftapradukty pad vyhladam rastvaralnikaŭ, kab nie pieraličvać vyvaznuju pošlinu na ekspartavanyja naftapradukty ŭ rasijski biudžet.
Jašče adnoj pryčynaj źnižeńnia biełaruskaha ekspartu ŭ 2013 hodzie ekśpierty nazyvajuć kryzis u kalijnaj halinie. Nahadajem, u lipieni minułaha hoda rasijski «Urałkalij» abjaviŭ ab spynieńni prodažu praź Biełaruskuju kalijnuju kampaniju, što pryviało jak da źnižeńnia suśvietnych cen na minieralnyja ŭhnajeńni, hetak i da skaračeńnia abjomaŭ biełaruskaha ekspartu hetaj pradukcyi
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary