Niamiecki prafiesar choča ŭvaskresnuć praz 150 hadoŭ paśla zamarozki
Vučony z Hiermanii choča ŭvaskresnuć ź miortvych praz 150 hadoŭ, kab adkazać na pytańnie: «Ci jość viečnaje žyćcio?». Dla hetaha 75-hadovy prafiesar Kłaŭs Samies advažyŭsia padvierhnuć svajo cieła zamarozcy (kryjakansiervacyi).
«Ja nie źjechaŭ z hłuzdu», — kamientuje svajo rašeńnie niamiecki vučony na staronkach papularnaha časopisa Bild. Kłaŭs Samies amal usio svajo žyćcio pryśviaciŭ vyvučeńniu hierantałohii — navuki pra stareńnie. Kala 20 apošnich hadoŭ, z 1995 hoda, vučony zajmajecca kryjonikaj, jakaja vyvučaje zachavańnie ŭ hłybokaj zamarozcy žyvych istot, kab u budučyni ich možna było ažyvić, a pry nieabchodnaści i vylečyć. Tamu na ŭłasnym prafiesijnym vopycie Samies pierakanaŭsia, što kryjakansiervacyja maje pierśpiektyvy. Vučony ličyć, što śmierć — heta chvaroba, jakuju možna navučycca «lačyć».
«Siońnia technałohija kryjakansiervacyi niezvarotnaja, ale hadoŭ praz 150 čałaviectva, vierahodna, navučycca razmarožvać zamarožanyja kletki», — kaža Kłaŭs Samies.
Samies padpisaŭ kantrakt z amierykanskim «Instytutam kryjoniki», u łabaratoryi jakoha jaho cieła budzie znachodzicca da tych časoŭ, pakul sučasnaja navuka nie zmoža ažyŭlać «zamarožanyja» arhanizmy. Štab-kvatera «Instytuta kryjoniki» raźmiaščajecca ŭ amierykanskim štacie Mičyhan.
Manipulacyi, jakija śpiecyjalisty praviaduć z Kłaŭsam, nahadvajuć kadry z fantastyčnych filmaŭ. Cieła prafiesara budzie daviedziena da tempieratury minus 196 hradusaŭ. Adznačajecca, što važna mamientalna astudzić pacyjenta, kab kletki nie pačali raskładacca. Paśla taho, jak budzie zafiksavana śmierć mozhu, vučonaha źmieściać u skryniu ź lodam, i pačnuć rychtavać da pieravozki ŭ ZŠA. U «Instytucie kryjoniki» ź vien Kłaŭsa Samiesa adpampujuć kroŭ i zamieniać jaje na fizrastvor, jaki stanie ćviordym paśla zamarazki ŭ kamiery z vadkim azotam.
Kłaŭs vydatkuje na «pasłuhu» zamarazki 35 tys. jeŭra. Ź ich 21 tys. jeŭra jon užo pieraličyŭ «Instytutu kryjoniki», jašče ŭ 14 tys. jeŭra abyjdziecca transparciroŭka jaho cieła z Hiermanii ŭ Štaty.
***
Kryjakansiervacyja — nizkatempieraturnaje zachoŭvańnie žyvych bijałahičnych abjektaŭ, kab mieć mahčymaść razmarozić ich u budučyni z adnaŭleńniem ich bijałahičnych funkcyj. Mietady kryjakansiervacyi kletačnych kultur, tkanin, embryjonaŭ paśpiachova ŭžyvajucca ŭ sučasnaj miedycynie. Viadomyja tolki adzinkavyja apieracyi pa paśpiachovaj transpłantacyi kryjakansiervavanych orhanaŭ, pry hetym miedyki havorać ab adnaŭleńni paśla razmarozki nie cełaha orhana, a tolki nievialikaj častki žyvoj tkanki.
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary