Pasoł Ukrainy ŭ Respublicy Biełaruś Michaił Ježal 18 lipienia ŭ ekskluziŭnym intervju BiełaPAN źviarnuŭsia da ŭsich hramadzian Biełarusi i ŭsich pasolstvaŭ, akredytavanych u Biełarusi, kamientujučy avijakatastrofu «Boinha-777», źbitaha nad ukrainskaj terytoryjaj 17 lipienia.
«Hety terarystyčny akt staŭ trahiedyjaj dla Ukrainy i ŭsiaho śvietu. My vykazvajem ščyryja spačuvańni i spahadu siemjam i blizkim zahinułych», — skazaŭ pasoł.
Miesca padzieńnia abłomkaŭ samalota znachodzicca ŭ zonie, jakaja siońnia kantralujecca niezakonnymi ŭzbrojenymi farmiravańniami, adznačyŭ jon. «Z ulikam hetaha ŭrad Ukrainy raspačynaje ŭsie miery, kab atrymać poŭny dostup da miesca katastrofy dla praviadzieńnia nieabchodnych dziejańniaŭ pa apaznańni i repatryjacyi na radzimu cieł zahinułych, — paviedamiŭ Ježal. — Ministerstva zamiežnych spraŭ Ukrainy stvaryła apieratyŭny kruhłasutačny štab dla pracy sa zvarotami svajakoŭ zahinułych pasažyraŭ i kaardynacyi pracy z dypłamatyčnymi ŭstanovami zamiežnych dziaržaŭ, akredytavanych va Ukrainie».
Cieły zahinułych, skazaŭ jon, nakiroŭvajuć u Charkaŭ. Stvoranyja apieratyŭnyja štaby pry pasolstvach Ukrainy ŭ Małajzii i Karaleŭstvie Niderłandaŭ. Ministerstva zamiežnych spraŭ Ukrainy zabiaśpiečyć terminovaje afarmleńnie viz svajakam zahinułych, u tym liku paśla prylotu ŭ aeraport Baryspal. U Charkavie vydzielena 300 miescaŭ dla biaspłatnaha raźmiaščeńnia rodnych i blizkich achviar teraktu.
«Pavodle apošnich źviestak, da miesca katastrofy vyjechali 30 pradstaŭnikoŭ manitorynhavaj misii ABSIE, — praciahnuŭ Ježal. — Pavietranaja prastora nad Danieckaj, Łuhanskaj i častkaj Charkaŭskaj abłaściej poŭnaściu zakrytaja dla palotaŭ».
Heta ŭžo treci, padkreśliŭ jon, źbity samalot paśla 14 i 16 lipienia, kali z terytoryi Rasii byli źbityja An-26 i Su-25, jakija naležać uzbrojenym siłam Ukrainy.
«Źniščalnikaŭ uzbrojenych sił Ukrainy padčas i ŭ miescy, dzie adbyłasia ŭčarašniaja žudasnaja trahiedyja, u pavietranaj prastory nie było. «Boinh-777» znachodziŭsia pa-za zonaj paražeńnia naziemnych srodkaŭ supraćpavietranaj abarony ŭzbrojenych sił Ukrainy, — zajaviŭ Ježal. — Užo na hetym etapie rasśledavańnia Ukraina maje ŭsie padstavy ličyć, što havorka idzie pra metanakiravanaje źbivańnie samalota pry dapamozie zienitna-rakietnaha kompleksu. Słužba biaśpieki Ukrainy apublikavała dokazy taho, što terarysty atrymali z Rasii zienitna-rakietny kompleks «Buk M-1» razam z ekipažam, što paćviardžajuć pierachoplenyja pieramovy terarystaŭ».
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary