Piać faktaŭ pra zvolnienaha siońnia Alaksandra Jakabsona

Siońnia Alaksandr Łukašenka zvolniŭ staršyniu Kamiteta dziaržkantrola Alaksandra Jakabsona. Paviedamlajecca, što jon budzie pieraviedzieny na inšuju pasadu. Vykonvajučym abaviazki staršyni KDK pryznačany Leanid Anfimaŭ.

Karenny hamialčuk

Jakabsonu 63 hady, jon naradziŭsia ŭ Homieli. Kažuć, što ŭ dobrym humory navat moh raskazać pra žyćcio na rodnaj vulicy Łaźnievaja Aleja (ciapier užo prosta Łaźnievaja). Potym vučyŭsia ŭ Biełaruskim instytucie inžynieraŭ čyhunačnaha transparta. Svojeasablivaja kuźnia kadraŭ — adtul vyjšli były premjer-ministr Siarhiej Sidorski, były staršynia KDB Leanid Jeryn, ministr transpartu Anatol Sivak. Adrazu pa skančeńni VNU Jakabson nakiravaŭsia na budaŭnictva Kandałakšskaha marskoha handlovaha portu ŭ savieckaje Zapalarje (Murmanskaja vobłaść).

Jon niekalki razoŭ pryznavaŭ, što jak haradski žychar nie zaŭsiody razumieŭ śpiecyfiku pracy na vioscy i sutykaŭsia ź sielskahaspadarčaj pradukcyjaj tolki na ŭzroŭni hatovaha tavaru. Tamu pierš-napierš na pasadzie staršyni Homielskaha abłvykankama jon zanuryŭsia ŭ vyvučeńnie sielskaj haspadarki.

Kiraŭnik «ŚNIDahorska»

Tak u pačatku 1990-ch časta nazyvali horad Śvietłahorsk. Alaksandr Jakabson na praciahu 11 hadoŭ uznačalvaŭ miascovy harvykankam (1986—1996). «Hety čas ja ŭspaminaju z asablivym trapiatańniem. Tam adbyvałasia majo staleńnie, hetyja hady ja liču najlepšymi ŭ svaim žyćci», — uzhadvaŭ Alaksandr Sierafimavič.

Małady horad Śvietłahorsk, jakomu na toj čas nie było i tryccaci hadoŭ (raniej na hetym miescy była vioska Šaciłki) staŭ centram biełaruskaj narkamanii. U horadzie dziejničali chimičny zavod, elektrastancyja, kardonny kambinat. Amal nie było pryvatnaha siektara. Ludzi pryjazdžali z roznych kancoŭ SSSR. Ličby 1996 hoda kazali, što ŭ Śvietłahorsku žyło amal 800 VIČ-infikavanych.

Jakabson, naturalna, sprabavaŭ razhaniać miascovyja prytony, ale nie zaŭsiody ŭdavałasia. Darečy, u namieśnikach Jakabsona ŭ Śvietłahorsku byŭ Uładzimir Patupčyk, jaki ciapier zajmaje pasadu ministra enierhietyki.

Nastupnik Vajciankova

U 2001 hodzie Alaksandr Jakabson uznačaliŭ Homielski abłvykankam. Uznačaliŭ paśla lubimaha ŭ narodzie kiraŭnika Mikałaja Vajciankova. Taho samaha Vajciankova, jaki nie prosta nie padtrymaŭ Łukašenku na vybarach 1994 hoda, ale i navat admoviŭsia sustrecca z takim kandydatam u prezidenty. Paśla Čarnobyla Vajciankoŭ byŭ siarod tych, chto rabiŭ usio, kab abaraniać ludziej ad durnych zahadaŭ z Maskvy i Minska. Tysiačy ludziej jamu za heta asabista ŭdziačnyja.

Tamu Jakabsonu było niaprosta zastavacca na ŭzroŭni papiarednika. Kažuć, što ŭ pracoŭnym kabiniecie Jakabsona doŭhi čas byŭ tolki stoł i šafa. Tolki ŭ apošni hod kiravańnia kabiniet značna pavialičyli, ustalavali dušavuju kabinku, novuju meblu. «Maje samapavahu i svaju pazicyju, zrazumieła, u ramkach sistemy», - kažuć pra jaho hamielčuki.

Zbolšaha vodhuki pra Jakabsona jak pra zvyčajnaha vykanaŭcu, a nie pra tvorčaha rabotnika. Niekalki razoŭ jon paźbiahaŭ sustrečaŭ ź jeŭrapiejskim inviestarami, aby čaho nie vyjšła. Sam Homiel Jakabson zrabiŭ dahledžanym, a voś pa vobłaści (asabliva ŭ zaražanych radyjacyjach rajonach) zastavalisia pytańni.

Postrach čynoŭnikaŭ

Apošnija amal čatary hady Alaksandr Jakabson pracavaŭ na pasadzie staršyni KDK. Z hetaj pasady jon moh navodzić strach na sotni arhanizacyj i ustanovaŭ krainy. Nie daj Boh dašluć pravierku!

Kali Łukašenka pramaŭlaŭ «imieniem revalucyi», to nastupnaja fraza najčaściej nakiroŭvałasia da Jakabsona, kab jahonaje viedamstva razabrałasia z parušeńniami, biezhaspadarlivaściu i nieachajnaściu. U rabočych pajezdkach kiraŭnika dziaržavy Jakabson zaŭsiody byŭ dzieści pa pravuju ci levuju ruku.

Zrešty, nie zaŭsiody byŭ u favory. Pa vynikach pracy pa madernizacyi «Barysaŭdreva» Jakabson atrymaŭ strohuju vymovu. Zrešty, inšyja stracili pasady i navat volu.

Časam Jakabson vystupaŭ u roli refarmatara. Naprykład, prapanoŭvaŭ pieravieści Minski abłvykankam u Zasłaŭje, a abituryjentam prapanoŭvaŭ zdavać čatyry ekzamieny zamiest troch ciapierašnich. A voś padčas valutnaha kryzisu 2011 hoda nie znajšoŭsia skazać ničoha inšaha, aproč: «Tut treba štości rabić».

Syn u «Biełarusnafcie»

Na minułym tydni ŭ Alaksandra Jakabsona pamierła žonka, Halina Kałatuchina. Mahčyma, za hetym i chavajecca adstaŭka kiraŭnika KDK.

Syn Alaksandra Sierafimaviča Taras Jakabson zajmaje pasadu namieśnika dyrektara «Biełarusnafta-Naftachimprajekt», raniej jon uznačalvaŭ Minskaje abłasnoje adździaleńnie kampanii.

• 0
• 0
• 0
• 0
• 1
• 0