Pamior brytanski śpiavak, kampazitar i hitaryst Krys Ry — aŭtar viadomaha chita The Road to Hell. Muzyku było 74 hady. Pra jaho śmierć paviedamiŭ pradstaŭnik siamji, adznačyŭšy, što Krys Ry pamior u balnicy paśla niepraciahłaj chvaroby.
Krys Ry naradziŭsia ŭ 1951 hodzie ŭ horadzie Midłsbra ŭ siamji ź itała-irłandskimi karaniami. Muzykaj jon pačaŭ zajmacca ŭ 1970‑ch hadach, a sapraŭdnuju suśvietnuju papularnaść zdabyŭ naprykancy 1980‑ch — u pačatku 1990-ch. Za svaju karjeru artyst vypuściŭ 25 studyjnych albomaŭ, ahulny nakład jakich pieravysiŭ 30 miljonaŭ kopij va ŭsim śviecie.
Da najbolš viadomych piesień Krysa Ry adnosiacca The Road to Hell, Driving Home for Christmas, On the Beach, Josephine, Fool (If You Think It's Over) i Auberge. Kampazicyja Driving Home for Christmas ź ciaham času stała adnoj z samych papularnych kaladnych piesień u Vialikabrytanii.
Najvyšejšaha kamiercyjnaha pośpiechu muzyka dasiahnuŭ u kancy 1980-ch: albomy Dancing with Strangers, The Road to Hell i Auberge zajmali vierchnija radki brytanskich chit-paradaŭ, pryčym dva ź ich uznačalvali rejtynhi prodažaŭ. U 2000‑ch hadach Krys Ry ŭsio bolš zasiarodžvaŭsia na bluzavym hučańni.
U apošnija hady žyćcia muzykant mieŭ surjoznyja prablemy sa zdaroŭjem. U pačatku 2000‑ch u jaho vyjavili rak padstraŭnikavaj załozy, a ŭ 2016 hodzie jon pieranios insult.
Kamientary