Amierykanski ekśpierymientalny preparat Zmapp, stvorany dla lačeńnia lichamanki Eboła, prajšoŭ teściravańnie na małpach i pakazaŭ stoadsotkavuju efiektyŭnaść, u tym liku na paźniejšych etapach zachvorvańnia, paviedamlajuć infarmahienctvy.
U chodzie teściravańnia preparata ŭsie 18 makak, zaražanyja Ebołaj, vyžyli. Žyvioły prymali Zmapp praź piać dzion paśla zaražeńnia virusam. Dla małpaŭ heta dosyć poźniaja stadyja zaražeńnia — virus robicca śmiarotnym praz try dni. Navukoŭcy ličać, što heta surjozny pakazčyk, pakolki raniej lačeńnie nieabchodna było pačynać jašče da źjaŭleńnia simptomaŭ.
Hary Kobinhier z Ahienctva hramadskaj achovy zdaroŭja Kanady, jaki ŭvachodziŭ u hrupu daśledčykaŭ, skazaŭ, što novyja pošuki źjaŭlajucca vielizarnym krokam u stvareńni patrebnaha spałučeńnia antyciełaŭ. «Vyniki pieraŭzyšli ŭsie maje čakańni. Mianie ździviła, što lepšaje spałučeńnie vyratavała žyvioł, jakija chvareli ŭžo cełych piać dzion. Heta cudoŭna, — adznačyŭ jon. — Charakterna, što nam udałosia vyratavać niekatorych žyvioł z najbolš zapuščanaj stadyjaj zachvorvańnia».
Pavodle dadzienych SAAZ, u Zachodniaj Afrycy śmiarotnym virusam mohuć zarazicca bolš za 20 tys. čałaviek. Z-za abmiežavanych zapasaŭ lekaŭ prajści lačeńnie atrymajecca nie ŭsim. Zmapp nazyvajuć «sakretnaj syrovatkaj», tamu što jon pa-raniejšamu znachodzicca ŭ stadyi raspracoŭki. Až da niadaŭniaha času efiektyŭnaść prymianieńnia vakcyny na ludziach była nieviadomaja. Miedyki źviarnulisia da jaje, pakolki inšaha preparata dla lačeńnia virusa Eboła, ad jakoha zahinuli ŭžo bolš za 1,5 tys. čałaviek, niama. Ź siami čałaviek, jakija prymali preparat, dvoje pamierli, nie zdoleŭšy pieramahčy virus. U chodzie ekśpierymientaŭ pa lačeńni virusa Eboła daśledčyki vyvučali ŭździejańnie roznych spałučeńniaŭ antyciełaŭ.
Raźvićcio infiekcyi ŭ ludziej prachodzić bolš pavolna, čym u žyvioł, tamu daśledčyki aściarožna vykazali zdahadku, što srodak moža być efiektyŭny dla čałavieka i na dziaviaty, i navat adzinaccaty dzień paśla zaražeńnia.
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal2
Kamientary