Amierykanski kanatachodziec i akrabat Nik Valenda na vačach u tysiačaŭ ludziej prajšoŭ pa trosie, naciahnutym pamiž chmaračosami ŭ Čykaha. Častku maršrutu jon pieraadoleŭ biez strachoŭki z zaviazanymi vačyma.
35-hadovy himnast, čyje truki ŭžo šeść razoŭ zanosilisia ŭ Knihu rekordaŭ Hiniesa, spačatku prajšoŭ pa trosie, jaki złučaje dźvie viežy na roznych bierahach raki (jana, jak i horad, nazyvajecca Čykaha).
Druhaja častka šlachu była karaciejšaja — tros pamiž viežami kompleksu budynkaŭ «Maryna-sici» na paŭnočnym bierazie raki Čykaha. Tut Valenda nadzieŭ na vočy paviazku i admoviŭsia ad strachoŭki.
Nad rakoj jon prajšoŭ za 6 chvilin 52 siekundy. Pry hetym kanatachodziec znachodziŭsia na vyšyni zvyš 150 mietraŭ, vytrymlivajučy paryvy vietru da 40 km/h. Tros byŭ naciahnuty pad nachiłam u 17 hradusaŭ.
Adlehłaść pamiž viežami «Maryna-sici» Valenda pieraadoleŭ za adnu chvilinu 17 siekund.
Truki tranślavalisia ŭ pramym efiry telebačańnia z 10-siekundnaj zatrymkaj — na vypadak, kali niešta pojdzie nie tak.
Na ziamli Valendu — himnasta ŭ siomym pakaleńni — vitali tysiačy ludziej.
Na pres-kanfierencyi jon adkazvaŭ na pytańni žurnalistaŭ, nie zdymajučy paviazki z vačej.
Pieršyja kroki pa kanacie himnast zrabiŭ va ŭzroście dvuch hadoŭ. U 2013 hodzie jon pierasiok Vialiki kańjon pa trosie, naciahnutym na vyšyni bolš za 450 mietraŭ.
Kamientary