Hramadzianina Litvy vinavaciać u špijanažy na karyść Biełarusi: cikaviŭ kantrol pavietranaj prastory
Hramadzianinu Litvy vystaŭlena abvinavačvańnie ŭ špijanažy.
Pra heta paviedamiła ŭ paniadziełak Hienieralnaja prakuratura krainy. Kryminalnaja sprava pieradadzienaja ŭ Vilenski akruhovy sud paśla praciahłaj raźviedapieracyi Departamienta dziaržbiaśpieki (DDB), piša ru.delfi.lt.
Abvinavačany nazyvajecca inicyjałami R. Ł. U vyniku raźviedvalnaj apieracyi było vyjaŭlena, što
jon źbiraŭ sakretnuju infarmacyju na karyść Biełarusi. Infarmacyja nie była źviazanaja z palitykaj ci palitykami.
Siońnia ŭ Hienprakuratury Litvy adbyłasia pres-kanfierencyja z hetaj nahody. Raspavieści pra rezanansnyja padziei pryjechali hienieralny dyrektar Departamienta dziaržbiaśpieki Litvy (DDB) Hiedymin Hryna i namieśnik hienprakurora Darus Raŭłušajcis.
«Abvinavačvańni ŭ špijanažy byli pradjaŭlenyja hramadzianinu Litvy, jakoha abvinavačvajuć u špijanažy na karyść Biełarusi, pa zadańni biełaruskich śpiecsłužbaŭ. Hety čałaviek pracavaŭ u adnoj z kampanij, źviazanych z kiravańniem palotami», — zajaviŭ Raŭłušajcis.
«Interfaks» paviedamlaje, što padazravany pracavaŭ dyśpietčaram u kampanii Oro navigacija. U svaim kabiniecie jon fatahrafavaŭ słužbovyja dakumienty i abjekty, a paśla pieradavaŭ Hałoŭnamu raźviedvalnamu ŭpraŭleńniu Hienštaba US Biełarusi.
Pavodle słoŭ Raŭłušajcisa, zatrymany jašče adzin čałaviek. Ale pakul viadziecca rasśledavańnie ŭ adnosinach da jaho. Miarkujecca, što i druhaja sprava nieŭzabavie apyniecca ŭ sudzie. Pa słovach Raŭłušajcisa, padazravanych u špijanažy cikaviła infarmacyja jak hramadzianskaj, tak i vajskovaj avijacyi.
Kiraŭnik DDB Hiedymin Hryna skazaŭ žurnalistam, što apieracyja doŭžyłasia try hady, a moža i bolš.
«Heta była dosyć składanaja apieracyja. Raźviedčykam pryjšłosia prajavić mudraść padčas hetaj apieracyi», — skazaŭ jon.
Načalnik Litoŭskaha biuro kryminalnaj palicyi Rałandas Kiškis zajaviŭ, što sabrana dastatkova źviestak dla dokazu faktu špijanažu.
DDB dadaje, što heta pieršaja takaja sprava, jakaja pieradadziena ŭ sud paśla taho, jak u siłu 1 studzienia 2013 hoda ŭstupiŭ u siłu zakon ab raźviedcy.
Chto toj nieadekvatny biełarus, jaki lasnuŭ dziciatka hałavoj ab padłohu ŭ maskoŭskim Šaramiećcievie8
Kamientary