HUUS Minharvykankama nie ličyć, što byli parušanyja pravy žurnalistaŭ, zatrymanych i źmieščanych u śpiecprymalnik na Akreścina ŭ kancy sakavika. Heta vynikaje ź lista, jaki HA «Biełaruskaja asacyjacyja žurnalistaŭ» atrymała ad namieśnika načalnika HUUS Minharvykankama A. Najdzienki ŭ adkaz na svaju skarhu ad 24 sakavika.
«Dovady, pryviedzienyja ŭ skarzie, źjaŭlajucca nieabhruntavanymi, tamu što niezaležna ad taho, chto i kali byŭ zatrymany i pryciahnuty da administratyŭnaj adkaznaści i pa pastanovie suda padvierhnuty administratyŭnamu aryštu, karystajucca roŭnymi pravami i vykonvajuć abaviazki administratyŭna aryštavanych asobaŭ», - havorycca ŭ liście sp. Najdzienki. Jon śćviardžaje, što ŭsie zatrymanyja z 21 da 24 sakavika źmiaščalisia ŭ śpiecprymalnik tolki pry najaŭnaści ŭsioj nieabchodnaj dakumientacyi. Namieśnik načalnika HUUS zapeŭniŭ taksama, što administracyja ASPR (abjadnanaha śpiecprymalnika-raźmierkavalnika) napraciahu sutak painfarmavała blizkich zatrymanych, jakija pahadzilisia padać źviestki ab takich. «Taksama jany byli zabiaśpiečanyja haračym charčavańniem i materyjalna-bytavym zabieśpiačeńniem pa vyznačanych normach..., byli zabiaśpiečanyja spalnym miescam, hazietami, časopisami, karystalisia ŭłasnaj vopratkaj pa siezonie, mieli pry sabie pradmiety asabistaj hihijeny, miedykamienty i inšyja lekavyja preparaty», - havorycca ŭ pasłańni.
Nahadajem, što 24 sakavika BAŽ nakiravaŭ načalniku śpiecprymalnika na Akreścina, načalniku HUUS Minharvykankama, a taksama prakuroru h. Minska z patrabavańniem pryciahnuć da adkaznaści asobaŭ, vinavatych u parušeńni pravoŭ zatrymanych i aryštavanych žurnalistaŭ. BAŽ źviartaŭ uvahu na šmatlikija parušeńni, dapuščanyja ŭ pracesie zatrymańnia žurnalistaŭ i inšych hramadzian: źmiaščeńnie ŭ śpiecpryjomnik biez adpaviednaj dakumientacyi; adsutnaść svoječasovaj infarmacyi pra ich miescaznachodžańnie; parušeńnie normaŭ umovaŭ utrymańnia ludziej; kiepskaja praca sistemy pieradačy asabistych rečaŭ i praduktaŭ charčavańnia zatrymanym.
Ad kiraŭnictva śpiecprymalnika, a taksama z prakuratury h. Minska adkazaŭ arhanizacyja pakul nie atrymała.
Pres-słužba HA «Biełaruskaja asacyjacyja žurnalistaŭ»
Kamientary