Čarhiniec pieradaść adsudžanyja ŭ "Novaha času" hrošy psichijatryčnym lačebnicam

Pra heta jon zajaviŭ na pres-kanferencyi 3 studzienia.

Pa słovach senatara, ideju jamu padkazali publikacyi "Narodnaj voli".

Nahadajem, što 20 śniežnia sud zadavoliŭ pazoŭ Mikałaja Čarhinca da hazety "Novy čas" i žurnalista Alaksandra Tamkoviča ab abaronie honaru i hodnaści.

Pavodle rašeńnia Pieršamajskaha suda Minska pryvatnaje pradpryjemstva «Čas navinaŭ» musić vypłacić deputatu Savietu Respubliki 50 młn. rubloŭ, žurnalist Alaksandr Tamkovič — 1 młn. rubloŭ.

***

Stenahrama pres‑kanferencyi deputata Savietu Respubliki i staršyni sajuzu piśmieńnikaŭ Mikałaja Čarhinca.

— Spadar Čarhiniec, jak vy aceńvajecie niadaŭnija zajavy pasła ZŠA ŭ Biełarusi Karen Stjuart ab tym, što Ameryka hatovaja pavialičyć sankcyi suprać Biełarusi, a taksama reakcyju Alaksandra Łukašenki na hetyja zajavy?

Słovy našaha prezydenta Alaksandra Łukašenki ŭ dačynieńni ZŠA — heta apošniaja pieraściaroha. ZŠA zajmaje ŭ dačynieńni da Biełarusi takuju pazycyju, jak da nieraźvitych krain. U adnosinach da Biełarusi takaja pazycyja nia projdzie. Nia treba zabyvacca, što Biełarusi i ZŠA źjaŭlajucca suzasnavalnikami AAN. Nia tak užo i šmat takich krain. My pavinny znachodzić pamiž saboj niejkija inšyja słovy, kab budavać adnosiny. Druhi punkt: pamiatajecie, kali Biełaruś vyvodziła z svajoj terytoryi jadziernuju zbroju, ZŠA abiacała, što harantuje, kab nichto nie prymianiaŭ suprać nas, u tym liku i jany sami, nijakich ekanamičnych sankcyj. Tady ž havorka išła ab ahramadnaj kolkaści rakiet ź jadziernymi bajehałoŭkami, u tym liku 81 mižkantynentalnaj balestyčnaj rakiecie. Hetyja rakiety byli nakiravanyja, kaniečnie ž, nie na bližejšych susiedziaŭ. Biełaruś nie atrymała za heta ni centu, chacia mahła patrabavać miljardy. Ciapier ZŠA na tyja damoŭlenaści naplavała. Zroblena heta praz toje, što ŭ Vašynhton pryjaždžajuć piać‑šeść našych tak zvanych apazycyjaneraŭ, ja kažu «tak zvanych», bo pavažaju apazycyjaneraŭ, jakija zmahajucca za intaresy svajoj krainy, a nie patrabujuć uvieści suprać nas ekanamičnyja sankcyi. Kali ŭ nas zdarajecca niejkaja biada, to hladzicie, što pišacca ŭ apazycyjnaj presie, jakaja finansujecca z Zachadu, jany hetamu tolki rady. ZŠA čamuści nie padabajecca, što Biełaruś buduje adnosiny z Venesuełaj. Pasoł ZŠA, na žal, zanadta dapytlivaja dama, jakaja ŭłazić u našy ŭnutranyja spravy. Jana z asałodaj naziraje za roznymi pratestami i manifestacyjami ŭ krainie, nibyta takich niama ŭ Ńju‑Jorku ci Vašynhtonie. Było skazana: spadarstva, pavodźcie siabie prystojna, jak hetaha patrabujuć dyplamatyčnyja normy. Ja nia dumaju, što sprava dojdzie da adklikańnia pasła. My za supracoŭnictva z ZŠA, kab narešcie pieramoh zdarovy sens u našych adnosinach.

— Ci jość u Vas spadziavańni, što adnosiny miž Biełaruśsiu i ZŠA vyjduć na inšy ŭzrovień paśla prezydenckich vybaraŭ za akijanam?

— My hatovyja da palapšeńnia adnosinaŭ va ŭsich nakirunkach užo ciapier. Mahu śmieła zajavić, što prezydent Biełarusi choča taho samaha. A toje, što my čakajem palapšeńnia ŭ adnosinach paśla prezydenckich vybaraŭ u ZŠA — heta praŭda. Razumiejecie, mieć spravu z čałaviekam, jaki nie zaŭsiody adkaža na pytańnie, dzie znachodzicca taja Biełaruś, ciažka. Ja spadziajusia, što siła zdarovaha rozumu, raŭnavahi, jakija ŭłaścivyja amerykancam, pieramoža ŭ elektaracie hetaj krainy. My nie vysoŭvajem ZŠA nijakich umovaŭ, my praciahvajem im ruku i kažam, što chočam ź imi siabravać. Prosta vybrany amerykancami prezydent akazaŭsia niaŭdačnikam u mižnarodnych adnosinach, my pierakanalisia ŭ hetym na prykładzie Iraku i Aŭhanistanu.

— Kudy Vy źbirajeciesia patracić hrošy, jakija vyjhrali na sudzie ŭ hazety «Novy čas»?

— Ja nikoli nia dumaŭ prysvojvać sabie hetyja srodki. Jany pojduć na lačeńnie ŭ psijachijatryčnyja špitali. I nie ad taho, što ja niekaha chaču ŭkałoć. U mianie z saboj hazeta «Narodnaja vola», dzie napisana, što ŭ Biełarusi jość prablemy ź lačeńniem psichična chvorych. Hety artykuł i padkazaŭ mnie, kudy addać hrošy. Ja nie zadavoleny, što ŭ nas jość žurnalisty, jakija hublajuć pačućcio miery i sumleńnia. Kali paraŭnoŭvać Čarhinca z Tamkovičam, to pakul jon vučyŭsia ŭ palityčnaj vučelni ŭ Lvovie, ja vajavaŭ u Aŭhanistanie. Na žal, i Karol sa svajoj hazetaj ulez u hetuju spravu, niahledziačy na toje, što jon užo visieŭ na vałasku takoj spravy za paklop. Adnak ja jamu daravaŭ tady. Ja nie chaču zakryć hazetu, niachaj jana pracuje, kali łaska. Ale treba mieć elementarnaje pačućcio sumleńnia.

— Mikałaj Ivanavič, u jakim stanie siońnia znachodzicca Kanstytucyjny akt sajuznaj dziaržavy Biełarusi i Rasiei?

Papraŭdzie kažučy Kanstytucyjnyja akty — heta moj niejki dušeŭny bol. Ja ŭdzielnik usich rabočych hrup pa padrychtoŭcy Kanstytucyjnych aktaŭ. Spačatku jon stvaraŭsia ŭ ramkach parlamentaŭ Biełarusi i Rasiei, paśla ŭ ramkach kožnaj z krain, zatym — stvaryli niejki symbijoz z papiarednich hrup, a ŭžo zatym dva prezydenty stvaryli rabočuju hrupu. My pracavali vielmi praduktyŭna, bo mieli dobryja napracoŭki. Ja liču, što my padrychtavali vielmi dobry Kanstytucyjny akt. Tam zastałosia niekalki niavyśvietlenych momantaŭ, jakija buduć rašać sami kiraŭniki dziaržaŭ. Heta pytańnie, kamu kiravać sajuznaj dziaržavaj: prezydentu ź vice‑prezydentam, ci pakinuć vyšejšy saviet, jak ciapier, ci prydumać jašče niešta. I druhoje pytańnie: adziny emisijny centar. Ja liču, što hetyja pytańni nie takija ŭžo składanyja. Ciapier da vybaraŭ prezydenta ŭ Rasiei, pytańnie aktu vyrašacca, jasnaja sprava, nia budzie. Sioleta my, mahčyma, užo da toj kroki paśla jakoj darohi nazad niama. Na heta treba spadziavacca.

Źmicier Pankaviec

• 0
• 0
• 0
• 0
• 0
• 0
• 0
• 0