Rasijanie ŭ Danbasie cisnuć na ŭsim froncie, ukraincy pakinuli 31-y błokpost
«Kali nie daj Boh, u Čarnihaŭskaj vobłaści abo ŭ Charkaŭskaj źjavicca choć adna bataljonna-taktyčnaja hrupa, budzie abjaŭlena vajna Rasii».
Pad ahniom rasijskich tankaŭ i artyleryi ŭkrainskija vojski vymušany byli pakinuć 31-y błokpast, što na Bachmuckaj trasie ŭ Łuhanskaj vobłaści. Jany adstupili na zapasnyja apornyja punkty. Bai ŭ rajonie Bachmutki praciahvajucca, u tym liku ŭ rajonach 29-ha i 30-ha błokpastoŭ.
Intensiŭnyja pierastrełki adbyvalisia taksama ŭ rajonach Daniecka, Maryupala.
Načalnik Hienštaba — hałoŭnakamandujučy Uzbrojenymi Siłami Ukrainy hienierał-pałkoŭnik Viktar Muženka, znachodzicca ŭ zonie bajoŭ i praciahvaje kiravać padraździaleńniami VSU, paviedamlajuć ukrainskija ŚMI.
U aeraporcie Daniecka ŭ vyniku bajavych dziejańniaŭ całkam źniščanaja uźlotna-pasadačnaja pałasa. Žorstkija bai tam praciahvajucca.
U «DNR» zajavili, što ŭ pałon uziatyja vosiem ukrainskich bajcoŭ. Taksama śćviardžajecca, što «DNR» uziała pad svoj kantrol Piaski — klučavy punkt na šlachu ŭ aeraport.
U Kijevie ani paćvierdzili, ani abvierhli hetuju infarmacyju. Tam havorać, što pierakinuli ŭ aeraport padmacavańni.
«Infarmacyju pra pałonnych abo paranienych i zahinułych my ciapier udakładniajem, adnak ciapier pra heta skazać nie možam». «Tam ciapier iduć bai, tamu ŭziać adtul infarmacyju, jakaja adpaviadaje rečaisnaści… heta značyć, kali ja zaraz skažu, praz chvilinu moža być zusim inšaje. Davajcie dačakajemsia, kali hetaja apieracyja budzie zavieršana. My ich spynim, kab była niejkaja pieradyška padvieści vyniki», — skazaŭ śpikier antyterarystyčnaj apieracyi Andrej Łysienka.
Staršynia parłamienckaha kamiteta pa pytańniach nacbiaśpieki i abarony Siarhiej Pašynski zajaviŭ, što Ukraina hatovaja ŭvieści vajennaje stanovišča, ale heta pakul nie aktualna.
Pra heta jon skazaŭ u intervju «Piatamu kanału» ŭ aŭtorak viečaram.
«Što daść vajennaje stanovišča ŭ vajenna-palityčnym stanie? Z punktu hledžańnia mabilizacyi — ničoha. Z punktu hledžańnia najaŭnaści tankaŭ ŭ nas… Kali my abjavim vajennaje stanovišča, u nas što bolš tankaŭ stanie?» — skazaŭ Pašynski.
«Nam MVF jak vajujučaj krainie skaža, što hrošaj nie damo, tamu što jość statut Mižnarodnaha valutnaha fondu. My vielmi majem patrebu zaraz finansavaj dapamohi», — dadaŭ jon.
U toj ža čas, pa słovach Pašynskaha, užo ŭsie nieabchodnyja rašeńni dla abjavy vajennaha stanovišča jość, jany «padpisanyja i zapiačatanyja ŭ kanvierty».
«Kali nie daj Boh, u Čarnihaŭskaj vobłaści abo ŭ Charkaŭskaj źjavicca choć adna bataljonna-taktyčnaja hrupa, budzie abjaŭlena vajna Rasii, ale heta nie toj scenar, pra jaki my pavinny maryć», — skazaŭ jon.
Što zapisana aficyjnaj pryčynaj śmierci adzinaha syna Jarmošynaj?9
Kamientary