Biełaruski imihrant Aleh Tałamaj, jaki pamior 9-ha studzienia ad čerapna-mazhavoj traŭmy ŭ Apała-Alta, papłaciŭsia žyćciom z-za sprečki z nahody rasiejska-ŭkrainskaha kanfliktu, paviedamlaje sa spasyłkaj na siabroŭ achviary SlavicSac.
Jak piša vydańnie Mercury News, Aleh Tałamaj naradziŭsia 20-ha žniŭnia 1990 ŭ Biełarusi. Ź siami hadoŭ jon braŭ udzieł u adukacyjnych prahramach u ZŠA. Maryŭ stać prafiesijnym hulcom u tenis. U 2012 h. u čarhovy raz pryjechaŭ u ZŠA, kab ździejśnić svaju amierykanskuju maru. Nieŭzabavie staŭ instruktaram u Akademii tenisa ŭ Apała-Alta.
Pavodle raparta palicyi, nočču 21 śniežnia 2014 h. u bary The Patio, u centry horada, Aleh i jaho siabar pasvarylisia z kampanijaj z 4-ch miascovych žycharoŭ. U sprečku ŭmiašałasia słužba biaśpieki i palicyja. Adnak praź niekatory čas mužčyny sutyknulisia na vulicy, zaviazałasia bojka. 28-hadovy Nił Brajan Rotraf udaryŭ Aleha Tałamaja ŭ tvar i pavaliŭ jaho na ziamlu. U vyniku biełarus atrymaŭ ciažkuju čerapna-mazhavuju traŭmu — pierałom kostak čerapa, i straciŭ prytomnaść. Prabyŭšy 19 dzion u komie, Aleh pamior nie ačuniaŭšy.
Pa słovach detektyvaŭ, jakija rasśledujuć spravu, adrazu paśla bojki dvoje padazravanych sprabavali źbiehčy, pakinuŭšy cieła paciarpiełaha na tratuary. Ich dziejańni byli zapisanyja na kamieru videanazirańnia, ustalavanuju ŭ pryparkavanaj pobač palicejskaj mašynie. Paśla śmierci Aleha miascovyja pravaachoŭnyja orhany abvinavacili ŭ nienaŭmysnym zabojstvie i saŭdziele ŭ ciažkim złačynstvie Rotrafa i jaho 21-hadovaha pryjaciela Akšaja Mastakara z Saniviejła. Abvinavačvańnie prahučała ŭ sudzie ŭ aŭtorak.
Jak paviedamlaje Mercury News, Mastakar abvinavačvajecca ŭ pieraškodzie aryštu złačynca. Rotraf i Mastakar vypuščanyja pad zakład. Dvoje inšych udzielnikaŭ zdareńnia, imiony jakich pakul nie raskryvajucca, nie zatrymlivalisia. Supracoŭniki Akademii tenisa abviaścili zbor srodkaŭ na transparciroŭku cieła zahinułaha ŭ Biełaruś, «kab jaho mahli pachavać pobač z baćkam». Pavodle sajtu hramadskaha fandrejzinha Go Fund Me, z patrebnych $ 15 tys. užo sabrana bolš za 11 tysiač dalaraŭ.
Aleh Tałamaj zajmaŭsia tenisam na radzimie, hulajučy va ŭniviersiteckaj zbornaj, byŭ pamočnikam treniera kamandy Kubka Devisa ŭ Biełarusi. U Akademii Apała-Alta jon staŭ adnym z samych zapatrabavanych trenieraŭ. Jaho vychavancy vykazvajucca pra jaho vielmi dobra i prosta nie ŭjaŭlajuć svaje treniroŭki bieź lubimaha treniera.
Kamientary