Tam pabyvaŭ i nam napisaŭ minski student Raman Łatuška.
Horad, viadomy ŭsim nam z padručnikaŭ pa Historyi Biełarusi. Mienavita tut u 1569 hodzie była padpisanaja unija, što abjadnała Vialikaje kniastva Litoŭskaje i Polskaje Karaleŭstva ŭ adnu vialikuju dziaržavu Reč Paspalituju, miežy jakoj abmyvali adnačasova dva mory – Bałtyjskaje i Čornaje. Lublin – dobry varyjant jak dla baŭleńnia kanca tydnia niepadalok ad Biełarusi.
#1. Siaredniaviečnyja Krakaŭskaja, Rybnaja i Haradskaja bramy, Karonny trybunał u atačeńni aŭtentyčnych kamianic — ad ratušy da staražytnaha zamku brukoŭkaj starych lublinskich vulic adbivajecca recha praŭdzivaj daŭniny.
Ažyŭlenaść žyćciu Staroha horada nadaje nieźličonaja kolkaść utulnych restaracyj i kaviarniaŭ, dzie padajuć tradycyjnyja polskija žurek i kapytki dy varać firmovyja hatunki piva.
#2. Sietka padvałaŭ, jakija niekali mieli pramoje haspadarčaje pryznačeńnie, ciapier ujaŭlajuć saboj pryvabnuju turystyčnuju padziemnuju trasu pad samym Starym horadam.
Vandroŭka sutareńniami staražytnaha Lublina znajomić sa šmatviekavoj historyjaj horada. Naprykład, źniščalny pažar 1719 hoda pradstaŭleny ŭ vyhladzie vidoviščnaj, kštałtu batleječnaj, pastanoŭki.
#3. Adnym z napraŭdu najkaštoŭniejšych pomnikaŭ siaredniaviečanaha mastactva nie tolki Polščy, ale i Jeŭropy ŭ cełym, źjaŭlajecca kaplica Śviatoj Troicy ŭ Lublinskim zamku. Ścieny nievialikaha kaściołu ŭpryhožvajuć daŭnija ruska-vizantyjskija freski časoŭ Jahajły.
Asablivaść kultavaj pabudovy hruntujecca jakraz na jadnańni zachodniaj katalickaj i ŭschodniaj pravasłaŭnaj chryścijanskich tradycyj. Napaminkam pra padpisańnie Lublinskaj unii zastaŭsia śled niavinnaha vandalizmu adnaho z udzielnikaŭ tych padziej Piatra Jažeŭskaha, jaki nadrapaŭ na ścianie kaplicy svajo imia i proźvišča, a taksama datu.
#4. Z ahladavaj placoŭki, što na viaršyni nieahatyčnaj Trynitarskaj viežy, adkryvajecca najpryhažejšy panaramny vid na stary Lublin.
Kab adoleć vyšyniu ŭ 40 mietraŭ, nieabchodna ŭźniacca na cełych 207 prystupkaŭ. U kompleksie ž zamkavych pabudoŭ raźmieščany jašče adzin dobry punkt dla ahladu horada źvierchu — vieža-danžon XIII stahodździa, nakštałt našaj Kamianieckaj. Nie mienš vykštałcona siaredniaviečny Lublin vyhladaje ŭ łahodnych promniach viečarovaha sonca z uzhorku Čvartak, dzie mieścicca kaścioł Śviatoha Mikałaja.
#5. U adnoj z vystavačnych załaŭ Lublinskaha zamku ekspazicyjanujecca badaj najviadomiejšy tvor pendźla vybitnaha polskaha mastaka XIX stahodździa Jana Matejki «Lublinskaja unija», napisany z nahody 300-hodździa stvareńnia dziaržavy «abodvuch narodaŭ».
Spraŭdžany šedeŭr aŭtara cełaj nizki karcin na histaryčnuju tematyku ašałamlaje svajoj maštabnaściu dy vieličču vyjaŭleńnia, padobna «Hrunvaldskaj bitvie», vystaŭlenaj u Karaleŭskim zamku ŭ Varšavie.
#6. Poŭnaja cikavostak i centralnaja vulica Lublina Krakaŭskaje pradmieście, jakaja źmiaściła ceły šerah architekturnych pomnikaŭ.
Heta i hustoŭna azdoblenyja kamianicy, i budynak Novaj Ratušy, i niekalki starych kaściołaŭ. Dobry kavałak Krakaŭskaha pradmieścia źjaŭlajecca vyklučna piešachodnaj zonaj z raznastajnymi kaviarniami i kramami. Sudakranajecca vulica i sa znakavaj Litoŭskaj płoščaj, na jakoj ustalavany pomnik Lublinskaj unii. Manumient pryznany na ŭzroŭni Jeŭrasajuza simvałam jeŭrapiejskaj spadčyny.
#7. Naviedvajučy Lublin abaviazkova treba skaštavać najbolš viadomy miascovy łasunak cybulaž, jaki ŭjaŭlaje saboj prasianuju bułku, pakrytuju sumieśsiu cybuli z makam.
Taksama Lublinščyna słavicca svaimi ałkaholnymi napojami — harełkaj Lubelska z samymi roznymi smakami (žuravinavym, parečkavym i navat ananasavym), pitnym miodam APIS dy pivam Perła.
#8. Lublin — horad studentaŭ. Kožnuju vosień z nadychodam navučalnaha hodu jaho nasielnictva pavialičvajecca ledź nie ŭtraja. I biełarusaŭ u tym liku možna sustreć siarod studentaŭ prestyžnych Lublinskaha ŭniviersiteta Maryi Składoŭskaj-Kiury abo Lublinskaj palitechniki.
Cikava, što mienavita ŭ Lublinie praciahły čas pracavaŭ na vykładčyckaj pasadzie Karal Vajtyła, budučy Papa Rymski Jan Pavieł II, imia jakoha ciapier nosić tutejšy Katalicki ŭniviersitet.
#9. Na dziva, Lublin — adzin z usiaho troch polskich haradoŭ, aprača Hdyni i Tychaŭ, vulicami jakoha kursujuć tralejbusy.
Hetaj akaličnaściu ŭdała skarystalisia miascovyja ŭłady, što stvaryli admysłovy turystyčny maršrut, pa jakim zapuścili stareńki saviecki ZiU. Pa darozie ž ekskursavod raspaviadaje pra architekturnyja pomniki, jakija minaje tralejbus.
#10. U horadzie, suvymiernym pa kolkaści nasielnictva ź biełaruskimi Mahilovam abo Viciebskam, znachodzicca adrazu niekalki bujnych handlova-zabaŭlalnych centraŭ.
Adnym z najbolš papularnych źjaŭlajecca raźmieščany niepadalok ad histaryčnaha centru Lublin Plaza. Pamiž šopinham pa kramach viadomych jeŭrapiejskich brendaŭ (H&M, Promod, Wrangler, Boss) jość mažlivaść vypić dobraj kavy sa smačnymi pirožnymi ŭ Coffeehaven albo zhadać smak «rurki» ci «hofraŭ» z uźbitymi viarškami dy fruktami.
Aprača «horada natchnieńnia», jak naŭściaž pazycyjanuje siabie Lublin, na adlehłaści ŭ hadzinu-paŭtary ad jaho ciahnikom albo aŭtobusam znachodziacca jašče kolki nieabyjakich turystyčnych miaścinaŭ, jakija varta ŭcisnuć ŭ svoj płan padarožža. Viadziecca najpierš pra «piarlinu Reniesansu» Zamaść, horad, uniesieny ŭ śpis suśvietnaj spadčyny JUNIESKA. Albo nievialiki, raźmieščany na ŭzhorystaj miascovaści la bierahu Visły Kazimiež-Dolny. Taksama nie mienš natchniaje i pabudavany ŭ francuzskim styli pałacava-parkavy ansambl Zamojskich u Kazłoŭcy.
Kazimiež-Dolny.
Karysnyja parady:
▪ zavitajcie ŭ centr turystyčnaj infarmacyi (ul. Jezuicka 1/3), dzie možna zadarma atrymać kartu horada i kolki kalarovych brašur, prydbać čarhovy mahnicik na ladoŭniu albo ŭziać rovar naprakat;
▪ šmat cikavaj infarmacyi pra horad, jaho kulturnaje i turystyčnaje žyćcio možna znajści na www.lublintravel.pl;
▪ złaviŭšy akcyju ad polskich aŭtobusnych pieravozčykaŭ ŭsiaho za 1 złoty ź Lublina možna dajechać da Varšavy ci Žešuva (polskibus.com) albo Krakava (tanibus.com).
Adlehłaść:
Brest -> Lublin – kala 170 km.
Jak dabracca?
▪ tudy:
aŭtobus «Brest–Lublin»,
sr., pt., nd.: 14:50-16:40;
pt, nd: 8:00-9:50,
košt – 200 000 / 40 złotych;
▪ nazad:
aŭtobus «Lublin–Brest»,
pt., nd.: 16:00-21:50;
sr., pt., nd.: 6:00-11:50,
košt – 200 000 / 40 złotych.
Nabyć kvitki anłajn možna na ticketbus.by i brest-lublin.pl.
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść32
Kamientary