Samuju pilnuju ŭvahu treba nadać praktyčnamu navučańniu Uzbrojenych sił sučasnym sposabam viadzieńnia ŭzbrojenaj baraćby, čamu pavinny spryjać sumiesnyja biełaruska-rasijskija vučeńni «Ščyt Sajuza — 2015».
Pra heta Alaksandr Łukašenka zajaviŭ na sustrečy z kamandnym składam Uzbrojenych sił 19 lutaha.
Razam z tym kiraŭnik dziaržavy ličyć, što nieabchodna bolšuju ŭvahu nadavać i praviadzieńniu ŭłasnych vučeńniaŭ biez pryviazki da Rasii.
«Spadziavacca na samych blizkich, rodnych nam bratoŭ my budziem. Heta dobra. Ale zaŭsiody treba raźličvać na siabie. Kali nam chtości plačo padstavić — heta budzie ŭ plus. Tamu nam treba spłanavać našy vučeńni takim čynam, kab my zhodna z kancepcyjaj, jakuju siońnia ŭ čarhovy raz paćvierdzili i zaćvierdzili, mahli pravodzić mabilnyja nievialikija vučeńni», — skazaŭ Łukašenka.
Jon adznačyŭ, što sučasnyja ŭmovy viadzieńnia vajny značna źmianilisia ŭ paraŭnańni z tym, što było jašče niekalki dziesiacihodździaŭ tamu.
«Nichto siońnia nie padstavicca na płoščy pad «Hrady» ci «Śmierčy». Kali chtości suprać nas budzie vajavać — heta buduć razhrupavanyja ŭzbrojenyja siły, mabilnyja hrupy.
My tym ža pavinny adkazvać, nanosiačy nieprymalny ŭron ahresaru. Dyk davajcie budziem pravodzić takija vučeńni, kab našy vajennasłužačyja ŭmieli dziejničać u hetaj situacyi», — zaklikaŭ kiraŭnik dziaržavy.
Vajennaj navucy i adukacyi, pavodle mierkavańnia Łukašenki, nieabchodna zasiarodzić namahańni na vyznačeńni i praktyčnym asvajeńni najbolej metazhodnych i aptymalnych mietadaŭ padtrymańnia bajavoj hatoŭnaści. A taksama na prapracoŭcy i ŭkaranieńni sučasnych sposabaŭ viadzieńnia vajennych dziejańniaŭ, asabliva va ŭmovach hibrydnych vojnaŭ.
«U hetaj aŭdytoryi liču nieabchodnym skazać pra biaśpieku palotaŭ avijacyi. Pradstaŭleny analiz pa hetym pytańni vyklikaje peŭnuju tryvohu. Najaŭny vysoki ŭzrovień avaryjnaści vajennych samalotaŭ i viertalotaŭ śviedčyć ab tym, što raspačatyja Minabarony miery źjaŭlajucca niedastatkovymi, a časam nieefiektyŭnymi», — zajaviŭ jon.
«Tamu prapanovy mižviedamasnaj kamisii, skiravanyja na pavyšeńnie biaśpieki palotaŭ, ja padtrymaŭ, daŭ adpaviednyja daručeńni. Stanovišča ŭ hetaj śfiery pavinna być vypraŭlena ŭ karotkija terminy. Mała nie zdasca, kali ja jašče raz pačuju pra niejkuju avaryju ŭ VPS», — papiaredziŭ kiraŭnik dziaržavy.
Ciapier čytajuć
«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?62
Kamientary