«Być poŭnaj nie strašna». Aholenyja madeli plus size uskałychnuli biełaruskaje hramadstva
Časopis «Tajmier» apublikavaŭ pieršuju biełaruskuju fotasiesiju z madelami plus size. Fota źjavilisia i ŭ sacsietkach.
Adny padtrymlivajuć dziaŭčat i pišuć, što ŭ Biełarusi bolšaść žančyn poŭnyja, tamu daŭno para było pakazać realnuju karcinu. Inšyja nakinulisia z abvinavačvańniami, što madeli prapahandujuć atłuścieńnie, i zamiest fotasiesii im varta było b zapisacca ŭ trenažornuju zału.
Tak u čarhovy raz raźbiŭsia mif pra talerantnych biełarusaŭ.
Fotasiesija była zroblenaja dla minskaha brenda skuranych aksiesuaraŭ i torbaŭ. Dyzajnier Miłana Chasinievič kaža: ideja zaklučałasia ŭ tym, kab pakazać, što lubaja žančyna moža adčuvać siabie pryhožaj.
«My praviali kastynh u internecie, — raspaviadaje jana. — Atrymali vielmi šmat zajavak i fota. U vyniku adabrali dźvie madeli — Volhu Łukomskuju i Darju Miemietavu».
Abiedźvie dziaŭčyny ź Biełarusi. Volha apošnija try hady žyvie i pracuje ŭ Maskvie. Jana prafiesijnaja fotamadel plus size. Darja pa prafiesii lekar-renthienołah, da hetaha mieła nievialiki vopyt udziełu u fotazdymkach.
Hołas naroda: «Heta nijakija nie dziaŭčynki, a toŭstyja karovy»
Abmiarkoŭvajučy fota napaŭaholenych madelaŭ u sacsietkach, mnohija padtrymali śmiełych dziaŭčat, ale znajšlisia i tyja, chto paličyŭ ich učynak amaralnym. Nie tamu što napaŭhołyja, a tamu što niestandartnyja.
«50% žančyn u luboj krainie poŭnyja, — piša ŭ Fejsbuku kiraŭnica restarana Alena Maroz. — I što, ciapier chavacca i nie być pryhožaj?»
«Hledziačy na rekłamu, pieršaja dumka — zapisacca ŭ trenažorku, ale nijak nie kupić sumku, — ličyć supracoŭnik kampanii pa prodažy elektronnaha abstalavańnia Alena Śmirnova. — Atłuścieńnie ŭ maładoj dziaŭčyny — prykmieta ci harmanalnaha parušeńnia, ci taho, što jana žare i nie moža spynicca. Prabačcie za hrubaść».
Taho ž mierkavańnia prytrymlivajecca i žurnalist «SB. Biełaruś Siehodnia» Raman Rudź.
«Heta nijakija nie dziaŭčynki, a toŭstyja karovy, u jakich nie chapaje rozumu, voli i paniaćcia ab hihijenie charčavańnia, kab elemientarna sačyć za saboj. Zatoje lanoty i abžorstva ŭ lišku. Uzvodzić hetyja niedachopy ŭ dobryja jakaści — toje ž samaje, što apraŭdvać zabojcaŭ, tamu što jany nie baluča zarezali svaje achviary, — napisaŭ žurnalist u Fejsbuku, kamientujučy fota madelaŭ. — Ja, darečy, papracavaŭ nad saboj. Sa 103 kh da 84 ciapier. Uspaminajučy, jak heta nialohka dałosia, ja asabliva razdražniajusia ŭschvaleńniem taŭstuch. Akazvajecca, mnie nie varta było napružvacca… dastatkova było prykrycca sumačkaj ad Killtoday, i voś ja pryhažun».
Ekśpiert: tolki 2% dziaŭčat mohuć vyhladać, jak chudyja madeli
Ekśpiert pa hiendernych pytańniach Iryna Sałamacina ličyć, što takaja reakcyja vyklikana tym, što zvyklej ŭ rekłamie bačyć vobrazy tonkich, pryvabnych madelaŭ.
«A tut u Biełarusi, faktyčna pieršy raz, nam pakazvajuć toŭstych žančyn i prapanujuć abmierkavać ich pryvabnaść, — adznačaje jana. — Bolš za toje, isnuje vialikaja kolkaść rekłamnaj pradukcyi ab pachudańni, jakaja śćviardžaje, što pryhažość i pośpiech mohuć być dasiahnutyja tolki strataj vahi i dasiahnieńniem peŭnaj «normy». Usio heta farmuje ŭstojlivyja, časta praduziatyja i niehatyŭnyja ŭjaŭleńni ab poŭnych ludziach. Kali ty strojny, ty baišsia papravicca. Kali ty trochi poŭny, to ŭźnikaje niepieraadolnaje žadańnie schudnieć i być chudym».
Pa słovach ekśpierta, prablema zaklučajecca ŭ tym, što tolki 2% žančyn i dziaŭčat mohuć vyhladać, jak chudyja madeli, jakija ličacca uvasableńniem pryhažości. Astatnija pravodziać svajo žyćcio ŭ niezadavolenaści svajoj ułasnaj źniešnaściu, jakaja mocna adroźnivajecca ad toj, što pradstaŭlena ŭ hlancavych časopisach.
Na dumku Iryny Sałamacinaj, takija fotasiesii spryjajuć razbureńniu stereatypaŭ u hramadstvie:
«Možna ŭspomnić śpiavačku Bet Dzici, jakuju nazyvajuć «šykoŭna toŭstaja». Jana viała rubryki ŭ muzyčnych časopisach, zatym trapiła na paryžski «Tydzień mody», dzie ŭładkavałasia ŭ pieršym šerahu sa svaim pamieram XXL ŭ ciulevaj sukiency ad Fendi i sapsavała vychad chudych madelaŭ. Bet Dzici, śpiavačka, jakaja raźbirajecca ŭ modzie, nikomu nie dazvolić siabie pakryŭdzić».
I choć fota poŭnych dziaŭčat u modnych časopisach pakul u navinku dla Biełarusi, u śviecie skłałasia cełaja industryja madelnaha biźniesu plus size.
«Pašyrajucca miažy vyznačana zadadzienaj narmatyŭnaj pryhažości, źviazanaj z chudarlavaściu, — kaža Iryna Sałamacina. — Siońnia industryja mody stała ŭličvać nie tolki pamier XXL, ale, naprykład, i žančyn z asablivaściami. Uspomnim Anhielinu Uelskuju ź Minska — pieršaja madel z DCP na pakazie «Moda bieź miežaŭ» Fashion Week u Maskvie».
Ekśpiert ličyć, što dziakujučy hetaj raznastajnaści my možam raźvivać svajo ŭłasnaje ŭjaŭleńnie ab pryhažości i vučycca adčuvać siabie kamfortna ŭ našych ciełach.
Fotamadel: my nie sprabavali prapahandavać atłuścieńnie
Adna z udzielnic fotasiesii, jakaja vyklikała nieadnaznačnuju reakcyju, Volha Łukomskaja adreahavała na vodhuki ŭ siecivie.
«Čytajučy kamientary, ja krychu ździviłasia, čamu niekatoryja ludzi paličyli, što my sprabavali prapahandavać atłuścieńnie i zaachvočvać jaho! Heta poŭnaja biazhłuździca i śmiešna! Asabista ja chaču, kab žančyny i dziaŭčaty, jakija majuć prablemy ź liškam vahi, ubačyli, narešcie, što heta nie śmiarotna — być poŭnaj! I sapraŭdy mahu skazać, što z hetym možna žyć, i pryčym być vielmi pryhožaj dla siabie i navakolnych! Vielmi važna lubić i vieryć u siabie, u lubym pamiery adzieńnia, heta adnosicca i da chudzieńkich dziaŭčat, — piša Volha. — Ale važna razumieć, što zališniaja paŭnata — heta drenna mienavita dla vašaha zdaroŭja, a nie dla nastroju. Kali ŭ ciabie vialikaja vaha, ty prosta abaviazanaja ź joj zmahacca, mienavita dla siabie, a nie dla kahości!»
Jašče čatyry hady tamu Volha važyła 115 kh i nasiła 60 pamier adzieńnia: «Ciapier moj pamier 52-54, i heta maja asabistaja maleńkaja pieramoha. Ciapier ja znachodžusia ŭ pracesie pachudańnia. Maja meta — prykładna 48 pamier».
Volha Łukomskaja prymała ŭdzieł u viadomym rasijskim tok-šoŭ «Davaj paženimsia» (na videa — z 23:40).
Jana padzialiłasia, što ŭsio žyćcio była «u ciele», jak i jaje baćki. «Być poŭnaj — heta nie zahana i nie strašna, — zajaviła jana. — Usio roŭna, jakoha ty pamieru, važna, chto ty».
Dyzajnier Miłana Chasinievič ličyć, što niehatyŭnyja kamientary adlustroŭvajuć kompleksy i niezadavolenaść ludziej, jakija ich napisali:
«U kožnaha z nas jość mama, babula ci inšy čałaviek ź lišniaj vahoj, čamu ž tady my adšturchoŭvajem ludziej na fota? Lubaja žančyna moža adčuvać siabie pryhožaj».
Maładuju supracoŭnicu «Pielenha» aryštavali za «zakliki da naniasieńnia škody Biełarusi». Joj pahražaje da 12 hadoŭ3
Kamientary