Polšča choča stvaryć ahulny fond dla ŭzbrajeńnia krain Uschodniaj Jeŭropy
U adkaz na ahresiŭnuju palityku Maskvy ŭ Jeŭropie Polšča płanuje aktyvizavać vysiłki ŭschodnich siabraŭ NATA praz arhanizacyju Fonda finansavańnia ahulnaj abarony, piša sajt defensenews.com.
Raniej Varšava ŭžo paviedamiła, što nabudzie viertaloty Caracal EC725 i supraćpavietranyja kompleksy Patriot prykładna na $8 młrd.
Polskija raźliki ŭklučajuć t. zv. «Vyšahradskuju hrupu» — Polšču, Čechiju, Słavakiju i Vienhryju — a taksama Rumyniju, Bałharyju, Litvu, Łatviju i Estoniju. Praz skaardynavanyja zakupki ŭzbrajeńnia i finansavańnie, mahčyma, krainy zmohuć bolš efiektyŭnym sposabam pavysić svaju abaranazdolnaść.
U toj ž čas Polšča jak hałoŭny inicyjatar i, častkova, finansist budučych vajennych zamoŭ, pastarajecca pavysić prodažy svajoj pradukcyi krainam-partnioram.
«Pakul što my šukali patencyjalnych klijentaŭ u dalokich krainach i nie źviartali ŭvahi na susiednija rynki. Finansavaja padtrymka (polskaha) urada zrobić umovy bolš lohkimi dla polskich kampanij, adnak im nielha, kaniešnie, ihnaravać i miascovych kankurentaŭ», — adznačyŭ kiraŭnik Polskaj pałaty abaronnaj pramysłovaści Słavamir Kułakoŭski.
U vieraśni 2014 hoda Litva padpisała z polskaj kampanijaj Mesko kantrakt na pastaŭki supraćpavietranych rakietnych kompleksaŭ bližniaha dziejańnia GROM.
«Polšča maje namier być rehijanalnym lidaram i abjadnać inšych z metaj uzmacnieńnia rehijanalnaha supracoŭnictva ŭ sfery abarony i biaśpieki», — prakamientavaŭ navinu palitołah, prafiesar Varšaŭskaha ŭniviersiteta Marek Jabłanoŭski.
Kamientary