Biełaruś – Finlandyja – 2:3. Ale jak bilisia!
Biełarusy mieli šaniec atrymać jašče adnu znakavuju pieramohu na čempijanacie śvietu pa chakiei ŭ Čechii. Našy chłopcy ŭ sieryi bulitaŭ sastupili Finlandyi.
Pieka Rynie, dobra viadomy biełarusam finski bramnik, jaki paśpieŭ pahulać za minskaje «Dynama», nie prapuskaŭ na hetym čempijanacie čatyry hulni zapar. Takuju zajzdrosnuju suchuju liniju fina na 45-aj chvilinie hulni pierarvaŭ napadajučy Jaŭhien Kavyršyn. Kidok u biełarusa atrymaŭsia ŭ supraćchod Rynie, u samuju dziaviatku – 1:0.
A amal adrazu biełarusy hulali cełuju chvilinu ŭ farmacie 5 na 3. Za hety čas Artur Haŭrus trojčy nievytłumačalna nie padvoiŭ našu pieravahu. Rynie rabiŭ prosta niejmaviernyja rečy.
Da hetaha dva pieryjady vynikovych dziejańniaŭ nie prynosili. Varta adznačyć, što ŭ bramie biełarusaŭ źjaviŭsia Vital Koval, z pryčyny traŭmy Kievina Łałanda. Mnohija chvalavalisia za «Apielsina» (takuju mianušku maje Koval praz rudy koler vałasoŭ), bo jon daŭno nie mieŭ hulniavoj praktyki, ale kipier adyhraŭ vielmi dobruju hulniu.
Praŭda, u druhim uziaćci varot biełarusaŭ usio ž peŭnaja vina Kovala adčuvajecca. Naš bramnik zhubiŭ kancentracyju na imhnieńnie, finam hetaha chapiła. Charcikajnien dabiŭ šajbu paśla adskoka ad borta, ale tut uźnikaje pytańnie, dzie była i abarona. U astatnim Koval byŭ biezdakornym.
Zdavałasia, Finlandyja ŭžo nie ŭpuścić pieramohu. Biełarusy pajšli na apošni šturm, zamianiŭšy Kovala na šostaha palavoha. I, na ščaście, skarystali svajo! Alaksiej Kalužny adznačyŭsia za tryccać adnu siekundu da finalnaj sireny! 2:2!
Nas čakaŭ oviertajm, dzie abiedźvie kamandy šajbami tak i nie adznačylisia.
Na žal, u sieryi bulitaŭ finy byli biezdakornymi. A voś Siarhiej Kaścicyn svoj «chakiejny pienalci» nie realizavaŭ. Biełarusy nabrali adzin punkt. Ciapier dla vychadu ŭ płej-of dastatkova nabrać jašče adzin punkt u zaŭtrašniaj hulni z Narviehijaj (pačatak a 13:15).
Hrupa V: ZŠA — 15 (6 hulniaŭ), Rasija — 14, Finlandyja — 14, Biełaruś — 11, Słavakija — 8, Narviehija — 6, Danija — 4, Słavienija — 0.
Pasoł Sidarenka pakončyŭ z saboj, nie vytrymaŭ dopytaŭ KDB17
Kamientary