Sumiesny dachod prezidenta ZŠA Baraka Abamy i jaho žonki Mišel aceńvajecca ŭ miežach ad 1,9 da 6,9 młn dalaraŭ, vynikaje z apublikavanaj dekłaracyi ab dachodach.
Bolšaja častka bahaćcia siamji znachodzicca ŭ kaštoŭnych papierach, jakija vypuskaje kaznačejstva, — ad 1 da 5 młn dalaraŭ. Inšyja aktyvy znachodziacca ŭ piensijnym fondzie, u biesterminovych układach, na aščadnych piensijnych rachunkach. Taksama kala 130 tys. dalaraŭ skłali dachody ad prodažu knih Baraka Abamy.
Jak vynikaje z dekłaracyi, siamja vałodaje domam u Čykaha, jaki aceńvajecca ad 500 tys. da 1 młn dalaraŭ. Prezident z žonkaj zapłacili bolš za 93 tys. dalaraŭ fiederalnaha padatku za minuły hod.
U 2013 hodzie dachod Abamy aceńvaŭsia ŭ miežach ad 1,8 da 7 młn dalaraŭ.
Pavodle zakona, słužbovyja asoby ŭ ZŠA štohod abaviazanyja dekłaravać pamier svaich aktyvaŭ i pasivaŭ. Pry hetym jany mohuć pakazać nie kankretnuju sumu, a vierchniuju i nižniuju miežy, što uskładniaje vyznačeńnie dakładnaj sumy.
Rasijski prezident apublikavaŭ svaju dekłaracyju ŭ krasaviku: za 2014 hod jon zarabiŭ 7,65 młn rasijskich rubloŭ (prykładna 153 tys. dalaraŭ).
Kamientary