Upraŭleńnie Śledčaha kamiteta pa Minskaj vobłaści pa vynikach praviadzieńnia pravierki apieratyŭnikami «Adździeła K» abłasnoj milicyi zaviało kryminalnuju spravu ŭ dačynieńni da čaćviarych fihurantaŭ, jakija majuć dačynieńnie da arhanizacyi matču-fantoma «Šachcior» — «Słuck».
Dziejańni padazravanych kvalifikavanyja pa č.1 art.350 Kryminalnaha kodeksa Respubliki Biełaruś — «Madyfikacyja kamputarnaj infarmacyi».
Jak paviedamiła adździaleńnie infarmacyi i hramadskich suviaziaŭ UUS Minabłvykankama, 12 lutaha hetaha hoda ŭ Salihorski RAUS źviarnuŭsia dyrektar miascovaha futbolnaha kłuba «Šachcior» z zajavaj ab tym, što nieviadomyja asoby, vierahodna atrymaŭšy niesankcyjanavany dostup da aficyjnaha sajta kłuba fcshakhter.by, apublikavali na jaho staronkach niedakładnuju infarmacyju ab tavaryskim matčy, jaki nibyta prajšoŭ 3 lutaha pamiž kłubami «Šachcior» (h.Salihorsk) i «Słuck» (h.Słuck).
Supracoŭnikami adździeła pa raskryćci złačynstvaŭ u śfiery vysokich technałohij UUS Minabłvykankama padčas pravierki było vyjaŭlena, što pakazanyja infarmacyja była raźmieščana na sajcie nie vypadkova.
Pa papiarednich dadzienych, dvoje minčan 1985 i 1975 h.n., na praciahu doŭhaha času ažyćciaŭlali dla bukmiekierskich kantor pasłuhi pa zbory źviestak ab spartyŭnych padziejach, jakija adbyvajucca ŭ Biełarusi, a taksama pa tranślacyi ŭ režymie realnaha času statystyki i chodu praviadzieńnia raznastajnych spartyŭnych spabornictvaŭ. Na padstavie nazvanych źviestak raźličvajecca, u pieršuju čarhu, kaeficyjent vyjhryšnych stavak.
U pačatku studzienia nazvanyja hramadzianie prapanavali dvaim pradstaŭnikam futbolnych kłubaŭ «Šachcior» i «Słuck» apublikavać u internecie vyniki nibyta realnaha futbolnaha matču, tym samym uvioŭšy ŭ zman zamiežnyja bukmiekierskija kantory i, zahadzia viedajučy vynik, zrabić harantavanyja vyjhryšnyja staŭki.
Dla realizacyi płana ŭ studzieni na aficyjnych sajtach futbolnych kłubaŭ «Šachcior» i «Słuck» nazvanymi asobami abodvuch futbolnych kłubaŭ byli apublikavanyja navinavyja natatki, jakija anansavali praviadzieńnie tavaryskaha matču, spasyłki na infarmacyju byli pieradadzienyja cełamu šerahu zamiežnych bukmiekierskich kantor.
3 lutaha na aficyjnych sajtach kamand źjavilisia repartažy pra tavaryski matč, jaki nibyta zaviaršyŭsia ź likam 2:1 na karyść FK «Słuck».
Adnačasova infarmacyja ab praviadzieńni i vynikach sustrečy tranślavałasia «matč-skaŭtami» dla mnohich suśvietnych bukmiekierskich kantor.
Uvažlivyja biełaruskija zaŭziatary, zacikaŭlenyja dziŭnym paviedamleńniem ab nieisnujučym matčy, praź niekalki dzion źviarnulisia da kiraŭnictva salihorskaha kłuba za tłumačeńniami.
Pa vynikach praviadzieńnia pravierki apieratyŭnikami «Adździeła K» abłasnoj milicyi kiravańnia Śledčaha kamiteta pa Minskaj vobłaści ŭ dačynieńni da ŭsich čaćviarych fihurantaŭ raspačata kryminalnaja sprava.
Kamientary