Mižnarodnaja arhanizacyja pracy moža vyklučyć Biełaruś ź liku krain, jakija hruba parušajuć pravy prafsajuzaŭ

Mižnarodnaja arhanizacyja pracy (MAP) sioleta moža nie ŭklučyć Biełaruś u śpiecparahraf jak krainu, dzie hruba parušajucca pravy prafsajuzaŭ. Pra heta zajaviŭ BiełaPAN kiraŭnik Biełaruskaha kanhresa demakratyčnych prafsajuzaŭ, vice-prezident Mižnarodnaj kanfiederacyi prafsajuzaŭ Alaksandr Jarašuk pa vynikach razhladu «biełaruskaha pytańnia» na Mižnarodnaj kanfierencyi pracy (MKP) u Ženievie.

Na praviedzienym 5 červienia ŭ miežach 104-j siesii MKP pasiadžeńni kamitet pa normach i standartach MAP vysłuchaŭ hadavuju spravazdaču ab situacyi z pravami pracoŭnych i prafsajuzaŭ ministra pracy i sacabarony Mar`iany Ščotkinaj, jakaja ŭznačalvaje biełaruskuju ŭradavuju delehacyju na hetaj kanfierencyi. 

«Była vielmi vostraja dyskusija, nie mieniej vostraja, čym na minułych kanfierencyjach, — skazaŭ Jarašuk. — Ton abmierkavańnia ciahnuŭ na toje, što pavinien być śpiecparahraf, bo pryncypova ŭsie razumieli, što palityčnaja sistema ŭ Biełarusi stanovicca ŭsio bolš žorstkaj, i ŭ hetaj situacyi havaryć ab pravach prafsajuzaŭ vielmi składana». 

Adnak tamu, što Biełaruś, chutčej za ŭsio, paźbiehnie ŭklučeńnia ŭ śpiecparahraf MAP, pavodle słoŭ Jarašuka, moža paspryjać niekalki akaličnaściaŭ. Pa-pieršaje, pryniaćcie Alaksandram Łukašenkam dekreta № 4 — hety dakumient skasavaŭ umovu, pry jakoj prafsajuz na pradpryjemstvie moh być stvorany pry namiery jaho arhanizavać nie mienš jak 10% ad ahulnaj kolkaści pracoŭnych. 

«Heta častka hałoŭnaj rekamiendacyi kamiteta pa rasśledavańniach — rekamiendacyi pra admienu dazvolnaha pryncypu stvareńnia i dziejnaści prafsajuzaŭ, — skazaŭ lidar BKDP. — Mienavita tamu byŭ rascenieny taki palityčny krok, choć usie dobra razumieli, što heta nie źmianiaje situacyi z pravami pracoŭnych i prafsajuzaŭ u Biełarusi. Viadoma, taksama było aceniena žadańnie, — najpierš Minpracy, jakoje pradstaŭlaje ŭrad, — praciahvać dyjałoh z MAP, jakoje vykazałasia ŭ praviadzieńni šerahu mierapryjemstvaŭ». 

Pavodle słoŭ Jarašuka, uradavaja delehacyja Biełarusi adkryta raźličvała na toje, što ŭ vynikovym dakumiencie pa słuchańni «budzie zapis ab prahresie ŭ situacyi z pravami prafsajuzaŭ». «Ale ja nie dumaju, što zdarycca štości nievierahodnaje i ź`iavicca padobny zapis», — adznačyŭ jon. 

Kanhres demakratyčnych prafsajuzaŭ paličyć «zdavalniajučym i poŭnaściu prymalnym vynikam», kali MAP nie ŭklučyć Biełaruś u śpiecparahraf, ale i nie adznačyć prykmietnaha palapšeńnia situacyi z pravami prafsajuzaŭ, choć «urad heta nie zadavalniaje». 

Na abmierkavańni «biełaruskaha pytańnia», skazaŭ Jarašuk, prysutničali ŭsie krainavyja delehacyi. Pradstaŭniki zamiežnych dziaržaŭ «vykazvalisia jak u padtrymku ŭrada Biełarusi, tak i suprać». 

Rašeńnie MAP pa Biełarusi, jak miarkujecca, budzie abvieščana 10 červienia. 

Nahadajem, «biełaruskaje pytańnie» ź`iaviłasia na paradku dnia MAP u 2003 hodzie. Tady Administracyjny saviet MAP pačaŭ rasśledavańnie parušeńnia pravoŭ prafsajuzaŭ u Biełarusi ŭ suviazi sa skarhaj niezaležnych prafsajuzaŭ. Pa vynikach rasśledavańnia Biełaruś nieadnarazova ŭnosili ŭ śpiecparahraf MAP jak krainu, dzie hruba parušajucca pravy prafsajuzaŭ. Heta, u svaju čarhu, stała pryčynaj dla vyklučeńnia Biełarusi ŭ červieni 2007 hoda z Hienieralnaj sistemy prefierencyj Jeŭrasajuza. 

Dla viartańnia prefierencyj urad Biełarusi pavinien vykanać 12 rekamiendacyj MAP, siarod jakich: dać niezaležnym prafsajuzam mahčymaść rehistravać piarvičnyja arhanizacyi; dać im prava pracavać naroŭni z aficyjnymi prafsajuzami; spynić pieraśled hramadzian pa prafsajuznaj prynaležnaści; zabiaśpiečyć usim prafsajuznym ab`iadnańniam prava ŭdziełu ŭ vyrašeńni važnych sacyjalnych prablem krainy.

• 0
• 0
• 0
• 0
• 0
• 0
• 0
• 0