Padčas rabočaha vizitu ŭ Rasiju, dzie prachodziać samity BRIKS i Šanchajskaj arhanizacyi supracoŭnictva, Alaksandr Łukašenka 9 lipienia sustreŭsia z prezidentam Afhanistana Ašrafam Hani Achmadzajem. Pra heta paviedamlaje pres-słužba biełaruskaha prezidenta.
«Afhanistan — nie takaja dalokaja dla nas kraina, i my možam bližejšym časam aktyvizavać naša supracoŭnictva, davieści jaho da ŭzroŭniu patencyjału našych dziaržaŭ, — skazaŭ Łukašenka. — Nam zdajecca ŭ Biełarusi, i my, mabyć, nie dalokija ad praŭdy, što paśla abrańnia novaha prezidenta ŭ Afhanistanie akreśliŭsia intensiŭny praces stabilizacyi, narmalizacyi adnosin roznych palityčnych, etnarelihijnych hrup. My heta vielmi vitajem, my vielmi pieražyvajem za vas u siłu mnohich pryčyn».
«U nas jość niejki abaviazak dapamahać afhanskamu narodu ŭ adnaŭleńni narodnaj haspadarki, rabić usio dla taho, kab u Afhanistanie ludzi žyli dobra. Tamu što vy zajmajecie stratehičnaje stanovišča ŭ Azii i biez Afhanistana niemahčyma ažyćciaŭlać tranzit, asabliva pamiž poŭnačču i poŭdniem, dzie raźmieščany hihanckija dziaržavy z hihanckim zapasam syraviny», — adznačyŭ jon.
Kiraŭnik dziaržavy źviarnuŭ uvahu, što Afhanistan znachodzicca ŭ centry baraćby z sučasnymi pahrozami. Na jaho dumku, usie krainy, čyje lidary znachodziacca siońnia va Ufie, vielmi zacikaŭlenyja ŭ tym, kab Afhanistan byŭ mocnaj dziaržavaj. «Tamu što i narkatrafik, i terarystyčnyja pahrozy prachodziać praz vašu krainu. Tamu ŭsie pavinny abjadnacca dla taho, kab umacavać Afhanistan pa ŭsich pazicyjach — palityčnych, sacyjalnych, kab jon moh supraćstajać pahrozam, jakija siońnia isnujuć u śviecie», — padkreśliŭ Łukašenka.
Raniej jon taksama sustreŭsia z prezidentam Brazilii Dziłmaj Rusief. Kiraŭniki dziaržaŭ abmierkavali najbolej aktualnyja prablemy dvuchbakovaha paradku dnia «z uporam na nieabchodnaść raźvićcia handlova-ekanamičnaha supracoŭnictva, a taksama inšyja pytańni, jakija ŭjaŭlajuć uzajemnuju cikavaść», paviedamiła pres-słužba.
Siońnia ž Łukašenka voźmie ŭdzieł u sustrečy kiraŭnikoŭ krain BRIKS ź lidarami zaprošanych dziaržaŭ. Na pieramovach buduć abmiarkoŭvacca najbolej aktualnyja pytańni suśvietnaj palityki, ekanomiki, finansavaj śfiery.
BRIKS — hrupa ź piaci bujnych krain, jakija chutka raźvivajucca (Brazilija, Rasija, Indyja, Kitaj, PAR), zacikaŭlenych u raźvićci šmatpłanavaha čatyrochbakovaha supracoŭnictva dla farmiravańnia šmatpalarnaha śvietu.
Ciapier čytajuć
«Zachodziš u kamieru, a jany kažuć: «My z taboj admaŭlajemsia siadzieć». Cichanoŭski raskazaŭ, jak sutyknuŭsia z prablemaj nizkaha statusu11
Kamientary