Va ŭkrainskim Mukačavie sutyčki kantrabandystaŭ cyharet pieraraśli ŭ maštabnyja bai VIDEA
4 čałavieki zahinuli, 14 paranienych: hrupoŭka, źviazanaja z byłoj Partyjaj rehijonaŭ, procistaić druhoj, źviazanaj z «Pravym siektaram».
«Čutny streły aŭtamataŭ i vybuchi bajavych hranat. Paviedamlajecca taksama, što dva asnoŭnyja vyjezdy z horada błakavanyja. Akramia taho, žychary 5-paviarchovikaŭ, jakija raźmieščany kala vyjezda z horada, paviedamlajuć ab pažary na adnoj z AZS», — havorycca ŭ paviedamleńni miascovaha ŭkrainskaha vydańnia KarpatNews i vidavočcaŭ u sacsietkach.
Ukrainskaje Zakarpaćcie — mocna kryminalizavany rehijon, padzieleny miž etničnymi i terytaryjalnymi kłanami.
Subotnija razborki pieraraśli ŭ sapraŭdnyja bai. U rehijon byli pierakinutyja antyterarystyčnyja hrupoŭki.
«U vočy žycharam kinułasia kałona z 7-mi džypaŭ ź simvolikaj «Pravaha siektara», jakija ŭ poŭnaj bajavoj kamplektacyi (z aŭtamatami, kulamiotami i inšym vajskovym načyńniem) jeździli ŭ Mukačavie. Paśla vidavočcy paviedamili, što čuli stralbu niepadalok ad račnoha mosta. Pavodle papiaredniaj infarmacyi, tyja ž «pravasiektaraŭcy» stralali ŭ spartyŭnym kompleksie «Čyrvony Cmok», — havorycca ŭ paviedamleńni.
Karystalnik Facebook Jaŭhien Šaŭčenka paviedamiŭ, što paćvierdžana 4 zahinułych — «dva ŭ «pravasiektaraŭcaŭ» i dva — u «spartoŭcaŭ», miascovaj mafii.
«U Mukačavie idzie boj pamiž miascovaj mafijaj i bandfarmavańniem, jakoje nazyvaje siabie «zapasny bataljon PS-Zakarpaćcie» — nie padzialili finansavyja płyni i kanały kantrabandy. Užyvajecca strałkovaja ŭzbrajeńnie, kulamiot «Ucios-12,7» i hranatamioty. Haryć AZS…. Horad pierakryvajecca śpiecpadraździaleńniami MUS i SBU», — adznačyŭ jon.
Pa źviestkach vydańnia Mukachevo.net, u vyniku padziej 14 čałaviek paranienyja.
Jak paviedamlaje Interfaks-Ukraina sa spasyłkaj na miascovyja ŚMI, pa papiaredniaj infarmacyi, uzbrojenyja asoby, jakija pradstavilisia jak «Pravy siektar», zaniali terytoryju kompleksu «Čyrvony Cmok», im akazali supraciŭ ludzi z atačeńnia narodnaha deputata z byłoj Partyi rehijonaŭ Michajły Łanio.
«Stralba viałasia na terytoryi kompleksu «Antares» i byłoha kłuba «Čyrvony Cmok» na vulicy Lermantava», — havorycca ŭ paviedamleńni.
Taksama paviedamlajecca, što pierastrełka ŭ Čyrvonaj Horcy na trasie Kijeŭ—Čop pačałasia «jak praciah razborak».
Pa źviestkach «Zakarpattia Info», «Antares» byŭ atočany milicyjantami ŭ broniekamizelkach.
«Kompleks, u jaki ŭvachodziać trenažornaja zała, basiejn, saŭna, naležyć narodnamu deputatu Michajłu Łanio (mianuška Blumk), jaki ŭ parłamiencie farmalna naležyć da hrupy Jeramiejeva «Vola narodu», a pa sutnaści — da Apazicyjnaha błoku. Tam ža ŭvieś čas bačać kiraŭnika abłarhanizacyi «Ukrainski vybar» Viktara Miadźviedčuka Ivana Čubyrko», — piša vydańnie.
U horadzie abvieščany płan «Pierachop».
«Trasu pierakryli try mašyny MUS, — raskazvaje deputat i žurnalist Mustafa Najem. — Na pieršaj mašynie-džypie kałony «Pravaha siektara» byŭ ustalavany stužačny kulamiot Kałašnikava. Stralba viałasia taksama z RPH i «Much». Try milicejskija mašyny byli źniščanyja, kałona džypaŭ prarvalisia ŭ rajon Čyrvonaj Hary, na ŭjeździe ŭ Mukačava z boku trasy Kijeŭ—Čop».
Abłasnaja prakuratura vyznačyła sutnaść kanfliktu pamiž ludźmi ŭ kamuflažy z nadpisam «Pravy siektar» i miascovymi «spartoŭcami» jak «padzieł śfieraŭ upłyvu». Raspačataja kryminalnaja sprava pa artykułach KK «terarystyčny akt» i «stvareńnie złačynnaj arhanizacyi».
Lidar Dobraachvotnickaha korpusu «Pravy siektar» i narodny deputat Ukrainy Dmytro Jaraš prakamientavaŭ źviestki pra stralaninu ŭ Mukačavie tak: «Pravodziŭ sustrečy z vybarcami na akruzie. Atrymaŭ infarmacyju pra trahičnyja padziei na Zakarpaćci. Jedu na Kijeŭ. Ciapier samaje hałoŭnaje — stabilizavać situacyju i nie dapuścić dalejšaha pralićcia kryvi. Dla hetaha nieabchodna nieadkładna zatrymać bandytaŭ i tych milicejskich čynoŭ, što addali zahad adkryć ahoń», — napisaŭ Jaraš na svajoj staroncy ŭ fejsbuku.
Videa pačatku boja tut (aściarožna, niecenzurnaja leksika):
Kamientary