Ва ўкраінскім Мукачаве сутычкі кантрабандыстаў цыгарэт перараслі ў маштабныя баі ВІДЭА
4 чалавекі загінулі, 14 параненых: групоўка, звязаная з былой Партыяй рэгіёнаў, процістаіць другой, звязанай з «Правым сектарам».
«Чутны стрэлы аўтаматаў і выбухі баявых гранат. Паведамляецца таксама, што два асноўныя выезды з горада блакаваныя. Акрамя таго, жыхары 5-павярховікаў, якія размешчаны каля выезда з горада, паведамляюць аб пажары на адной з АЗС», — гаворыцца ў паведамленні мясцовага ўкраінскага выдання KarpatNews і відавочцаў у сацсетках.
Украінскае Закарпацце — моцна крыміналізаваны рэгіён, падзелены між этнічнымі і тэрытарыяльнымі кланамі.
Суботнія разборкі перараслі ў сапраўдныя баі. У рэгіён былі перакінутыя антытэрарыстычныя групоўкі.
«У вочы жыхарам кінулася калона з 7-мі джыпаў з сімволікай «Правага сектара», якія ў поўнай баявой камплектацыі (з аўтаматамі, кулямётамі і іншым вайсковым начыннем) ездзілі ў Мукачаве. Пасля відавочцы паведамілі, што чулі стральбу непадалёк ад рачнога моста. Паводле папярэдняй інфармацыі, тыя ж «правасектараўцы» стралялі ў спартыўным комплексе «Чырвоны Цмок», — гаворыцца ў паведамленні.
Карыстальнік Facebook Яўген Шаўчэнка паведаміў, што пацверджана 4 загінулых — «два ў «правасектараўцаў» і два — у «спартоўцаў», мясцовай мафіі.
«У Мукачаве ідзе бой паміж мясцовай мафіяй і бандфармаваннем, якое называе сябе «запасны батальён ПС-Закарпацце» — не падзялілі фінансавыя плыні і каналы кантрабанды. Ужываецца стралковая ўзбраенне, кулямёт «Уцёс-12,7» і гранатамёты. Гарыць АЗС…. Горад перакрываецца спецпадраздзяленнямі МУС і СБУ», — адзначыў ён.
Па звестках выдання Mukachevo.net, у выніку падзей 14 чалавек параненыя.
Як паведамляе Інтэрфакс-Украіна са спасылкай на мясцовыя СМІ, па папярэдняй інфармацыі, узброеныя асобы, якія прадставіліся як «Правы сектар», занялі тэрыторыю комплексу «Чырвоны Цмок», ім аказалі супраціў людзі з атачэння народнага дэпутата з былой Партыі рэгіёнаў Міхайлы Ланё.
«Стральба вялася на тэрыторыі комплексу «Антарэс» і былога клуба «Чырвоны Цмок» на вуліцы Лермантава», — гаворыцца ў паведамленні.
Таксама паведамляецца, што перастрэлка ў Чырвонай Горцы на трасе Кіеў—Чоп пачалася «як працяг разборак».
Па звестках «Закарпаття Інфо», «Антарэс» быў аточаны міліцыянтамі ў бронекамізэльках.
«Комплекс, у які ўваходзяць трэнажорная зала, басейн, саўна, належыць народнаму дэпутату Міхайлу Ланё (мянушка Блюмк), які ў парламенце фармальна належыць да групы Ерамеева «Воля народу», а па сутнасці — да Апазіцыйнага блоку. Там жа ўвесь час бачаць кіраўніка абларганізацыі «Украінскі выбар» Віктара Мядзведчука Івана Чубырко», — піша выданне.
У горадзе абвешчаны план «Перахоп».
«Трасу перакрылі тры машыны МУС, — расказвае дэпутат і журналіст Мустафа Наем. — На першай машыне-джыпе калоны «Правага сектара» быў усталяваны стужачны кулямёт Калашнікава. Стральба вялася таксама з РПГ і «Мух». Тры міліцэйскія машыны былі знішчаныя, калона джыпаў прарваліся ў раён Чырвонай Гары, на ўездзе ў Мукачава з боку трасы Кіеў—Чоп».
Абласная пракуратура вызначыла сутнасць канфлікту паміж людзьмі ў камуфляжы з надпісам «Правы сектар» і мясцовымі «спартоўцамі» як «падзел сфераў уплыву». Распачатая крымінальная справа па артыкулах КК «тэрарыстычны акт» і «стварэнне злачыннай арганізацыі».
Лідар Добраахвотніцкага корпусу «Правы сектар» і народны дэпутат Украіны Дмытро Яраш пракаментаваў звесткі пра страляніну ў Мукачаве так: «Праводзіў сустрэчы з выбарцамі на акрузе. Атрымаў інфармацыю пра трагічныя падзеі на Закарпацці. Еду на Кіеў. Цяпер самае галоўнае — стабілізаваць сітуацыю і не дапусціць далейшага праліцця крыві. Для гэтага неабходна неадкладна затрымаць бандытаў і тых міліцэйскіх чыноў, што аддалі загад адкрыць агонь», — напісаў Яраш на сваёй старонцы ў фэйсбуку.
Відэа пачатку боя тут (асцярожна, нецэнзурная лексіка):
Каментары