105 hadoŭ z dnia narodzinaŭ vybitnaj biełaruskaj paetki-patryjotki Łarysy Hienijuš adznačyli ŭ Zelvie. U miascovaj Śviata-Troickaj carkvie adbyłasia paminalnaja bahasłužba, jakuju ŭžo tradycyjna ad niekalkich hadoŭ pravodziać u pamiać pra paetku.
Z Zelvy paviedamlaje karespandentka radyjo «Racyja» Jana Zapolskaja: – Kala biusta Łarysy Hienijuš, jaki znachodzicca niepasredna pry carkvie, viadomy biełaruski litaratar, daśledčyk tvorčaści paetki Michaś Skobła prezientavaŭ novuju knihu pad nazvaj «Duchu mahutnyja čary…», jakaja hetymi dniami vyjšła ŭ vydaviectvie «Limaryjus». Hetaja kniha sabrała šmatlikija archiŭnyja materyjały, jakija jašče zachoŭvajucca navat u damach niekatorych miascovych žycharoŭ. Taksama vystupiła viadomaja biełaruskaja haradzienskaja paetka Danuta Bičel, jaka raspaviała svaje ŭspaminy pra Łarysu Hienijuš, pra toj dom, u jaki jana siudy pryjazdžała, dzie našaja paetka žyła razam z mužam Jankam Hienijušam. Na mierapryjemstvie prysutničała davoli šmat ludziej. Tut pradstaŭleny Harodnia, Lida, Słonim, Mastoŭščyna, Dziatłaŭščyna, šmat miascovych žycharoŭ, na žal, ź Miensku pryjechała niešmatlikaja hrupa. Varta, napeŭna, adznačyć, što na zaklik miascovych aktyvistaŭ pryjechać u Zelvu pretendentaŭ kandydataŭ na pasadu prezidenta, nichto ź ich nie źjaviŭsia. Pry carkvie adbyłasia prezientacyja knižak, paety čytali vieršy, a taksama vystupili bardy. Paśla ŭdzielniki imprezy pajechali i ŭskłali kvietki na mahiłu Łarysy i Janki Hienijušaŭ na miascovych zelvienskich mohiłkach. Zaviaršałasia ŭračystaść bolš praciahłym kancertam u miascovaści Bieražki niepadalok Zelvienskaha vadaschovišča.
Kamientary