Padmanutych dolščykaŭ zatrymali za sprobu dahrukacca da Łukašenki
Historyja ź ludźmi, jakija sprabavali pabudavać žyllo na Vałhahradskaj, ciahniecca nie pieršy hod. Zabudoŭščyku TAA «Vałyń» horad vydzieliŭ kavałak ziamli niedaloka ad stancyi mietro «Maskoŭskaja», abciažarany znosam pryvatnych damoŭ.
«Vałyń» abiacała pabudavać try šmatpaviarchoviki. Častku virtualnych na toj momant kvater u pieršym domie realizavali praz ablihacyi (harantam jakich vystupiła strachavaja kampanija), častku — pa damovach dolevaha budaŭnictva i damovach pazyki. U pieršym domie, pa padlikach paciarpiełych, było pradadziena 107 kvater. Ale dom vyras z katłavana da ŭzroŭniu treciaha paviercha, i hrošy ŭ «Vałyni» skončylisia.
Ciapier kiraŭnictva firmy-zabudoŭščyka pad śledstvam, firma, pra jakuju ničoha nie viadoma, pačała praceduru bankructva, a ludziam nichto ničoha nie abiacaje. Tolki strachoŭščyk hatovy viarnuć hrošy pavodle naminału, u rublach, čytaj — u čatyry razy mienš, čym było vypłačana. Dolščyki ŭžo źbiralisia pad «škiletam» svajho doma, sprabavali ŭstalavać tam raściažki. Raściažki zdymała milicyja. Ludzi — a heta pad sotniu siemjaŭ, častka ź jakich ŭkłała ŭ budoŭlu apošniaje, zapisali dva videazvaroty da prezidenta. Ale ŭpeŭnienyja, što roliki na Youtube Alaksandru Łukašenku nichto nie pakazaŭ.
Siońnia paciarpiełyja ad zabudoŭščyka raspačali adčajnuju sprobu dahrukacca da kiraŭnika dziaržavy — stali z raściažkami kala Pałaca Niezaležnaści.
Prastajali ličanyja chviliny i stali razychodzicca. Tym nie mienš dvuch čałaviek zatrymali. Pavodle źviestak dolščykaŭ, milicyja zabrała ŭ RUUS Centralnaha rajona Siarhieja Šuńko i Leanida Krasoŭskaha, a taksama žurnalistku «Narodnaj Voli» Kaciarynu Andrejevu. Paźniej jaje vyzvalili.
Čytać taksama: Cotnia siemjaŭ ukłali svaje hrošy ŭ budoŭlu šmatpaviarchovika ŭ Minsku, a ŭ vyniku zastalisia i biez hrošaj, i biez žylla
Ciapier čytajuć
«Ja jechała ad vajny i bambiožak»: Jaŭhienija Čarniaŭskaja pra pierajezd na Kipr1
Kamientary