Падманутых дольшчыкаў затрымалі за спробу дагрукацца да Лукашэнкі
Гісторыя з людзьмі, якія спрабавалі пабудаваць жыллё на Валгаградскай, цягнецца не першы год. Забудоўшчыку ТАА «Валынь» горад выдзеліў кавалак зямлі недалёка ад станцыі метро «Маскоўская», абцяжараны зносам прыватных дамоў.
«Валынь» абяцала пабудаваць тры шматпавярховікі. Частку віртуальных на той момант кватэр у першым доме рэалізавалі праз аблігацыі (гарантам якіх выступіла страхавая кампанія), частку — па дамовах долевага будаўніцтва і дамовах пазыкі. У першым доме, па падліках пацярпелых, было прададзена 107 кватэр. Але дом вырас з катлавана да ўзроўню трэцяга паверха, і грошы ў «Валыні» скончыліся.
Цяпер кіраўніцтва фірмы-забудоўшчыка пад следствам, фірма, пра якую нічога не вядома, пачала працэдуру банкруцтва, а людзям ніхто нічога не абяцае. Толькі страхоўшчык гатовы вярнуць грошы паводле наміналу, у рублях, чытай — у чатыры разы менш, чым было выплачана. Дольшчыкі ўжо збіраліся пад «шкілетам» свайго дома, спрабавалі ўсталяваць там расцяжкі. Расцяжкі здымала міліцыя. Людзі — а гэта пад сотню сем'яў, частка з якіх ўклала ў будоўлю апошняе, запісалі два відэазвароты да прэзідэнта. Але ўпэўненыя, што ролікі на Youtube Аляксандру Лукашэнку ніхто не паказаў.
Сёння пацярпелыя ад забудоўшчыка распачалі адчайную спробу дагрукацца да кіраўніка дзяржавы — сталі з расцяжкамі каля Палаца Незалежнасці.
Прастаялі лічаныя хвіліны і сталі разыходзіцца. Тым не менш двух чалавек затрымалі. Паводле звестак дольшчыкаў, міліцыя забрала ў РУУС Цэнтральнага раёна Сяргея Шунько і Леаніда Красоўскага, а таксама журналістку «Народнай Волi» Кацярыну Андрэеву. Пазней яе вызвалілі.
Чытаць таксама: Cотня сем’яў уклалі свае грошы ў будоўлю шматпавярховіка ў Мінску, а ў выніку засталіся і без грошай, і без жылля
Колькасць ахвяр выбуху ў маскоўскім элітным рэстаране на юбілеі генерала, які камандаваў наступам на Кіеў з Беларусі ў 2022-м, вырасла да пяці чалавек44
Каментары