Pijantkoŭski: Ukraina ciapier zmahajecca za ŭsich nas — i za dziaržaŭnaść Biełarusi, i za budučyniu Rasii
Rasijski palitołah i publicyst Andrej Pijantkoŭski ličyć, što biełarusy pavinny zachoŭvać pilnaść u adnosinach z Rasijaj.
Pra heta jon zajaviŭ padčas lekcyi ŭ Minsku, jakaja była arhanizavanaja ŭ ramkach prajekta «Jeŭrapiejskaje kafe — adkrytaja prastora Jeŭropy» ŭ halerei Tut.by.
«Vaša dziaržaŭnaść była ŭ niebiaśpiečnym stanoviščy apošnija 20 hadoŭ. Naahuł heta pryjarytetam rasijskaj zamiežnaj palityki było tak zvanaje abjadnańnie ź Biełaruśsiu. I ŭvohule, niahledziačy na ŭsie rasčaravańni, heta zastajecca. Tamu pilnaść treba zachoŭvać i biełaruskamu hramadstvu, i biełaruskamu kiraŭnictvu, ale mahčymaści Pucina dla ažyćciaŭleńnia hetych akcyj pamianšajucca z kožnaj jaho parazaj. Ukraina ciapier zmahajecca za ŭsich za nas — i za dziaržaŭnaść Biełarusi, i za budučyniu Rasii», — zajaviŭ Pijantkoŭski.
Palitołah upeŭnieny, što Łukašenka nikoli nie źbiraŭsia ŭvachodzić u skład Rasii, chacia Kreml zaŭsiody hetaha damahaŭsia:
«Kali Maskva kaža «abjadnańnie», jana zaŭsiody razumieje i spadziajecca (i Jelcyn, i Pucin) na pahłynańnie Biełarusi. Hetaje pytańnie zaŭsiody stajała vostra. I Jelcyn hetaha damahaŭsia moža navat bolš, čym Pucin, bo Jelcynu heta było važna, kab pakazać siabie dziaržaŭnikam, bo na im u rasijskaj śviadomaści była piačatka razburalnika dziaržavy. A Alaksandr Ryhoravič pryjazdžaŭ u Maskvu, padpisvaŭ čarhovaje pahadnieńnie ab «poŭnym, kančatkovym i niezvarotnym abjadnańni» … Ale zapeŭnivaju vas, jon ni siekundy nie źbiraŭsia pamianiać svajo stanovišča aŭtarytarnaha kiraŭnika jeŭrapiejskaj dziaržavy na pasadu sakratara minskaha abkama partyi «Adzinaja Rasija», — padkreśliŭ analityk.
Na dumku ekśpierta, raźmiaščeńnie rasijskaj avijabazy ŭ Biełarusi — heta krok nie suprać NATO, a šantaž aficyjnaha Minska:
«Ja dumaju, heta hulnia nie z Zachadam, a viečnaja hulnia Rasii z vašym prezidentam, sproba nacisnuć i niešta atrymać. Heta vielmi składanaja hulnia, jakaja 25 hadoŭ idzie pamiž Rasijaj i Biełaruśsiu, i jakaja pakul, na moj pohlad, zakančvajecca na karyść Biełarusi. Tamu što Biełaruś, pa-pieršaje, zachavała svaju niezaležnaść, a pa-druhoje, umacavała svaju nacyjanalnuju i dziaržaŭnuju samaśviadomaść», — ličyć jon.
Kamientary