Ekśpiert pa rehijanalnym raźvićci Narodnaha antykryzisnaha ŭpraŭleńnia paśla adjezdu ź Biełarusi adkryŭ svaju spravu ŭ Ałbanii.
«Źviartalisia pa pasłuhi ludzi z roznych krain, nie tolki z našaha rehijonu»
U Ałbanii Juraś Hubarevič da 2024 hoda zajmaŭsia kansałtynham. Jon kansultavaŭ zamiežnikaŭ pa pytańniach lehalizacyi, arendy ci nabyćcia žytła, pošuku pracy. U Biełarusi Juraś taksama byŭ indyvidualnym pradprymalnikam, akazvaŭ ofisnyja pasłuhi i rabiŭ pierakłady.
«U Ałbanii ŭ mianie źjaviłasia koła znajomych, — raskazvaje jon. — Pabačyŭ tam asnoŭnyja prablemy, patreby ludziej, jakija źjazdžajuć za miažu. I padumaŭ, što kali viedaješ asablivaści zakanadaŭstva ŭ inšych krainach, to možna kansultavać astatnich. Prachodzić navučańnie mnie nie treba było, daviałosia prosta samastojna vyvučać inšyja rynki. Heta dla mianie byŭ sposab trochi zarabić na žyćcio.
Źviartalisia pa pasłuhi ludzi z roznych krain, nie tolki z našaha rehijonu i nie tolki pa pytańniach, źviazanych z Ałbanijaj. Pasłuhi akazvaŭ na ruskaj, biełaruskaj i anhlijskaj movach».
Ałbanija pakul dahaniaje susiednija krainy ŭ raźvićci, tamu kansałtynh tam maje svaje asablivaści.
«Kali hladzieć na susiednija krainy — Čarnahoryju, Charvatyju, — jany pajšli ŭžo daloka napierad, tam raźvity biznes, stabilizavanyja ceny na žytło.
U 2022 hodzie ŭ Ałbanii ceny na nabyćcio kvater składali niekalki dziasiatkaŭ tysiač dalaraŭ pobač z moram. U inšych krainach mižziemnamorskaha rehijona taksama źjaŭlalisia pryvabnyja prapanovy. Było šmat achvotnych mieć tam nieruchomaść, adpaviedna, dla hetaha byli patrebnyja kansultacyi, jak heta zrabić.
Toj čas jašče byŭ postkavidny. Heta stvaryła ŭnikalnuju situacyju na rynku, jon staŭ raści.
Taksama treba ŭličvać emihranckuju chvalu. Nie dla ŭsich hetych ludziej umovy ŭ krainach Jeŭrasajuza źjaŭlalisia pryvabnymi ci suvymiernymi ich mahčymaściam. Časam šukajuć, dzie možna tańniej arandavać žytło, praściej lehalizavacca. Maja zadača była padbirać takija varyjanty».
U Ałbanii Juraś žyŭ nie ŭvieś čas, ale spyniaŭsia tam va Vlory, na ŭźbiarežžy.
«Arenda kvatery kaštuje 12—25 jeŭra pasutkava nie ŭ siezon, 250-400 jeŭra za miesiac, kali doŭhaterminova. Zaležyć ad horada, rajona ŭ horadzie i adlehłaści da mora, jak i ad jakaści kvatery. Klijentam znachodzili varyjanty za 300-350 jeŭra na miesiac, kali biaruć na hod. Kali chtości choča źniać tolki na žnivień, ceny mohuć dachodzić i da 800-1200 jeŭra».
«Pajechaŭ u Polšču, bo pravavyja asnovy krain ES bolš ustojlivyja»
Pa słovach palityka, adkryć svaju spravu ŭ Ałbanii na 2022 hod było prosta.
«Niekatoryja papiery prymajucca dastatkova chutka. Bolš času zajmaje adkryćcio rachunku ŭ banku, atrymańnie prava na pracu. Dla Ałbanii taksama na toj momant nie mieła značeńnia, zamiežnik ty ci nie. Jak ciapier tam — nie viedaju.
Padatki ŭ Ałbanii nizkija. Jość fiksavany, jaki płaciš štomiesiac niezaležna ad prybytku, — trochi bolš za 100 jeŭra. Dadatkovyja ŭvodziacca, kali dachod pieravyšaje peŭnuju sumu».
Asablivych vydatkaŭ na spravu ŭ Hubareviča nie było, u asnoŭnym tolki na padarožžy, kab sustrakacca z klijentami.
U minułym hodzie Juraś prypyniŭ svaju dziejnaść u Ałbanii, tamu što vyrašyŭ atrymlivać lehalizacyju ŭ Polšču.
«Pryniaŭ takoje rašeńnie, bo pravavyja asnovy krain Jeŭrasajuza bolš ustojlivyja, možna prahnazavać žyćcio na bolš doŭhi pieryjad, — tłumačyć jon. — U Ałbanii takoha niama.
Nie było mahčymaści vyjazdžać z Polščy, bo čakaŭ lehalizacyju, tamu daviałosia pierastać akazvać pasłuhi. Ciapier dumaju, ci mnie nanoŭ usio adnaŭlać, ci bolš pryśviačać siabie hramadska-palityčnaj dziejnaści».
Juraś Hubarevič naradziŭsia ŭ horadzie Biełaaziorsk u Biarozaŭskim rajonie, što ŭ Bresckaj vobłaści. U 2000-m skončyŭ enierhietyčny fakultet Biełaruskaj dziaržaŭnaj politechničnaj akademii. U 2007-2009 hadach byŭ namieśnikam staršyni Partyi BNF. U 2012 hodzie byŭ abrany pieršym namieśnikam staršyni ruchu «Za svabodu», u kastryčniku 2016 hoda staŭ staršynioj ruchu.
U 2020 hodzie braŭ udzieł u prezidenckaj kampanii, prymaŭ udzieł u prajmieryz pa vyznačeńni adzinaha kandydata ad apazicyi. Padčas pratestaŭ 2020 hoda ŭ Biełarusi staŭ siabram Kaardynacyjnaj rady.
Ciapier čytajuć
Łukašenka: U amierykancaŭ niama nijakaha płana, jany prosta zandujuć hlebu7
Kamientary