Parodyja na «Dysnejłend», stvoranaja Benksi, pryniesła £20 miljonaŭ prybytku

U noč na 28 vieraśnia začyniŭsia časovy park zabaŭ Dismaland — prajekt znakamitaha mastaka Benksi, pabudavany ŭ brytanskim miastečku Ueston-śjupier-Mer. Zadumany jak satyra na industryju zabaŭ, jon prynios ekanomicy rehijona £20 miljonaŭ.

Pavialičyć

Z momantu adkryćcia, z 22 žniŭnia, park naviedała kala 150 tysiač čałaviek. Štodnia ŭ prodaž pastupała 4000 kvitkoŭ koštam £3. Takim čynam, zmročny Dismaland, jaki pazicyjanavaŭsia jak satyra na tematyčnyja parki i sučasnuju industryju zabaŭ u cełym, prynios arhanizataram prybytak kala £450 tysiač. Akramia taho, pa padlikach Bi-Bi-Si, jašče £20 młn dadatkovych dachodaŭ atrymali pradprymalniki Ueston-śjupier-Mer i jaho vakolic. «Heta našmat bolš za našyja pieršapačatkovyja čakańni, — pryznaŭsia Bi-Bi-Si pradstaŭnik rehijanalnaha ŭpraŭleńnia pa turyźmie Visit Somerset Džon Ternier. — I heta prykład taho, nakolki važnuju rolu moža hrać turyzm dla ekanomiki kankretnaha rehijona».

Pavialičyć

Bolš za ŭsio vyjhrali ad źjaŭleńnia Dismaland hateli i hiestchaŭsy Ueston-śjupier-Mera. Zvyčajna ŭ vieraśni jany zapoŭnienyja tolki napałovu, ale na praciahu hetych piaci tydniaŭ usie numary ŭ haścinicach horada byli zabraniravany. Pa słovach kiraŭnika haradskoj asacyjacyi hateljeraŭ Kita Fierna, sioleta było pradadziena na 50 tysiač načej bolš, čym u hety ž pieryjad minułaha hoda. Kožny hość traciŭ na haścinicu ŭ siarednim £150. Takim čynam, hateljery dadatkova zarabili kala £7,5 młn. «Heta vyhladała fantastyčna — da nas pryjazdžali turysty ź Mieksiki, Tajłanda, Kitaja, Amieryki», — raspaviadaje Fiern.

Nie zastalisia ŭ stracie i miascovyja restaratary — kožny viečar amal usie stoliki va ŭstanovach byli zabraniravany. Uładalniki nievialikich učastkaŭ ziamli adkryli na čas pracy Dismaland časovyja parkoŭki i čaściakom spahaniali za stajanku pa £5 — sumu, jakaja pieravyšaje košt uvachodnaha kvitka. Udvaja pavialičyłasia i kolkaść pasažyraŭ u ciahnikach, jakija kursujuć pamiž łondanskim vakzałam Padynhtan i Ueston-śjupier-Meram. Dachody ad prodažu čyhunačnych biletaŭ pa hetym kirunku skłali £4,5 młn.

Park Dismaland, nazva jakoha pachodzić ad anhielskaha słova dismal («panury, złaviesny»), byŭ raźmieščany na terytoryi zakrytaha jašče ŭ 2000 hodzie parku «Trapikana». Pa słovach samoha Benksi, jon pryjazdžaŭ u Uestan kožnaje leta da taho času, pakul jamu nie spoŭniłasia 17 hadoŭ, tamu i abraŭ dla svajho prajekta mienavita hety horad.

U Dismaland byli vystaŭlenyja 10 rabot samaha Benksi, a taksama tvory jašče 50 mastakoŭ, siarod jakich Majk Ros i Demijen Chierst: pierakulenaja kareta ź miortvaj Papiałuškaj, zamak pryncesy, padobny na dom z pryvidami, śmierć z kasoj u aŭtamabili na kartynhu.

Pryciahnuła ŭvahu publiki i šou zakryćcia parku, na jakim vystupili Blur, Pussy Riot i Kiejt Tiempiest.

Ažyjataž vakoł prajekta ŭzmacniŭ toj fakt, što ŭ Brytanii Benksi nie pravodziŭ nijakich vystaŭ abo akcyj z 2009 hoda. Apošniaj była vystava ŭ Brystolskim haradskim muziei pad nazvaj «Benksi suprać Muzieja Brystola». Pa vynikach hoda jana stała samaj naviedvalnaj u krainie i pryniesła horadu £10 młn dadatkovaha dachodu.

Pavialičyć

• 0
• 0
• 0
• 0
• 0
• 0
• 0
• 0