Naziralnica, jakaja nie padała Łukašenku ruku: «Ja pakazała staŭleńnie ludziej da jaho»

Niezaležnaja naziralnica Natalla Haračka siońnia nie ŭstała, kali Alaksandr Łukašenka pryjšoŭ hałasavać na svoj učastak. My patelefanavali žančynie, kab daviedacca, jak heta było.

Pavialičyć

«Kamisija składałasia z supracoŭnikaŭ hetaha ŭniviersiteta [Biełaruski dziaržaŭny ŭniviersitet fizkultury i sportu — «NN»], byŭ pradstaŭnik ŁDPB, KPB, Sajuza žančyn. Usie padnialisia, kali Łukašenka zajšoŭ, jon pačaŭ cisnuć ruki. Ja ruki nie padała.

Bo liču, što jon, jak čynoŭnik, nie stvaryŭ umovaŭ dla raźvićcia Biełarusi. Takim čynam ja pakazała staŭleńnie da jaho ludziej, nie tych, chto z hoda ŭ hod jaho ablizvajuć, a prostych ludziej Respubliki Biełaruś.

Jon sprabavaŭ padać ruku mnie, ale ja nie ŭstała, navat nie pahladzieła ŭ jaho bok, to jon ruku prybraŭ.

Viedajecie, nie strašna było. Niekali ja ŭ adzinočku stajała na Kastryčnickaj płoščy ź bieł-čyrvona-biełym ściaham i bałonikam, dzie byŭ pierakreśleny partret Łukašenki. Niechta z žurnalistaŭ sfatahrafavaŭ i źmiaściŭ u časopis z cudoŭnaj frazaj:

«Ułada baicca tych, chto jaje nie baicca, i nie lubić tych, chto lubić jaje». Usie, chto mianie viedaje, da mianie staviacca pavažliva.

Ja była niezaležnym naziralnikam ad prafsajuza REP, taksama ja dapamahaju niezarehistravanaj pravaabarončaj arhanizacyi «Pravavaja dapamoha nasielnictvu». Jašče ŭ mianie hramadzianskaja arhanizacyja «Biełaruski ŭkrop», jakaja zajmajecca dapamohaj Ukrainie.

Dastatkova ciažka było trapić na ŭčastak Łukašenki. Niekatorych ludziej nie zarehistravali, majho naparnika prybrali z učastka. Pryjechali ź jaho pracy, pačali pałochać zvalnieńniem.

Sa mnoj była jašče dziaŭčynka z AHP Maryna. Jana taksama nie ŭstała, kali pryjšoŭ Łukašenka. Tolki my ŭdźviuch siadzieli.

Bolšaść naziralnikaŭ byli fiktyŭnymi. Jany dobryja znajomyja siabraŭ kamisii, vitalisia za ruku ludźmi, što prychodzili hałasavać, abdymalisia. Heta ž asablivy ŭčastak. Tam ludzi z Drazdoŭ, spartsmieny.

Naziralniki hetak sama stajali, kali pryjazdžaŭ Viktar Łukašenka ź dziciom, jon praz paŭhadziny pryjechaŭ paśla baćki.

Kali Łukašenka zajšoŭ u kabinku, to adrazu adzin za adnym pryjšło 111 čałaviek na hałasavańnie. U inšyja hadziny było našmat mieniej.

Na ŭčastku było 2681 vybarcaŭ. Pavodle našych padlikaŭ, na hałasavańnie pryjšło 1368 čałaviek, to bok krychu bolej za 50%. Aficyjnyja ž ličby, što prahałasavała 2053 čałavieki. A za Łukašenku aficyjna prahałasavała 1403 čałavieki, pa našych padlikach stolki navat nie pryjšło hałasavać.

Ja zajmajusia hramadskaj dziejnaściu ad 1996 hoda, kali było stvoranaje abjadnańnie «Asacyjacyja šmatdzietnych baćkoŭ Savieckaha rajona horada Minska». My prasoŭvali prajekt zakona ab ilhotnym kredytavańni šmatdzietnych siemjaŭ. Ad 2000 hoda ja aktyŭna ŭdzielničała va ŭsich akcyjach pratestu. Na Akreścina była adnojčy — u 2006 hodzie paśla pieršaha dnia suda nad Alaksandram Kazulinym. Siadzieła ŭ kamiery z rudoj dziaŭčynaj, jakaja ŭžo pamierła, Chryścinaj Šacikavaj.

Usie maje čaćviora dziaciej taksama ŭdzielničajuć u hramadskim žyćci. Byli ŭ «Zubrach», na Płoščy. Dačka Julija siońnia taksama była naziralnicaj».

* * *

Natalli Haračcy 49 hadoŭ. Jana naradziłasia u Minsku. Skončyła Minski technałahičny technikum. Maje troch synoŭ i dačku.

• 0
• 0
• 0
• 0
• 0
• 0
• 0
• 0