Zołata, akcyi, nieruchomaść. Kudy lepiej inviestavać u 2026 hodzie
Pahutaryli z ekanamistkaj BEROC Nastaśsiaj Łuzhinoj, kudy patencyjna vyhadna inviestavać hrošy ŭ 2026 hodzie.
Zołata — čakajecca praciah rostu
Adnym ź cikavych aktyvaŭ, dastupnych dla inviestavańnia biełarusam, Łuzhina nazyvaje zołata.
Za apošnija piać hadoŭ cana za ŭncyju vyrasła prykładna z 1800 da 4400 dalaraŭ (košt na siaredzinu śniežnia 2020 i 2025 hoda).
«Častku inviestycyjnaha partfiela sapraŭdy možna zachoŭvać u zołacie, bo pakul niama prahnozaŭ, što ceny na jaho buduć źnižacca.
Heta źviazana nie tolki z napružańniem u hieapalityčnaj situacyi, ale i z tym, što Štaty i Jeŭrasajuz źnižajuć pracentnyja staŭki. Adpaviedna, układvacca ŭ amierykanskija ci jeŭrapiejskija kaštoŭnyja papiery stanovicca nie tak vyhadna, tamu inviestary šukajuć inšyja varyjanty. Heta ŭ niejkaj stupieni moža padahravać popyt na zołata jak kaštoŭny mietał, jaki ŭžo doŭhi čas pakazvaje rost», — ličyć Łuzhina.
Pry hetym ekśpiert adznačaje, što rost cen na zołata moža zapavolicca, bo asnoŭny rost za piacihadovy pieryjad pryjšoŭsia na apošnija dva hady. U pačatku 2024‑ha za uncyju davali ŭ rajonie 2000 dalaraŭ.
Heta aznačaje, što nas moža čakać šmathadovy pieryjad stabilizacyi cen na heta kaštoŭny mietał.
Kryptavaluta — nie bolš za 5—10% ad usich inviestycyj
Što tyčycca kryptavalut, to, na dumku ekanamista, jany pavinny składać nie bolš za 5—10% ad inviestycyjnaha partfiela.
«Možna raźmiaščać častku aktyvaŭ u kryptavalutach, ale nie ŭ vialikaj kolkaści, pakolki my bačym, što kryptavaluty mocna zaležać jak ad palityčnych rašeńniaŭ, tak i ad dziejańniaŭ bujnych inviestaraŭ. Akramia taho, važnym faktaram źjaŭlajecca rehulavańnie rynku», — ličyć ekśpiert.
Naprykład, što tyčycca samaj papularnaj kryptamaniety — bitkojna, to za apošni hod jana patańnieła na 16,6%: sa 104 tysiač da 87 tysiač dalaraŭ, choć da taho doŭha rasła.
Pry hetym na praciahu hoda byli pieryjady i z bolš istotnym padzieńniem. Jak, naprykład, sioleta vosieńniu, kali bitkojn patańnieŭ bolš čym na 30% za dva miesiacy: sa 123 tysiač u pačatku kastryčnika da 84 tysiač u kancy listapada.
Kali hladzieć na piacihadovy pieryjad, to bitkojn za hety čas padaražeŭ na 265%: z prykładna 24 tysiač u kancy 2020‑ha da kala 87 tysiač ciapier.
Akcyi — enierhietyka, abaronka
Kali vykazać zdahadku, što častka sankcyj z boku ZŠA i ES u nastupnym hodzie moža być skasavanaja, to ŭ biełarusaŭ mohuć źjavicca dadatkovyja mahčymaści dla inviestavańnia.
Jak z punktu hledžańnia adnaŭleńnia dostupu da raniej niedastupnych instrumientaŭ, tak i z pryčyny taho, što mahčymaje źniaćcie sankcyj ź Biełarusi i Rasii moža pryvieści da značnaha rostu cen akcyj kampanij, jakija ciapier znachodziacca pad sankcyjami.
«U vypadku skasavańnia sankcyj u dačynieńni da asobnych, naprykład, rasijskich kampanij, akcyi mohuć pakazać imklivy rost, tamu možna razhladać takija kaštoŭnyja papiery», — adznačaje ekśpiert.
Taksama, na dumku Łuzhinoj, achvotnym inviestavać u akcyi i ablihacyi pa-raniejšamu možna pryhladacca da kaštoŭnych papier jeŭrapiejskich kampanij u śfiery enierhietyki i zialonaj ekanomiki.
Inšy pierśpiektyŭny kirunak — akcyi kampanij z vajenna-pramysłovaha kompleksu, jakija ŭ Jeŭropie ŭ najbližejšyja hady buduć na ŭzdymie.
Adnak pakul praź dziejnyja sankcyjnyja abmiežavańni rabić heta ciažka, tamu taki instrumient chutčej dastupny dla biełarusaŭ zamiežža.
«Vydatki na abaronu ŭ jeŭrapiejskich krainach pavialičvajucca, tamu na praciahu niekalkich hadoŭ kampanii, jakija vyrablajuć tavary dla śfiery abarony, taksama buduć na padjomie. Heta, u svaju čarhu, budzie padahravać cikavaść inviestaraŭ da VPK.
U cełym, kali situacyja ŭ rehijonie stabilizujecca i sankcyi z Rasii pačnuć zdymać, možna razhladać kuplu indeksaŭ jeŭrapiejskich akcyj albo ablihacyj», — kaža ekanamist.
Nieruchomaść — rynak pierahrety
Inviestavańnie ŭ nieruchomaść Nastaśsia Łuzhina nazyvaje samym prostym i samym papularnym instrumientam, bo źniešnija faktary akazvajuć na jaje mienšy ŭpłyŭ. Hałoŭnym abmiežavańniem dla takich inviestycyj źjaŭlajucca, mabyć, vialikija sumy.
«U nastupnym hodzie bumu i, adpaviedna, rostu cenaŭ nie čakajecca, pakolki ekanamičny rost zapavolvajecca i dachody buduć raści ŭžo nie tak aktyŭna, jak u papiarednija hady, tamu ceny na nieruchomaść stabilizujucca», — ličyć Łuzhina.
Akramia taho, važna adznačyć, što cana na kvadrat u Biełarusi ŭžo ŭščylnuju nabliziłasia da pikavych pakazčykaŭ, jakija naziralisia ŭ kancy 2007 hoda. A pik cen kanca 2013—2014 hoda ŭžo byŭ pabity sioleta. Heta śviedčyć pra toje, što ceny ciapier užo i tak nie nizkija. Praŭda, inflacyja dalara z 2014 hoda była istotnaja.
«Rostu cen spryjali jak rost realnych dachodaŭ nasielnictva, tak i ŭmacavańnie biełaruskaha rubla da dalara, što rabiła nieruchomaść dla bolšaści nasielnictva bolš dastupnaj. Heta padahravała popyt i ŭpłyvała na rost cen u dalaravym ekvivalencie», — tłumačyć ekanamist.
Na dumku Łuzhinoj, kuplać nieruchomaść u 2026 hodzie varta ŭ pieršuju čarhu tym, kamu jana patrebna dla žyćcia, a nie dla inviestavańnia ŭ nadziei na toje, što za nastupnyja dva‑try hady jaje košt značna vyraście, jak heta było ŭ 2000—2007‑m i 2023—2025 hadach.
«Treba nie zabyvać, što ceny na kvatery ŭ Biełarusi niestabilnyja.
Dadatkovyja ryzyki niasie toj fakt, što dziaržava stymuluje budaŭničuju halinu, banki prapanujuć bolš nizkija pracenty. Dziakujučy hetamu tempy budaŭnictva zastajucca vysokimi, a demahrafičnyja pakazčyki pry hetym horšajuć.
Bieź niejkich surjoznych źmianieńniaŭ u płanie rostu ekanomiki i palapšeńnia demahrafičnaj situacyi rynak žylla budzie stanavicca pieranasyčanym, što nie budzie davać cenam raści», — tłumačyć Łuzhina.
Zychodziačy z hetaha, u budučym hodzie nie varta inviestavać u žyllo tym, chto raźličvaje na vysoki rost jaho koštu.
«Tym bolš što ŭ vypadku pasłableńnia biełaruskaha rubla popyt moža pačać prasiadać, i tady kursavyja vahańni zrobiać efiekt, advarotny tamu, što my nazirali, kali rubiel umacoŭvaŭsia».
«Naša Niva» — bastyjon biełaruščyny
PADTRYMAĆ
Kamientary