Hibrydy vaŭka, kajota i sabaki, jakich niekatoryja navukoŭcy ličać ŭžo novym vidam («kajvaŭkom»), za apošnija dziesiacihodździ zachapili ŭschodniuju častku ZŠA. Pra heta piša The Independent sa spasyłkaj na daśledavańnie amierykanskich hienietykaŭ. Novyja žyvioły zaniali začyščanyja ad vaŭkoŭ lasy, a taksama raŭniny i navat haradskija terytoryi.
Chutčej za ŭsio, kajvaŭki ŭpieršyniu źjavilisia ŭ kancy XIX stahodździa na poŭdni kanadskaha štata Antaryjo, kali vysiečka dreŭ i palavańnie nastolki skaracili kolkaść prydatnych dla razmnažeńnia asobin, što vymirajučyja vaŭki pačali sparvacca z sabakami i kajotami.
Zvyčajna mižvidavaje skryžavańnie daje słabych naščadkaŭ, adnak u dadzienym vypadku sumieś DNK stvaryła asobin, jakija važać udvaja bolš za zvyčajnych kajotaŭ. Kajvaŭki bolš chutkija i muskulistyja, ich skivicy značna bujniejšyja. Niekatoryja asobiny mohuć zavalić alenia, a nievialikaja zhraja — navat łasia.
Hienietyk Chaŭjer Monsan z Univiersiteta Stohn-Bruk (Ńju-Jork), vyvučyŭšy DNK 437 asobin, znajšoŭ u ich 25% hienaŭ vaŭka (u siarednim) i 10% — sabak, hałoŭnym čynam bujnych parod (niamieckich aŭčarak i dabiermanaŭ-pinčeraŭ). Navat vyćcio ŭ novych žyvioł hibrydnaje: jany pačynajuć vydavać huki na nizkich častotach, jak vaŭki, a potym pierachodziać na charakternaje dla kajotaŭ ciaŭkańnie.
Kajoty nie lubiać palavać u lasnoj miascovaści, a vaŭki — vychodzić na adkrytyja prastory, tady jak hibrydy adnolkava dobra siabie adčuvajuć u abodvuch łandšaftach. Skryžavańnie vidaŭ stvaryła drapiežnika, jaki zasialiŭ «pustujučyja» lasy ŭschodu ZŠA (vaŭkoŭ tam vyniščyli jašče ŭ XIX stahodździ). Ciapier kajvaŭki pašyrajuć svoj areał na paŭdniovy ŭschod. Kolkaść ich papulacyi vyrasła da niekalkich miljonaŭ za apošnija sto hadoŭ.
Akramia taho, kajvaŭki zaćvierdzilisia i ŭ bujnych haradach — Bostanie, Vašynhtonie, Ńju-Jorku. Vidać, hieny sabak zadušyli ŭłaścivuju vaŭkam niepryjaznaść da čałavieka, a ŭsiojednaść žyvioł dapamahła prystasavacca da haradskoha žyćcia. U miehapolisach kajvaŭki jaduć harbuzy, dyni, vykinutuju ježu, palujuć na vaviorak i hryzunoŭ u parkach, a taksama na katoŭ. Narešcie, žyvioły navučylisia pierasoŭvacca pa čyhunačnych šlachach, asvoili načny ład žyćcia (bolš biaśpiečny ŭ horadzie) i umiejuć hladzieć u abodva baki, pierachodziačy darohu.
Džonatan Uej z Univiersiteta Kłarka (štat Masačusets), viadučy śpiecyjalist pa hetych žyviołach, pierakanany, što kajvaŭkaŭ užo možna nazyvać asobnym vidam (pavodle marfałahičnych i hienietyčnych kryteraŭ). Hałoŭnym arhumientam suprać takoj pazicyi zastajecca toje, što kajvaŭki praciahvajuć sparvacca z vaŭkami i sabakami.
Ciapier čytajuć
«Ja jechała ad vajny i bambiožak»: Jaŭhienija Čarniaŭskaja pra pierajezd na Kipr7
Kamientary