Rada Jeŭropy hłyboka škaduje ab vyniasieńni novaha śmiarotnaha prysudu ŭ Biełarusi

Rada Jeŭropy hłyboka škaduje ab vyniasieńni novaha śmiarotnaha pryhavoru ŭ Biełarusi. Ab hetym havorycca ŭ zajavie, raspaŭsiudžanaj pres-słužbaj arhanizacyi.»My hłyboka škadujem, što Biełaruś vyniesła jašče adzin śmiarotny pryhavor siońnia, — havorycca ŭ zajavie. — Rada Jeŭropy čakaje, što Biełaruś daść asudžanamu mahčymaść źviarnucca z apielacyjaj. Śmierć nie aznačaje spraviadlivaść».

Rada Jeŭropy taksama znoŭ zaklikała biełaruskija ŭłady ŭvieści maratoryj na śmiarotnuju karu biez usialakaha pramarudžańnia.

Jak paviedamlałasia, Hrodzienski abłasny sud 20 listapada pryhavaryŭ 28-hadovaha Ivana Kulaša da śmiarotnaj kary. Mužčyna pryznany vinavatym u zabojstvie troch pradaŭščyc u Lidskim rajonie, a taksama ŭ kradziažy i razboi.

Abvinavačvany admoviŭsia dać pakazańni ŭ sudzie, a taksama vystupić z apošnim słovam. Pa viersii śledstva, u vieraśni 2013 hoda jon zabiŭ dźviuch žančyn-pradaŭcoŭ u Lidzie i vykraŭ z mahazina hrošy i tavary na sumu bolš čym 37 młn. rubloŭ (č. 2 art. 205; č. 2 art. 207; č. 3 art. 207; pp. 1, 6, 12 č. 2 art. 139; pp. 6, 8, 16 č. 2 art. 139; č. 1 art. 14; pp. 8, 16 č. 2 art. 139 Kryminalnaha kodeksa).

U listapadzie 2014 hoda, pavodle źviestak śledstva, padsudny zabiŭ jašče adnaho pradaŭca ŭ Lidskim rajonie — nanios žančynie bolš za 10 udaraŭ siakieraj i vykraŭ z mahazina hrošy i tavary. Akramia taho, Kuleš pryznany vinavatym u zamachu na zabojstva syna pradaŭščycy, jaki zastaŭ jaho ŭ mahazinie.

Raniej Kuleš byŭ dvojčy sudzimy za kradziež i razboj, a taksama zaviedama niepraŭdzivy danos. Na momant uziaćcia pad vartu aficyjna nidzie nie pracavaŭ. Padčas pieršych dzion sudovaha pasiadžeńnia advakat Mirasłaŭ Karecki adznačaŭ: jaho padabaronny ličyć, što jaho pryhavorać da śmiarotnaj kary, i nie źbirajecca abskardžvać pryhavor. Abaronca prasiŭ sud pryznačyć pakarańnie ŭ vyhladzie 25 hadoŭ pazbaŭleńnia voli, uličvajučy, što Kuleš padpisaŭ jaŭku z pavinnaj i supracoŭničaŭ sa śledstvam.

«Jak by my ni stavilisia da Kulaša, jaho jaŭka z pavinnaj dazvoliła śledstvu raskryć złačynstva ab zabojstvie dźviuch pradaŭščyc u 2013 hodzie. Hetaje złačynstva na praciahu hoda nie było raskryta, i nieviadoma, što było b, kali b Kuleš va ŭsim nie pryznaŭsia», — adznačyŭ abaronca padčas sprečak u sudzie.

Tym nie mienš sudovaja kalehija pad staršynstvam Anatola Zajca paličyła dovady abvinavačańnia bolš pierakanaŭčymi i pryhavaryła Ivana Kulaša da rasstrełu.

Heta druhi śmiarotny pryhavor u 2015 hodzie: 18 sakavika Homielski abłasny sud pryhavaryŭ žychara Rečycy Siarhieja Ivanova da vyšejšaj miery pakarańnia. Małady čałaviek pryznany vinavatym u žorstkim zabojstvie dziaŭčyny. Viarchoŭny sud pakinuŭ u sile pryhavor.

Biełaruś — adzinaja kraina ŭ Jeŭropie i na postsavieckaj prastory, dzie dahetul prymianiajecca śmiarotnaja kara. Z pačatku 1990 hoda da vyšejšaj miery było pryhavorana bolš za 400 asudžanych.

• 0
• 0
• 0
• 0
• 0
• 0
• 0
• 0