Navstrieču/Nasustrač

U subotu mieła ščaście pabyvać na viečary prahramy «Navstrieču/Nasustrač» u Minsku . Heta ŭžo druhaja viečaryna z prahramy, na jakuju mnie daviałosia trapić. Vystupali mahiloŭski paet Dźmitryj Dźmitryjeŭ i maskoŭski paet Dźmitryj Tankanohaŭ. Da hetaha niedzie hod tamu ŭ toj ža zali Minskaj abłasnoj biblijateki słuchała duet Andreja Chadanoviča z Andrejem Radzionavym. Nia viedaju, jak było na inšych sustrečach, ale hetyja dźvie skłali ŭ mianie dziŭna sinchronnyja ŭražańni. U asnoŭnym heta tyčycca spałučalnaści biełaruskaj i ruskaj častak, źmieny adcieńniaŭ nastroju ź pierachodam čarhi ad adnaho aratara da druhoha. Pierš za ŭsio treba adznačyć, što pa emacyjnaści palmu pieršynstva ŭ abodvuch vypadkach ŭziali rasijanie.

Što jašče čaplanuła za vucha ŭ ruskaj častcy — rvanyja rytmy, złoba dnia i padpaznohcievaja fizijałahičnaść štodzionnych pracesaŭ, padkreślenaja hieahrafałahičnaść — pastajanna nazvy stancyj, mikrarajonaŭ, taponimaŭ miascovaha značeńnia. I ŭsio heta ź nizkami śviežych, časta daścipnych vobrazaŭ. Naprykład, pryjom — pieralik budzionnych dziejaŭ: pračnuŭsia, «Protknuł jaičnicie oba hłaza»( ź vierša Dźmitryja Tankanohava) i h.d. Heta zachaplaje — sačyć za nanizvańniem dziejańniaŭ adno na druhoje, tolki rassmakuješ adzin vobraz, a tut užo novy: «Šah vlevo nie priravnivajetsia ni k čiemu». Dźmitryj Tankanohaŭ. Cudoŭna.

Biełaruskaja častka na takim fonie hladziełasia … effiektna. Biełaruskija aŭtary pobač z takim «zažyhałkami» ŭ abodvuch vypadkach vyhladali hetakimi vytančanymi intelihientami‑intelektuałami. Tvory Dźmitryja Dźmitryjeva — lustravanki, ambihramy, mikra‑ i ŭłasna palindromy — treba prosta hladzieć. Adzinaje, što možna tut dadać — amal fizyčna adčuvaješ, jak pierabudoŭvajecca hladackaje ŭspryniaćcie — sa spažyvieckaha jano pieraŭtvarajecca ŭ sutvorčaje. Bačyć, jak adbitak słova ŭ lusterku žyvie svaim žyćciom, transfarmujecca i pretenduje na roŭnyja pravy ź pieršakrynicaj…. Kubaryki — jašče adna absalutna novaja źjava ŭ litaraturnym poli — na moj pohlad, bolšaść zali ŭrubiłasia ŭ sens źjavy tolki pry dapamozie «nahladnaści» vystupu . Naohuł, takaja litaraturna‑intelektualnaja ataka na hladacki mozh maje niešta ad pravakacyi. Takoje ŭražańnie skłałasia nie ŭ mianie adnoj. Adna z hladačak zapadozryła Dzimu ŭ sprobie pad vyhladam litaratury prezientavać navukovyja raspracoŭki calinnych hłybaŭ biełaruskaj paezii! A Andrej Chadanovič, uvohule, napužany ŭsiemi hetymi «fokusami ź lustekam» zapytaŭsia: moža ŭ Dz.Dz. užo jość teksty, jakija ŭvohule nie adlustroŭvajucca?!

Jašče adna asablivaść tekstaŭ Dźmitryja Dźmitryjeva, jakuju ja zaŭvažyła jašče pad čas vystupu Dzimy na Chadanovičavaj prezientacyi berlibraŭ. Ź pieršaj ža siekundy jon źviartajecca da razumnaha, erudyravanaha, vysokaadukavanaha hledača. Zala heta adčuvaje, jana namahajecca apraŭdać i ŭ kaniečnym liku apraŭdvaje čakańni paeta. Heta vielmi kantrastuje sa zvykłym ujaŭleńniem pra vystup.

Usia viečaryna ciahnułasia krychu bolš za hadzinu. Z zali pytalisia pra lit.praces u Maskvie i ŭ Mahilovie. Mimachodam adbyłasia prezientacyja novaha dysku mieładekłamacyj Džeci «Fantom of the literature» ź sieryi «Dyskarnia «Našaj nivy».

nashatanja via by_litara

• 0
• 0
• 0
• 0
• 0
• 0
• 0
• 0