Asoby sakavika

Chto varty zvańnia asoby pieršaha miesiaca viasny? Chto zrabiŭ najbolš u studzieni i tym samym pryciahnuŭ da siabie ŭvahu hramadzkaści i medyjaŭ? Chto zasłužyŭsia pierad čałaviectvam i Biełaruśsiu? Hałasujcie ŭ formie dla apytańniaŭ.

Žurnalisty. Sakavik akazaŭsia nadzvyčaj składanym dla žurnalistaŭ, jakija pracujuć u niezaležnych ŚMI. Spačatku 25 Sakavika padčas śviatkavańnia Dnia Voli byli zatrymanyja dva žurnalisty «Naša Nivy» – Siamion Piečanko i Andrej Lankievič. Šakujučyja fota skryvaŭlenaha Lankieviča ablacieli ŭvieś śviet. Piečanka sudździa Maskoŭskaha rajonu Tamara Ŭnukievič pakarała piatnaccaćciu sutkami aryštu. Heta pry tym, što kalehi žurnalisty śviedčać ćviorda: Siamion nijak nie parušaŭ hramadzki paradak, a vykonvaŭ svaje prafesijnyja abaviazki.

27 ž sakavika adbyłasia specaperacyja. Supracoŭniki KDB praviali masavyja pieratrusy ŭ žurnalistaŭ radyjo «Racyja», «Biełsatu», «Eŭraradyjo». Cisk na žurnalistaŭ naminalna źviazany z kryminalnaj spravaj «Treciaha šlachu», zaviedzienaha za mulciki pra Łukašenku.

Žurnalisty rabili svaju spravu i ŭ inšych sytuacyjach, naprykład, kali apryludnili fakt vystaŭleńnia «žyvoha ščyta» na darozu Miensk—Mikaševičy.

Druhi varyjant, jaki nazyvaŭsia ŭ Redakcyi najčaściej, — heta demanstranty 25 Sakavika, što vyjšli nasuprać kardonaŭ specnazu, dabivajučysia svajho prava na svabodu schodaŭ, prava adznačyć 90-hodździe niezaležnaści Biełarusi ŭ centry stalicy, kala pomnikaŭ nacyjanalnych paetaŭ, a nie na bałotnaj stancyi kala płoščy Banhałor.

Alaksiej Maračkin. Kiraŭnika Rady Zhurtavańnia biełarusaŭ śvietu «Baćkaŭščyna» znakamitaha mastaka Alaksieja Maračkina abvinavacili ŭ łajancy i asudzili na piać sutak. Aryštavali jaho prosta ŭ majsterni, a ŭsio heta było zroblena, kab skanfiskavać niekalki dziesiatkaŭ raściažak i transparantaŭ, namalavanych im da Dnia Voli. Zaadno zabrali jahonaje znakamitaje pałatno «Lalki» i pabili kieramiku. Vypadak z «brydkasłovam» Maračkinym — symbaličny dla biełaruskaj intelihiencyi.

Karen Stjuart i Michaił Chvastoŭ. 7 sakavika Biełaruś adklikała z Vašynhtonu svajho pasła Michaiła Chvastova. Heta było patłumačana ekanamičnymi sankcyjami ZŠA suprać «Biełnaftachimu». Praź piać dzion Miensk była vymušanaja pakinuć pasoł ZŠA Karen Stjuart. Na hetym dyplamatyčnaja vajna miž krainami nia skončyłasia. Biełaruś užo damahłasia skaračeńnia štatu amerykanskaha pasolstva ŭ dva razy, a ciapier patrabuje novych skaračeńniaŭ. Na BT byŭ pakazany repartaž pra špijonskuju sietku, jakaja dziejničała pad prykryćciom amerykanskaj ambasady. ZŠA na niejki čas spynili vydaču viz dla hramadzianaŭ Biełarusi. Ameryka ŭ svaju čarhu praciahvaje zajmać ćviorduju pazycyju ŭ dačynieńni da biełaruskich uładaŭ.

Mianciuk. U sakaviku ŭsia Biełaruś była šakavanaja paviedamleńniem pra zdareńnie na trasie Miensk – Mikaševičy. Kab spynić pjanaha kiroŭcu, jaki niośsia z chutkaściu 180 km/h i 40 chvilinaŭ uciakaŭ ad milicyjantaŭ sa Słucku, inspektary DAI pieraharadzili darohu pryvatnymi lehkavymi aŭtamabilami, nie vysadziŭšy adtul ludziej. Na ščaście, abyšłosia biez čałaviečych achviaraŭ, chacia kiroŭca Mianciuk i ŭrezaŭsia ŭ adzin z aŭtamabilaŭ. Dziakujučy hetamu vypadku, pačali ŭspłyvać i inšyja padobnyja sytuacyi. Mianciuk staŭ imiem nazoŭnym hetaj tendencyi. Da taho ž, jon... prapaŭ.

Uładzimier Navumaŭ. U suviazi sa spravaj DAIšnikaŭ, prajaviŭ siabie i ministar unutranych spravaŭ Uładzimier Navumaŭ. Apraŭdvajučy nieprafesijanalizm rabotnikaŭ DAI, Navumaŭ zajaviŭ, što źviestki pra incydent 2 sakavika «skažonyja medyjami». Paźniej Navumaŭ jašče niekalki razoŭ u sakaviku źjaŭlaŭsia ŭ medyjnaj prastory. Napiaredadni Dnia Voli jon zajaviŭ, što milicyja nastrojenaja na samyja mirnyja dziejańni. Nahadajem, što akcyja skončyłasia razhonam, jakich užo daŭno nie było. 28 sakavika Ŭładzimier Navumaŭ znoŭ «paradavaŭ» pradstaŭnikoŭ ŚMI novaj sensacyjaj – vyjaŭleny «kasir apazycyi». Adnak, akazałasia, što zatrymanaja 25 Sakavika niemaładaja žančyna Natalla Jasievič prosta mieła z saboj 8 miljonaŭ rubloŭ, kab nabyć bloki, a ŭ aŭtazak naprasiłasia sama, bo pabačyła, što tudy paciahnuli jaje adzinaha syna.

Tybetcy. Masavyja chvalavańni prajšli ŭ administracyjnym centry Tybetu Łchasie. Ad 10 sakavika budyjskija manachi pravodzili u Tybecie manifestacyi z nahody 49-j hadaviny paŭstańnia ŭ Łchasie, jakoje skončyłasia vyhnańniem duchoŭnaha lidera Tybetu Dałaj-łamy. Padčas pratestaŭ zahinuła niekalki dziesiatkaŭ čałaviek. Ad 1949 hodu Tybet znachodzicca pad uładaj Kitaju, ale praciahvaje zmahacca za svaju niezaležnaść. Akcyi salidarnaści z Tybetam prajšli ŭ mnohich krainach śvietu, u tym liku Biełarusi.

Alaksandar Lisoŭski. Biełaruskaja škoła vełatreku zaŭsiody vysoka kaciravałasia ŭ śviecie dziakujučy pośpiecham Natalli Cylinskaj. Na sioletnim čempijanacie śvietu ŭ Mančestery Cylinskaj nie pašancavała. U hicie jana była tolki vośmaj, a ŭ spryncie ŭvohule atrymała traŭmu. Zatoje zaźziała novaja zorka biełaruskaha velasportu – Alaksandar Lisoŭski. Hamialčuk vielmi ŭpeŭniena pieramoh u skretčy, a taksama zavajavaŭ bronzu ŭ omnijumie. Jašče adzin załaty medal u honcy pa punktach vyjhraŭ Vasil Kirajenka. U ahulnym zaliku zbornaja Biełarusi zaniała treciaje miesca.

• 0
• 0
• 0
• 0
• 0
• 0
• 0
• 0