«Ja viedaju, što rana ci pozna pa mianie taksama mohuć pryjści». 56‑hadovaha hamielčuka asudzili da 8,5 hoda kałonii
Eduarda Kurlandčyka abvinavacili adrazu pa siami palityčnych artykułach Kryminalnaha kodeksa.
Eduardu Kurlandčyku 56 hadoŭ, jon rodam z Homiela. U nulavyja mieŭ biznes u Rasii — fihuravaŭ jak zasnavalnik maskoŭskaj budaŭničaj kampanii «Strojsici».
Pa-za pracaj Eduard cikavicca rybałkaj, aŭtamabilami i muzykaj.
Paśla padziej 2020 hoda i pačatku poŭnamaštabnaha rasijskaha ŭvarvańnia va Ukrainu jon pryncypova zastavaŭsia ŭ Biełarusi.
«Ja ŭ Biełarusi! I ja viedaju, što rana ci pozna pa mianie taksama mohuć pryjści», — adkazvaŭ Kurlandčyk u adnoj z dyskusij letam 2023 hoda.
Zatrymali Eduarda 8 žniŭnia 2025 hoda — vyhladaje, što za kamientary ź nieabaronienaha akaŭnta ŭ telehramie.
Na jaho zaviali kryminalnuju spravu adrazu pa siami artykułach KK: za «raspalvańnie varožaści» (art. 130), «zakliki da sankcyj i inšych dziejańniaŭ na škodu nacbiaśpiecy» (art. 361), «stvareńnie ekstremisckaha farmavańnia abo ŭdzieł u im» (art. 361-1), «paklop na Łukašenku» (art. 367), «abrazu Łukašenki» (art. 368), «abrazu pradstaŭnika ŭłady» (art. 369) i «dyskredytacyju Biełarusi» (art. 369-1).
U 2026 hodzie, pa infarmacyi «Viasny», sud pryznačyŭ Eduardu Kurlandčyku 8 hadoŭ i 6 miesiacaŭ kałonii. Niadaŭna KDB unios jaho ŭ śpis «terarystaŭ», a pravaabaroncy pryznali hamielčuka palitviaźniem.
Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10 100 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ.
«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy.
«Naša Niva» — bastyjon biełaruščyny
PADTRYMAĆ
Kamientary
[Zredahavana]