U byłoha kiraŭnika niamieckaj raźviedki, aryštavanaha pa spravie ab dziaržaŭnaj zdradzie, vyjavili rak kryvi
Ciapier 80‑hadovy Chaninh znachodzicca ŭ adzinočnaj kamiery śledčaha izalatara ŭ Miunstery.
Były kiraŭnik Fiederalnaj raźviedvalnaj słužby Hiermanii Aŭhust Chaninh, aryštavany pa padazreńni ŭ dziaržaŭnaj zdradzie, chvory na lejkiemiju, piša Bild.
Ciapier 80‑hadovy Chaninh znachodzicca ŭ adzinočnaj kamiery śledčaha izalatara ŭ Miunstery. Dyjahnaz jamu pastavili kala hoda tamu. Abarona Chaninha damahajecca jaho vyzvaleńnia z-pad varty pa miedycynskich pakazańniach.
Chaninha zatrymali 6 kastryčnika ŭ jaho domie ŭ fiederalnaj ziamli Paŭnočny Rejn — Viestfalija. Hienieralnaja prakuratura Hiermanii padazraje jaho ŭ dziaržaŭnaj zdradzie, zbory dziaržaŭnych sakretaŭ i raźviedvalnaj dziejnaści.
Pavodle viersii śledstva, były supracoŭnik BND Manfred D. z 2022 hoda za hrošy pieradaŭ Chaninhu kala dźviuch tysiač sakretnych dakumientaŭ. Advakat byłoha kiraŭnika raźviedki paćvierdziŭ, što ŭ jaho padabaronnaha byli kanfidencyjnyja materyjały, adnak adchiliŭ śćviardžeńni pra toje, što jany mahli nanieści škodu Hiermanii.
Pavodle infarmacyi BILD, advakaty Chaninha padali skarhu ŭ Fiederalny viarchoŭny sud, prykłaŭšy miedycynskaje zaklučeńnie ab jaho zachvorvańni.
Abarona śćviardžaje, što va ŭmovach śledčaha izalatara niemahčyma zabiaśpiečyć nieabchodnaje lačeńnie. Raniej Chaninh znachodziŭsia pad pastajannym nahladam hiematołahaŭ, mieŭ patrebu ŭ rehularnych analizach kryvi i karekciroŭcy miedykamientoznaha lačeńnia. Akramia taho, kožnyja niekalki dzion jaho voziać na dyjaliz.
Na nastupnym tydni sud pavinien razhledzieć pytańnie ab dalejšym utrymańni Chaninha pad vartaj.
Kamientary
Jak mafiozi narešcie załoviać, jon stary, chvory i patrabuje pabłažki. Hladzicie, jaho žyćcio pakarała... Nie, treba sažać.