Minskaja milicyja paviedamiła pra asablivaści achovy pravaparadku ŭ navahodniuju noč

Staličnaja milicyja paviedamiła pra asablivaści achovy pravaparadku ŭ Minsku ŭ navahodniuju noč.

Pavodle infarmacyi HUUS Minharvykankama, u navahodniuju noč śviatočnyja masavyja mierapryjemstvy projduć na 25 roznych placoŭkach va ŭsich rajonach horada. Pry hetym asnoŭnyja hulańni razhornucca kala Pałaca sportu i kala šmatfunkcyjanalnaha kompleksu «Čyžoŭka-arena». Płanujecca, što tut buduć ustanoŭleny mabilnyja turnikiety, a prachod budzie ažyćciaŭlacca praz kantrolna-prapusknyja punkty z pryvyčnaj praceduraj asabovaha nadhladu z vykarystańniem ručnych i stacyjanarnych mietaładetektaraŭ. Pad asablivaj uvahaj achoŭnikaŭ paradku taksama budzie Vostraŭ mužnaści i smutku, adkul z 1.30 da 1.45 buzie zapuskacca navahodni fiejervierk. Razam z tym, u vypadku vialikaj kolkaści ludziej nie vyklučanaja mahčymaść vystaŭleńnia mabilnych turnikietaŭ i na inšych śviatočnych placoŭkach. 

HUUS nahadvaje, što ŭ miescy, jakija achoŭvajucca, nie buduć dapuskacca hramadzianie ŭ stanie ałkaholnaha apjanieńnia. Budzie zabaroniena pranosić z saboj śpirtnyja napoi, piva, inšyja napoi i vadkaści (vyklučeńnie składajuć vada i napoi ŭ prazrystaj jomistaści abjomam nie bolšym za 0,5 litra). Nie puściać taksama z pradmietami, jakimi možna pryčynić uron abo cialesnyja paškodžańni navakolnym, vybuchovaniebiaśpiečnymi i inšymi srodkami i srodkami, zabaronienymi da svabodnaha dostupu, a taksama z žyviołami. Asabliva padkreślivajecca, što abmiežavańni raspaŭsiudžvajucca i na piratechničnyja vyraby (pietardy, rakiety, fiejervierki). Za niezakonnaje vykarystańnie piratechniki praduhledžanaja administracyjnaja adkaznaść ad štrafnych sankcyj da administracyjnaha aryštu.

Z metaj zabieśpiačeńnia biaśpieki na vulična-darožnaj sietcy, što prylahaje da miescaŭ masavych hulańniaŭ, mahčymyja časovyja abmiežavańni ruchu transpartu. Taksama tut inśpiektary ŭzmocniać kantrol za vykanańniem praviłaŭ spynieńnia i stajanki, buduć pracavać evakuatary. 

Staličnaja milicyja zaklikaje ŭsich udzielnikaŭ śviata być uzajemna vietlivymi, nie stvarać niepryjemnych precedentaŭ, nie azmročvać uračystaści sabie i navakolnym, a taksama prajaŭlać razumnuju pilnaść i pry nieabchodnaści infarmavać supracoŭnikaŭ orhanaŭ unutranych spraŭ ab padazronych asobach ci znachodcy pradmietaŭ i rečaŭ, jakija pakinutyja biez nahladu. 

HUUS Minharvykankama prosić minčan i haściej horada z razumieńniem pastavicca da mier, nakiravanych na arhanizacyju biaśpieki i hramadskaha paradku, i vykonvać praviły biaśpiečnych pravodzinaŭ.

• 0
• 0
• 0
• 0
• 0
• 0
• 0
• 0