Prahnoz na vosień: Maskva znoŭ stanie kiepskaj

5—6 krasavika Buš u Sočy sustrakaŭsia z "Pućviedzievym" :) — abodvuma rasiejskimi prezydentami, starym dy novym. U vyniku Pucin vykazaŭ "strymany aptymizm" što da perspektyvaŭ znajści parazumieńnie ŭ pytańni supraćrakietnaj abarony. Kaniešnie, heta doŭhaja pieśnia, ale ŭžo zaraz vidavočna, što pry paciapleńni stasunkaŭ miž Maskvoju dy Vašynhtonam aficyjny Miensk moža kapitalna sieści ŭ haloš.

Ciapierašniaja ajčynnaja fantasmaharyčnaja "vajna z Amerykaj" całkam hruntujecca na spadzievie, što Maskva "nia vydaść". A to 'šče j zaachvocić za taki hieraizm. Ale za minuły miesiac (vo, akurat miesiac užo vajujem! :) nadta nie razahnalisia publična vykazać salidarnaść ni Kreml, ni Duma, ni Łaŭroŭ. Chiba što Zubkoŭ dziažurna skazaŭ dva słovy nakont niepraduktyŭnaści sankcyj, dyj to tamu, što ŭ Miensk pryjechaŭ.

U Rasiei i biez taho bahata prablemaŭ. Ułazić u svarku z Zachadam jašče j cieraz "biełaruskaje pytańnie" absalutna niedarečy. A kali Miadźviedzieŭ, atrymaŭšy tron, zachoča vyjści ź cieniu suvoraha Pucina i zamiest jarłyka "maryjanetki pałkoŭnika KHB" nabyć u vačoch suśvietnaha bamondu imidž samastojnaj fihury, to najlepšy varyjant palahaje akurat u tym, kab blisnuć liberalizmam dy zamirycca z amerykancami.

Užo siońnia Ameryka prapanuje bolšuju transparentnaść u pytańni svajho treciaha pazycyjnaha rajonu SRA, a Maskva — supracu ŭ stvareńni hlabalnaj systemy supraćrakietnaj abarony. Karaciej, idzie dyjaloh, chaj sabie j niaprosty, a miescami j nervovy.

Čytaju pra zakulisnyja padrabiaznaści pieramovaŭ u Sočy. Rajs dy Łaŭroŭ pisali tezy vynikovaj deklaracyi na mieniu, miž radkoŭ pra bliny, ikru dy kulabiaku :) Tak, ciažka znachodzić ahulnuju movu, ale ž voś vam žyvaja palityka, jakaja robicca "z arkuša"! A ŭ nas — tolki karykaturny rymejk chałodnaje vajny.

Ale ŭ siońniašniaj sočynskaj deklaracyi akurat i zaznačajecca, što chałodnaja vajna skončana. Vajaŭničy antyamerykanski impet biełaruskaha kiraŭnictva nijak nie dapasoŭvajecca da raspačataha dyjalohu miž Miadźviedzievym i Bušam (jany ŭžo damovilisia pahutaryć jak śled ŭ lipieni na samicie vialikaj vaśmiorki).

Pavialičyć

Mała taho, što Kreml nie haryć žadańniem kłaścisia pad paravoz za intaresy "Biełnaftachimu", dyk nieŭzabavie na Miensk pačniecca nastup na hazavym froncie. "Hazprom" užo zaraz pałochaje hazam pa 200 dalaraŭ z novaha hodu i ŭ jakaści paratunku prapanuje iści ŭ kanfederacyju (viedajem my vašy kanfederacyi: biaz soli struščycie! :)

Karaciej, na vosień dy pačatak zimy (kali nablizicca čas vyznačeńnia hazavaj cany na 2009 hod) prahnoz taki: Maskva ŭ vusnach pravadyra i na BT znoŭ stanie kiepskaj, i znoŭ my pačujem pieśniu pra zachodni vektar. I čym bolej zaraz našyja stratehi nałamajuć droŭ, tym ciažej potym budzie vykručvacca.

• 0
• 0
• 0
• 0
• 0
• 0
• 0
• 0