Čyhunačny rajsud Jekaciarynburha (RF) prysudziŭ błohierku Kaciarynu Vałahženinavu, jakaja abvinavačvajecca ŭ ekstremiźmie, da 320 hadzin vypraŭlenčych prac. Pavodle prysudu, kanfiskavany ŭ jaje raniej noŭtbuk padlahaje źniščeńniu.
Usie tłumačeńni Vałahženinavaj ab tym, što jana nie staviła za metu raspalvańnie nianaviści i varožaści, na dumku suda, «abviarhajucca linhvistyčnaj ekśpiertyzaj». Pry hetym u ekśpiertnym zaklučeńni sustrakajucca farmuloŭki kštałtu «raspalvańnie nacyjanalnaj nianaviści i varožaści ŭ adnosinach da dobraachvotnikaŭ z Rasii».
Padrobleny podpis błohierki na aformlenych śledčymi SKR papierach byŭ pryznany sudom sapraŭdnym. Pry hetym podpis nie supadaŭ z podpisam Vałahženinavaj u pašparcie i ŭ inšych materyjałach spravy. Usie dokazy abarony sud paličyŭ «niepierakanaŭčymi».
Pry hetym adno abvinavačvańnie, źviazanaje z karykaturaj na čałavieka, padobnaha na Uładzimira Pucina, było źniataje.
Pa słovach advakata, prysud budzie abskardžany. Abaronca padkreśliŭ, što prakuror prasiła prysudzić błohierku da vypraŭlenčych prac, ale sudździa Alena Ivanova vyniesła bolš žorstki prysud — abaviazkovyja pracy.
Prysud byŭ sustrety krykami «Hańba». Prakurora vyvieli z zały pad uzmocnienaj achovaj.
17 lutaha ŭ chodzie sprečak prakuror Maryja Biassonava zaprasiła dla padsudnaj hod vypraŭlenčych prac z utrymańniem 10 pracentaŭ zarobku ŭ dachod dziaržavy. Jana patłumačyła, što prosić takoha «miakkaha» prysudu, pakolki ŭ Vałahženinavaj jość niepaŭnaletniaje dzicia i jana raniej nie była sudzimaja.
Vałahženinavaj inkryminavalisia pieraposty na asabistaj staroncy va «UKantakcie» tekstaŭ i karykatur u padtrymku Ukrainy. Pa častcy 1 artykuła 282 KK (raspalvańnie nianaviści albo varožaści) joj pahražała da čatyroch hadoŭ kałonii. Da prysudu błohierka znachodziłasia pad padpiskaj ab niavyjeździe.
Svaju vinu padsudnaja nie pryznała.
12 śniežnia 2014 hoda śledčy abłasnoha hłaŭka SKR Michaił Duchoŭnieŭ, a taksama apieratyŭnik FSB Aleh Chudzieńkich i jašče šerah asobaŭ pranikli ŭ kvateru Vałahženinavaj pad vyhladam mancioraŭ internetu. U kvatery prajšoŭ pieratrus, paśla zakančeńnia jakoha błohierku advieźli na dopyt u Čyhunačny rajadździeł SKR. Paśla zakančeńnia dopytu Vałahženinavu adpuścili, nie vydaŭšy nijakich papier — ni vopisu kanfiskavanaha, ni kopii pratakołu dopytu, ni pozvy na novy dopyt.
Užo na sudovym pasiadžeńni vyśvietliłasia, što ŭ aformlenych tady papierach byŭ pastaŭleny padrobleny podpis błohierki.
13 studzienia Amnesty International abviaściła pra pačatak kampanii ŭ padtrymku Vałahženinavaj.
Kamientary