Miasnyja žarści pa-babrujsku: były dyrektar miasakambinata pad vartaj, a jaho žonka sprabuje davieści nievinavataść muža
Były dyrektar Babrujskaha miasakambinata Andrej Isajčanka amal hod znachodzicca pad vartaj za pieravyšeńnie paŭnamoctvaŭ, a taksama za niezakonnaje vykarystańnie pracy padnačalenych. Tym časam jahonaja žonka Natalla sprabuje dakazać, što muž nie vinavaty.
Isajčanku abvinavačvajuć u dvuch złačynstvach. Pa-pieršaje, śledčyja ličać, što jon pieravysiŭ paŭnamoctvy, kali arhanizavaŭ zaklučeńnie kantraktaŭ z dvuma rasiejskimi partniorami na ŭmovach apłaty z adterminoŭkaj. Heta pryniesła straty pamieram 33 miljardy rubloŭ. Pa-druhoje, byłoha dyrektara abvinavačvajuć u tym, što jon niezakonna vykarystoŭvaŭ pracu padnačalenych na svaim ziamielnym učastku.
«Svaimi supraćpraŭnymi dziejańniami abvinavačany dyskredytavaŭ aŭtarytet kiraŭnika dziaržaŭnaha pradpryjemstva ŭ vačach padparadkavanych»,— adznačyła Aksana Salaniuk, aficyjny pradstaŭnik Śledčaha kamiteta pa Mahiloŭskaj vobłaści.
Adnak žonka byłoha dyrektara nie pahadžajecca sa śledčymi. Jana śćviardžaje, što rabočyja jeździli na budoŭlu lecišča dobraachvotna!
«U nas narmalnyja adnosiny ź ludźmi, našyja dzieci siabrujuć. Čałaviečyja adnosiny!» — kaža Natalla. Patłumačyć sudu heta budzie składana, bo budoŭla na leciščy viałasia ŭ pracoŭny čas.
Z druhoj pretenzijaj pravaachoŭnikaŭ da byłoha dyrektara ŭsio składaniej. Natalla davodzić, što praca nad apłataj zapazyčanaści viałasia, i bolš za toje — užo paśla taho, jak jaje muža «zakryli», dziaržaŭny kancern «Miasamałpram» pryniaŭ rašeńnie praciahvać pracu z tymi ž partniorami, praź jakich Andrej Isajčanka trapiŭ za kraty.
Tyja 33 miljardy rubloŭ uspłyli ŭ 2014 hodzie. Ich miasakambinatu byli vinnyja dźvie rasijskija kampanii: «Biełaruski pradukt» z Kałuhi i «Miasamałpradukt» z Branska.
«Spravu ab zapazyčanaści zaviali na padstavie akta Dziaržkantrolu. Ale da taho prachodziła šmat pravierak, i nijakich pretenzij nie było! — uzhadvaje Natalla Isajčanka. — 18 žniŭnia 2014 hoda Dziaržkantrol pravieryŭ miasakambinat. U akcie było ŭkazana, što adkaznaść za zapazyčanaść lažyć na načalniku adździeła źniešnieekanamičnych suviaziaŭ. Paśla hetaha muž, jak kiraŭnik kambinata, zapłaciŭ administratyŭny štraf, jaho pieravodziać u pieršyja namieśniki, v.a. dyrektara stanovicca hałoŭny inžynier Chadasievič. Paśla hetaha akt pravierki byŭ pierapisany, i vinavatym staŭ moj muž. Na bazie hetaha akta farmirujecca kryminalnaja sprava», — pierakonvaje jana.
Cikava, što sam Viktar Chadasievič zajmaŭ dyrektarskuju pasadu tolki paŭtara miesiaca. A paśla jaho spynili na prachadnoj ź miasapraduktami na 2 miljony rubloŭ. Chadasieviču prysudzili 2 hady pazbaŭleńnia voli, adnak uvieś termin jon tak i nie adbyŭ. Sioleta jaho vyzvalili i adpravili «na calinu» — vykonvać abaviazki staršyni SVK «Lipaŭka» ŭ hłuchim Chocimskim rajonie.
Natalla źviazałasia z rasiejskimi partniorami miasakambinata. Abiedźvie firmy paćviardžajuć, što hatovy vypłačvać zapazyčanaść.
«Jany nikudy nie chavajucca, jany nie źnikli z tymi hrašyma, naadvarot — kažuć, što hatovyja praciahvać supracoŭničać, hatovyja hasić zapazyčanaść, — śćviardžaje Natalla Isajčanka. — Ja sama chadziła da Bonachava [ciapierašni kiraŭnik Babrujskaha miasakambinata — «NN»], kazała pra heta». Rasiejcy prapanoŭvali nastupnuju schiemu: kałužski «Biełaruski pradukt» pieraličvaje peŭnuju sumu miasakambinatu, 5% ad hetaj sumy idzie na pahašeńnie zapazyčanaści, na astatnija hrošy nabyvajecca pradukcyja. Paśla jaje prodažu schiema paŭtarajecca — častka hrošaj idzie na zapazyčanaść, na astatnija nabyvajecca tavar. Takim čynam zapazyčanaść pastupova pahašałasia b. Ale hetaja ideja nie pasuje kiraŭnictvu miasakambinata. Spačatku biełaruski bok prapanoŭvaŭ, kab na pahašeńnie doŭha išło 20% apłaty, ciapier patrabuje poŭnaj vypłaty zapazyčanaści.
«U śniežni 2015 hoda mianie zaprasili na pasiadžeńnie mahiloŭskaha abjadnańnia «Miasamałprama», na jakim pryniali rašeńnie, što z hetymi ž rasiejcami varta praciahvać pracavać, prosta treba rabić heta praz treciuju jurydyčnuju asobu, — kaža Natalla Isajčanka. — I ŭsich, zdajecca, hetaja schiema zadavoliła. Ale na miasakambinacie ŭsio ž ničoha nie robiać, nakolki ja viedaju. Čamu? Bajacca?»
Sama žančyna spadziajecca, što zmoža dakazać, što zapazyčanaść pavinna była być pastupova pahašana. Da taho ž, kali i dziaržaŭny kancern «Miasamałpram» rekamienduje praciahvać pracu z «prablemnymi» klijentami, to… «To čamu tady siadzić moj muž?» — baronić jaho Natalla.
Sam Andrej Isajčanka ŭ svaich skarhach adznačaje, što nielha razhladać jak škodu debitorskuju zapazyčanaść, pakul nie vyjšaŭ termin iskavaj daŭnaści i pakul spahnańnie zapazyčanaści mahčymaje, jak heta i było ŭ jaho vypadku.
Ale ž ci prysłuchajecca da hetych arhumientaŭ sud?
Na siońnia Andrej Isajčanka praciahvaje znachodzicca pad vartaj u čakańni suda. Chadajnictva ab vyzvaleńni byłoha dyrektara padpisali kala 500 supracoŭnikaŭ kambinata.
Kamientary