Kanstytucyjny sud Małdovy viarnuŭ prava vybirać prezidenta ŭsienarodna
Kanstytucyjny sud Małdovy ŭ piatnicu, 4 sakavika, pryznaŭ niezakonnaj praceduru ŭniasieńnia papravak u Kanstytucyju, pryniatych parłamientam 15 hadoŭ tamu, ab źmienie sposabu abrańnia prezidenta. U zaklučeńni KS, jakoje pryniata na padstavie zapytu deputataŭ ad Libieralna-demakratyčnaj partyi (ŁDPM), havorycca pra adnaŭleńnie prava hramadzian na ŭsienarodnaje abrańnie prezidenta.
Adzin z aŭtaraŭ zapytu deputat Valeryu Hilecki skazaŭ, što paśla rašeńnia KS «parłamient pavinien pryniać arhaničny zakon ab niepasrednym abrańni prezidenta, bo ciapier kiraŭnik dziaržavy budzie vybiracca narodam». Dla pryniaćcia takoha zakona patrebien 51 hołas, udakładniŭ Hilecki. Jon taksama padkreśliŭ, što rašeńnie KS nie maje zvarotnaj siły, tamu jano nie tyčycca abrańnia prezidentami Uładzimira Varonina i Nikałaje Cimafci.
Zapyt u KS z hetaj nahody libierał-demakraty adpravili ŭ listapadzie minułaha hoda. Valeryu Hilecki tady paviedamiŭ, što frakcyja ŁDPM źviarnułasia ŭ KS z prośbaj interpretavać 135 artykuł Kanstytucyi. «Praanalizavaŭšy praceduru hałasavańnia, praviedzienuju 15 hadoŭ tamu, my vyśvietlili, što padčas pracedury byli dapuščanyja parušeńni», — zajaviŭ tady Hilecki.
Deputat udakładniŭ, što havorka idzie ab prajekcie ŭniasieńnia papravak u Kanstytucyju, zarehistravanym jašče ŭ 1999 hodzie hrupaj deputataŭ parłamienta XIV sklikańnia.
Jon taksama adznačyŭ, što rašeńnie KS nie budzie mieć upłyvu «ni dziejny parłamient, ni na dziejučaha prezidenta».
Varta zaŭvažyć, što mandat dziejučaha prezidenta Nikałaje Cimafci zakančvajecca 23 sakavika 2016 hoda.
Kamientary