Jak biełarusy ŭčora hukali viasnu ŭ Ńju-Jorku FOTAREPARTAŽ
Jak dobra, što Hukańnie viasny siabrami Biełaruska-amierykanskaha zhurtavańnia «Pahonia» ŭ Ńju-Jorku užo zrabiłasia tradycyjnym. Choć sinoptyki ŭ niadzielu, 6 sakavika, pahražali paryvistym vietram i navat śniehapadam, my znoŭ sabralisia la Hudzona.
Śviežy vietryk i soniejka, jakoje nie stolki hreła, kolki śviaciła, nadavali nam impetu. Biełarusy, jakija na radzimie nikoli nie prymali ŭdziełu ŭ hetkich śviatach, raptam atrymali mažlivaść dakranucca da ŭłasnaje kultury tut u zamiežžy.
Stroi, vianočki na hałoŭkach dziaŭčat i sałamianyja ptuški z vobrazam zimy j choładu ŭ abliččy lalki Mareny adrazu stvaryli adkazny j uračysty nastroj. Usie stali ŭ koła vakoł ich, pajšli pa ruchu sonca.
I palacieli zahukalnyja biełaruskija pieśni pa navakollu: «Viasna, chadzi ŭ dvoru, niasi kluč za saboju, zimu zamykaci, viasnu admykaci!», — jakija supravadžalisia svojeasablivym, ułaścivym tolki dla viaśnianak prypievam nakštałt pierahukvańnia: «Hu-hu-hu!» Pry tym usie udzielniki ŭskidvali ruki ŭ haru, pasyłajučy hety huk u kaśmičnuju prastoru. Tamu ž i atrymała śviata svaju nazvu — Hukańnie viasny.
Karahody, «kryvyja tanki» j hulni z pacałunkami raźviesialili ŭsich.
A braty adzinaccacihadovy Janka, dzieviacihadovy Alesik i šaścihadovy Marcinka Ryžyja, jakim na bajanie akampanavali maci Alena, stančyli ažno dva biełaruskija žartaŭlivyja tancy, čym pryviali ŭsich u zachapleńnie. Paśla kožny, chto chacieŭ, napisali pa cydułkach usio niadobraje, što zdarałasia ź imi ŭ minułym hodzie i, kab jano bolš nie paŭtarałasia, prymacavali ich da stroju Mareny i pad pieśni chłapčuki Marcinka ź Jankam ukinuli razam ź joj ŭ raku.
Razychodzicca nie chaciełasia, ale nas čakała rytualnaja strava ŭ vyhladzie harochavaha supu, hrečniavaj kašy z hulašom, hrybnoha bulonu, blinoŭ i pirahoŭ z makam i kampotam ci kavaj. Padsiłkavaŭšysia, chłopcy pajšli hulać u futboł, a inšyja pačali śpiavać zastolnyja pieśni. Ciapier my ŭpeŭnienyja, što adyduć chałady ź viatrami j śnieham da zaŭładaryć viasna.
Kamientary