Ukrainskaja vajennasłužačaja Nadzieja Saŭčanka, prysudžanaja ŭ Rasii da 22 hadoŭ kałonii pa abvinavačvańni ŭ zabojstvie dvuch rasiejskich žurnalistaŭ u Danbasie, zabaraniła svaim advakatam abskardžvać prysud i padavać prašeńnie ab pamiłavańni.
U napisanaj ad ruki zajavie, fatahrafiju jakoj vykłaŭ u svaim fejsbuku advakat Mark Fiejhin, Saŭčanka prosić jaho i ŭ dalejšym ažyćciaŭlać jaje jurydyčnuju abaronu ŭ Rasii. Taksama jana adznačaje, što zabaraniaje abskardžvać prysud i prasić rasijskija ŭłady ab pamiłavańni.
Taksama Saŭčanka piša, što zabaraniaje advakatu pryznavać vinu jak ad jaje, tak i ad jaho imia, i rabić jašče jakija-niebudź dziejańni bieź jaje dazvołu. Pa słovach abvinavačanaj, parušeńnie hetych patrabavańniaŭ jana rascenić jak zdradu, jakaja aŭtamatyčna ciahnie admovu ad pasłuh Fiejhina.
Akramia Marka Fiejhina abaronaj Saŭčanka ŭ sudzie zajmalisia dvoje jaho kaleh — advakaty Mikałaj Połazaŭ i Illa Novikaŭ. Pakul nie viadoma, ci maje namier abvinavačanaja karystacca dalej i ich pasłuhami taksama, ale ŭ asobnym liście jana vykazała padziaku za ich pracu.
Prysud pa spravie byŭ vyniesieny 22 sakavika. Pa zakonie jon nabudzie moc tolki praź dziesiać dzion paśla vyniasieńnia i tolki ŭ tym vypadku, kali jaho nie abskardzić ni adzin z bakoŭ. Prakuratura raniej vykazała zadavalnieńnie prysudam i zajaviła, što nie płanuje padavać skarhu.
Saŭčanka sa svajho boku i raniej kazała, što nie maje namieru abskardžvać prysud. Jana nie pryznaje vinu i ličyć sudovy praces u Rasii niezakonnym. Pa słovach vajennasłužačaj, paśla taho, jak jana trapiła ŭ pałon u Danbasie, jaje pavieźli ŭ Rasiju siłaj.
Prezident Ukrainy Piatro Parašenka ŭžo zajaviŭ, što hatovy abmianiać Saŭčanka na dvuch zatrymanych va Ukrainie rasiejcaŭ, jakich ličać dziejučymi vajskoŭcami. Pry hetym abmien zmoža adbycca tolki paśla taho, jak pa ŭsich spravach buduć vyniesienyja i nabuduć moc prysudy.
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana13
Kamientary