«Harynyč»: Tak, ja byŭ piać razoŭ sudzimy ŭ Biełarusi. Ale ciapier ja vajuju za DNR. Za što Łukašenka mianie abviaściŭ terarystam?

Apošnim časam z zony vajennych dziejańniaŭ na Danbasie ŭsio čaściej prychodziać paviedamleńni pra napružanuju sytuacyju kala horadu Jasinavataja. Svaboda daviedałasia, što adnym z padraździaleńniaŭ separatystaŭ, jakija ŭdzielničajuć u bajavych sutyknieńniach na hetym napramku, kiruje hramadzianin Biełarusi Alaksandar Ahrenič.

Naradziŭsia bajavik u horadzie Ščučynie, žyŭ u Vaŭkavysku. U kancy 90-ch Ahrenič prajšoŭ terminovuju słužbu va Ŭzbrojenych siłach Biełarusi, słužyŭ u Harodni ŭ zenitna-rakietnaj bryhadzie. Vosiem sa svaich 37 hadoŭ žyćcia Alaksandar Ahrenič pravioŭ u biełaruskich turmach. U 2014 hodzie jon padaŭsia zmahacca z ukrainskim vojskam. Na akupavanaj častcy Danbasu były biełaruski kryminalnik-recydyvist dasłužyŭsia da kamandzirskaj pasady.

Alaksandar Ahrenič (pazyŭny «Harynyč») — dosyć viadomaja fihura siarod separatystaŭ, možna navat skazać, publičnaja. Šerah videarolikaŭ ź jahonym udziełam možna znajści na Youtube. Sam «Harynyč» staŭ adnym z hierojaŭ žurnalisckaha filmu telekanału «Rośsija 24» «Vajenna-palavy raman», pryśviečanaha bajevikam, jakija znajšli svajo kachańnie na vajnie.

Pavialičyć

Pra «Harynyča» pisała aficyjnaja hazeta «Sovietskaja Biełoruśsija» ŭ artykule «Hastarbajtery vajny» (numar ad 11 lutaha 2016 hodu). Artykuł raspaviadaŭ pra biełarusaŭ, jakija vajujuć na Danbasie.

U hetym materyjale «SB» paviedamlała, što «Harynyč» maje 5 sudzimaściaŭ — za zabojstva, učynienaje ŭ stanie afektu, za kradziažy i machlarstva. Vydańnie taksama pracytavała daśje pravaachoŭnikaŭ na bajevika:

«Pa miescy žycharstva charaktaryzujecca admoŭna, jak miarkujecca, užyvaje narkatyčnyja srodki. Biare ŭdzieł u bajavych dziejańniach na pasadzie kamandzira padraździaleńnia vyviedki na baku ŁNR. Niadaŭna pierajechaŭ z Łuhansku ŭ Danieck, dzie biare ŭdzieł u pošuku i likvidacyi dyversijnych hrupaŭ. Namieraŭ viartańnia ŭ Biełaruś nie vykazvaje».

Pasłuchaŭ rasiejskija ŚMI i pajechaŭ vajavać

Žurnalist Svabody źviazaŭsia z Alaksandram Ahreničam, kali toj byŭ na pieradavoj pad Jasinavataj.

Ahrenič nie chavaje, što ŭ Biełarusi ŭ jaho było piać sudzimaściaŭ.

«Tak, nia budu chavać, u mianie byli sudzimaści. U mianie byli sudzimaści za kradziež i machlarstva. Nu jak machlarstva — ja voś uziaŭ hrošy, skazaŭ, što addam, a nie addaŭ. Nu voś takoha planu. Ahułam ja 8 hadoŭ pravioŭ u turmie», — kaža jon.

Peŭny čas u turmie jon siadzieŭ razam z palitviaźniem Mikałajem Aŭtuchovičam, pra jakoha, darečy, bajavik vykazvajecca ź vialikaj pavahaj.

Paśla čarhovaj adsiedki Ahrenič pačaŭ jeździć na zarobki ŭ Rasieju — pracavaŭ tam budaŭnikom. Mienavita tam jon zaśpieŭ pačatak vajny na Danbasie.

Pa słovach Ahreniča, rašeńnie pajechać na vajnu było niaprostaje, ale jaho vielmi ŭraziła toje, jak pra vajnu i «ŭkrainskija źvierstvy» paviedamlali rasiejskija ŚMI.

«Ja byŭ vielmi nasłuchaŭsia pra hetuju vajnu sa ŚMI. Ja pryjechaŭ z tavaryšam. My ŭdvuch u Rasiei pracavali na adnoj budoŭli. Ja ŭvohule spačatku pryjechaŭ nie vajavać, mnie było cikava daviedacca, što adbyvajecca», — uzhadvaje bajavik.

Pahavaryŭšy z «apałčencami», Ahrenič razam sa svaim siabram (žychar Vaŭkavysku, jaki, pavodle dadzienych MUS, taksama raniej siadzieŭ u biełaruskaj turmie), vyrašyli zastacca na Danbasie, kab vajavać suprać Ukrainy.

«Ja vielmi šmat zabiŭ»

Na Danbasie ŭ byłoha kryminalnika adkrylisia vajennyja zdolnaści. Ciapier va ŭzbrojenych farmavańniach «DNR» «Harynyč» uznačalvaje padraździaleńnie vyviedki, u jaho padnačaleńni kala 400 čałaviek. Ahrenič nosić kapitanskaje zvańnie, atrymlivaje zarobak — 32 tysiačy rasiejskich rubloŭ

Pavialičyć

Uličvajučy specyfiku jaho padraździaleńnia, Ahrenič praktyčna nie pakidaje pieradavoj. Bajavik śćviardžaje, što zabiŭ bolš za sotniu ŭkraincaŭ.

«Tak, ja vielmi šmat zabiŭ. Ličba pieravalvaje za sotniu. A kali b ty bačyŭ praciŭnika ŭ pryceł, što b ty zrabiŭ?» — kaža jon.

Ahrenič absalutna pierakanany, što vajuje z «ukrainskimi fašystami». Kaža, što pryniaŭ rašeńnie vajavać za separatystaŭ jakraz paśla taho, jak ubačyŭ razbomblenyja ŭkrainskimi vojskami škoły. U toj ža čas jon nie admaŭlaje, što mirnyja žychary Danbasu cierpiać i ad dziejańniaŭ bajavikoŭ.

«Viadoma, pakutujuć mirnyja ludzi. My nia možam być idealnymi. Byvaje, kali masavy ŭdar idzie — nu, ad hetaha nikudy nia dzienieśsia, vy sami razumiejecie, što heta vajna. Jość achviary i z našaj viny, nia budu admaŭlać», — pryznaje bajavik.

«Kali b nie Rasieja, my b usie tut zdochli»

Ahrenič ličyć: Danbas — heta rasiejskaja terytoryja:

«Ja razmaŭlaŭ sa zvyčajnymi ludźmi, i ŭ mianie skłałasia mierkavańnie, što hetaja terytoryja, chutčej za ŭsio, rasiejskaja. Jany bolš daviarajuć Pucinu, čym ukrainskim uładam. Ja ad Rasiei nia bačyŭ ahresii, ja bačyŭ tolki dapamohu. Toje, što kažuć, što nam pryvoziać tanki, — ja hetaha asabista nia bačyŭ. Ale pryjaždžali vajskovyja mašyny, pryvozili nam kaski, broniekamizelki, srodki suviazi i medykamenty. Ja ciapier kažu pra svajo padraździaleńnie», — udakładniaje jon.

Praŭda, krychu paźniej u hutarcy z karespandentam Svabody «Harynyč» vielmi vysoka acaniŭ tuju dapamohu, jakuju Rasieja ŭ cełym akazvaje bajevikam:

«Kali b nie Rasieja, my b usie tut zdochli. Heta dziakujučy Rasiei my tut vajujem».

Kolki bajevikoŭ-biełarusaŭ na Danbasie?

Badaj, najbolš cikavaja reč, jakuju raspavioŭ Ahrenič Svabodzie, tyčycca kolkaści bajevikoŭ-biełarusaŭ na Danbasie. Pavodle jahonych słoŭ, tolki ŭ jahonym atradzie słužać 40 hramadzian Biełarusi, a ahułam na baku separatystaŭ vajuje kala 700–800 biełarusaŭ.

Paćvierdzić ci abvierhnuć hetyja ličby niama nijakaj mahčymaści. Ale kali śviedčańni «Harynyča» praŭdzivyja chacia b adnosna kolkaści biełarusaŭ tolki ŭ jahonym atradzie, to heta prymušaje zusim pa-inšamu, čym dahetul, pahladzieć na maštaby ŭdziełu biełarusaŭ u vajnie na Danbasie. Sorak hramadzian Biełarusi ŭ atradzie z 400 čałaviek — heta dosyć šmat, uličvajučy, što biełarusy ŭ padraździaleńnie «Harynyča» nie adbiralisia pa nacyjanalnaj prykmiecie — tam jość dahiestancy, čačency i pradstaŭniki inšych nacyjanalnaściaŭ.

Pavodle ž dadzienych MUS Biełarusi, u vajnie na Danbasie prymała ŭdzieł kala 140 hramadzian Biełarusi z abodvuch bakoŭ, 8 ź ich zahinuli.

Bajavik «Harynyč» — užo nia pieršy, chto kaža pra toje, što kolkaść biełarusaŭ, jakija vajujuć na Danbasie, značna zanižajecca. Raniej bajavik Vital Laščuk zajaviŭ Svabodzie, što nasamreč biełarusaŭ na Danbasie prykładna ŭ čatyry razy bolš, čym pra heta kažuć pravaachoŭniki.

«Łukašenka mianie abviaściŭ terarystam, ale što ja zrabiŭ suprać Biełarusi?»

U Biełarusi ŭ Ahreniča zastalisia baćka i dva syny ad pieršaha šlubu (na Danbasie «Harynyč» ažaniŭsia druhi raz — ź miascovaj «apałčenkaju» z pazyŭnym «Bahira»). Adnak viartacca ŭ Biełaruś bližejšym časam jon nie planuje, bo aścierahajecca kryminalnaha pieraśledu za svoj udzieł u vajnie.

Pavialičyć

«Viarnucca ŭ Biełaruś vielmi chočacca. Chočacca ŭbačyć svaich baćkoŭ, ja chaču ŭbačyć svaich dziaciej — u mianie ŭ Biełarusi dva syny rastuć. Ale jak mnie viarnucca? Mnie nahu prastreliŭ snajper, u mianie 16 askiepkaŭ u śpinie — voś usio, što ja tut zdabyŭ. Ja voś učora dvuch 200-ch pachavaŭ, dy ciažki 300-ty (dva zabitych i adzin ciažka paranieny ź jahonaha atradu. — RS). I mnie kryŭdna, što Alaksandar Ryhoravič na heta zapluščvaje vočy. Jon mianie abviaściŭ terarystam, ale što ja zrabiŭ suprać Biełarusi? Tak, raniej ja ŭ Biełarusi byŭ złačyncam. Zhodny, ja nios zakonnaje pakarańnie, pakarańnie, jakoje zasłužyŭ. A ciapier — za što pakarańnie? Ja vajuju za ludziej Danbasu, ale heta ž nie złačynstva», — kaža jon.

Da jahonych svajakoŭ u Biełarusi ŭžo prychodzili pradstaŭniki pravaachoŭnych orhanaŭ.

«U mianie ŭ Biełarusi zastaŭsia baćka — jon žyvie ŭ Vaŭkavysku. Da jaho prychodzili sa Śledčaha kamitetu, prychodzili z KDB potym. Nakont mianie prychodzili. Sa mnoj vajuje chłopiec z Vaŭkavysku, ź jakim my ź dziacinstva znajomyja — jon žyvie praz dvor. My razam ź im pajechali vajavać. Pryjaždžali hebešniki i da jahonaj siastry. Ja nie razumieju, čaho jany ad nas chočuć. My znachodzimsia va Ŭkrainie, my nia jedziem u Biełaruś. Vy chočacie, kab ja pierastaŭ vajavać? Hetaha nia budzie. Ja nie pierastanu vajavać, pakul nie dajdu da Kijeva i nia źnišču ŭsich fašystaŭ», — kaža bajavik.

• 0
• 0
• 0
• 0
• 0
• 0
• 0
• 0